No neɗɗo arandeejo luttiri Laamɗo
3
1 Ley kulle ladde ɗe Laamɗo Joomiraaɗo tagi ɗeen fuu mboddi ɓuri ƴoyre. Ndi wi'i debbo oon:— Yalla wo goonga Laamɗo wi'i taa nyaamon ɓiɓɓe leɗɗe ngesa ɗeen fuu naa?
2 Debbo oon jaabii, wi'i:
— Miɗen mbaawi nyaamude ɓiɓɓe leɗɗe ngesa ngaan. 3 Ammaa lekki ngonki hakkunde ngesa kiin, Laamɗo wi'i taa min nyaama ɓiɓɓe makki, taa fay min meema ɗe, heɓa taa min maaya.
4 Mboddi wi'i debbo oon:
— A'aa, on maayataa. 5 Laamɗo ina anndi nyannde nyaamuɗon ɓiɓɓe makki fu, gite mooɗon peertoto, laatoɗon hono Laamɗo, anndon ko wooɗi e ko boni.
6 Ndeen debbo oon yi'i ɓiɓɓe lekki kiin ina mbeli nyaamude, ina mbeli ndaarude, ina muuyinii sabo ina ɓeyda hakkillo. O itti ɓinngel makki, o nyaami. O hokki goriiko na tawaa ɗakkol makko, kam du nyaami. 7 Ɓe ɗiɗo fuu gite maɓɓe peertii, ndeen ɓe anndi ɓalli ɓoli ɓe ngoni. Ɓe itti haako ƴibbi, ɓe nyooti, ɓe taadii.
8 Nde henndu kiiral naange wifunoo ndeen, ɓe nani sawtu Laamɗo Joomiraaɗo. Imo yiiltoo ley ngesa leɗɗe ngaan. Ndeen gorko oon e deekum cuuɗii Laamɗo Joomiraaɗo ley leɗɗe ngesa ngaan. 9 Laamɗo Joomiraaɗo noddi gorko, wi'i:
— Toy ngonɗaa?
10 Gorko oon jaabii, wi'i:
— Mi nanu sawtu maa ley ngesa, de kulumi, cuuɗiimi sabo ɓanndu ɓoldu ngonumi. 11 Laamɗo Joomiraaɗo wi'i:
— Mooy haalani ma ɓanndu ɓoldu ngonɗaa? Ndelle a nyaamii ɓiɓɓe lekki ki mbiimi taa nyaamaa kiin naa?
12 Gorko oon jaabii, wi'i:
— Debbo mo kokkuɗaa kam faa wonda e am oon hokki kam ɓii lekki kiin, de nyaamumi.
13 Laamɗo Joomiraaɗo wi'i debbo oon:
— Ɗume woni ko ngaɗuɗaa ɗuum?
Debbo oon jaabii, wi'i:
— Wo mboddi hiili kam de nyaamumi.
14 Laamɗo Joomiraaɗo wi'i mboddi:
Saabe ko ngaɗuɗaa ɗuum,
a huɗaama e ley daabaaji e kulle ladde fuu.
A daasoto dow reedu maa,
a nyaaman colla e nguurndam maa fuu.
15 Mi waɗan nganyaandi hakkunde maa e debbo oon,
e hakkunde ƴuwdi maa e ƴuwdi makko.
Ƴuwdi debbo oon fusan hoore maa,
aan du, a soppan mo teppere.
16 Laamɗo wi'i debbo oon:
Mi waɗan tampiri naawndi ley ɓeyngu maaɗa,
a tampan e ŋatawere.
A muuyan gondal gora, de kam dawrante.
17 Laamɗo wi'i gorko:
— Saabe ko njaɓuɗaa haala deeka de nyaamuɗaa ɓiɓɓe lekki ki kaɗumaami, mbiimi taa nyaamaa ɗuum,
leydi huɗaama saabe maa.
Ley nguurndam maa fuu, e tampiri keɓirtaa ko nyaamaa.
18 Ndi funnante gi'e e huɗo bonko,
ɓii jalo laatoto nyaamdu maaɗa.
19 E nguli yeeso maa keɓirtaa nyaamdu,
faa njeccoɗaa e leydi ndi ittaɗaa e muuɗum ndiin.
Sabo wo a sollaare,
to mayre du njeccotoɗaa.
20 Gorko bi'eteeɗo Aadama oon inndiri deekum Hawwaa, (ɗum na fiirta «nguurndam») sabo kam laatii inna yimɓe fuu. 21 Laamɗo Joomiraaɗo moƴƴinani Aadama e deekum kaddule guri, ɓorni ɗum'en.
22 Laamɗo Joomiraaɗo wi'i:
— Inan, neɗɗo laatake hono gooto meeɗen e anndude ko wooɗi e ko boni. Joonin taa o foortu junngo makko o itta ɓiɓɓe lekki nguurndam kiin du, o nyaama de o wuura faa abada.
23 Ndeen Laamɗo Joomiraaɗo yaltini neɗɗo ley ngesa leɗɗe Eden faa rema leydi ndi nokkaa e muuɗum ndiin. 24 Nde o riiwunoo neɗɗo, o wurtini ɗum ndeen, o darni doomooɓe wi'eteeɓe keruba'en gere lettugal ngesa leɗɗe Eden ngaan. Katin du o darni kaafaahi njiilotooki ki ɗemle yiite faa dooma laawol lekki nguurndam kiin.