No Kayiinu wardi Haabiila
4
1 Aadama wondi e deekum Hawwaa faa hooƴi reedu, rimi Kayiinu. Hawwaa wi'i:— Mi heɓii ɓiɗɗo gorko e junngo Joomiraaɗo.a
2 Caggal ɗuum o rimi Haabiila minyoo Kayiinu. Haabiila laatii duroowo dammuuli, Kayiinu du laatii demoowo.
3 Nyannde gomma, Kayiinu ittani Joomiraaɗo sadaka e ko remi ɗuum. 4 Haabiila du suɓii ɓurɗi fayde nder afo dammuuli muuɗum. De Joomiraaɗo jaabanii Haabiila e sadaka muuɗum 5 ammaa o jaɓaay Kayiinu e sadaka muuɗum. Kayiinu ɓerni sanne, ɓalinii. 6 Joomiraaɗo wi'i Kayiinu:
— Ko waɗi de ɓernuɗaa? Ko waɗi de ɓaliniɗaa? 7 Yalla si a waɗii ko wooɗi, a jaɓantaake naa? De si a waɗataa ko wooɗi fu, hakke na woni e dammbugal maa ina doomi ma, ina filoo nanngude ma. De aan kaa, tinnoɗaa njaaloɗaa.
8 Kayiinu haaldi e minyum Haabiila, de ɓe njehi ley ngesa. Nde ɓe ngonnoo ngesa ndeen, Kayiinu hippii minyum Haabiila, wari ɗum. 9 Joomiraaɗo wi'i Kayiinu:
— Toy minya Haabiila woni?
Kayiinu jaabii, wi'i:
— Mi anndaa! Wo miin woni kayboowo minyam oon naa?
10 Laamɗo wi'i:
— Ɗume ngaɗuɗaa? Ƴiiƴam minya wullitake kam gilla e leydi faa yottii dow kammu. 11 Joonin a huɗaama, a riiwaama dow leydi njarndi ƴiiƴam minya ndiin. 12 Si a remii ndi, a heɓataa nafaa e mayri. A yiiltoto, a heɓataa ɗo ngonaa dow leydi ndiin.
13 Kayiinu wi'i Joomiraaɗo:
— Njobdi hakke am ndiin teddii, mi waawataa ndi. 14 Inan a riiwii kam e leydi ndi hannden, mi suuɗoto, mi dilla yeeso maa. Mi waancoto ley adunaaru. Keɓuɗo kam du fuu waran kam.
15 Joomiraaɗo wi'i:
— Wanaa noon. Neɗɗo fuu barɗo Kayiinu, joomum yomnitete nde jeɗɗi.
Joomiraaɗo waɗi maande dow Kayiinu heɓa taa kawruɗo e muuɗum fuu wara ɗum. 16 Caggal ɗuum, Kayiinu dilli yeeso Joomiraaɗo, jooɗowii leydi Notb lettugal Eden.
Haala ƴuwdi Kayiinu
17 Kayiinu wondi e deekum, de oon hooƴi reedu, rimi Henok. Kayiinu nyiɓi huɓeere de inndiri huɓeere ndeen inndi ɓiyum Henok. 18 Henok rimi Irad. Irad rimi Mehuya'el. Mehuya'el rimi Metusa'el. Metusa'el rimi Lamek. 19 Lamek ɓaŋi rewɓe ɗiɗo. Gooto ina wi'ee Aada, ɗiɗaɓo oon ina wi'ee Sila. 20 Aada rimi Jabal, oon woni baaba jooɗiiɓe ley hukumuuji, maruɓe daabaaji. 21 Minyiiko ina wi'ee Yuubal. Oon woni baaba fiyooɓe kolli e cereeli fuu. 22 Sila du rimi Tubal-Kayiinu. Oon laatii baylo tafoowo kaake gollitirɗe, gaɗirteeɗe jamɗe boɗeeje e ɓaleeje fuu. Minyoo Tubal-Kayiinu debbo ina wi'ee Na'ama. 23 Lamek noddi rewɓe muuɗum, wi'i:
Aada e Sila, kettindanee kam,
onon rewɓe Lamek, nanee ko kaalammi ɗuum faa wooɗa.
Mi warii neɗɗo ngam o nawnii kam,
mi warii jokolle saabe o fiyii kam.
24 Si barɗo Kayiinu fuu yomnitete nde jeɗɗi,
ndelle ko Lamek ɗuum yomnitete kile capanɗe jeɗɗi e jeɗɗi.
25 Aadama wondi e deekum katin. Oon rimi ɓiɗɗo gorko, inndiri ɗum Siita. O wi'i:
— Laamɗo hokkii kam ɓiɗɗo goɗɗo loomtuɗo Haabiila mo Kayiinu wari oon.
26 Siita du heɓi ɓiɗɗo gorko, inndiri mo Enos. Ndeen yimɓe puɗɗi noddude innde Joomiraaɗo e ley du'aare.