2
1 Nii kammu e leydi e ko woni e muɓɓen fuu kiɓɓiniraa. 2 Nyalaande jeɗɗaɓerde ndeen tawi Laamɗo tilake e golleeji muuɗum. O fowti e golleeji makko tagugol ɗi o gollannoo ɗiin fuu. 3 Laamɗo barkini nyalaande jeɗɗaɓerde ndeen, senini nde, sabo e mayre Laamɗo fowti nde tagunoo tageefo fuu.No neɗɗo tagiraa
4 Inan no kammu e leydi tagiraa gilla puɗɗam.
Nde Laamɗo Joomiraaɗo tagunoo kammu e leydi ndeen, 5 tawi lekki fuu walaano e leydi. Huɗo du fuɗaay, sabo Laamɗo Joomiraaɗo tomnaayno ƴuwoonde dow leydi. Neɗɗo du walaano faa golla ndi. 6 Ammaa ndiyam ɓayannoo e leydi ndiin ina sowna ndi, ndi fuu.
7 Laamɗo Joomiraaɗo nokki leydi, tagi neɗɗo, de fuufi e hinere makko foofaango nguurndam. Ndeen neɗɗo oon laatii jom yonki. 8 Laamɗo Joomiraaɗo waɗi ngesa leɗɗe ley Eden faro lettugal. O watti toon neɗɗo mo o tagi oon. 9 Laamɗo Joomiraaɗo funni e leydi ndiin sii leɗɗe fuu, belɗe ndaarude, belɗe nyaamude. O funni lekki nguurndam hakkunde ngesa leɗɗe ngaan, kam e lekki anndinoohi ko wooɗi e ko boni.
10 Gooruwol yalti ley Eden ina yarna ngesa leɗɗe ngaan. Ngol seedi ɗo ngol yalti ɗoon, ngol laatii calɗi nay. 11 Salndu arandeeru nduun ina wi'ee Pison. Kayru fiilii leydi Hawila. Leydi ndiin ina woodi kaŋŋe. 12 Kaŋŋe leydi ndiin wo kaŋŋe dimo. Ɗakkere wi'eteende Bideliyum e kaaƴe dime bi'eteeɗe Oniis du ina ngoni toon. 13 Salndu ɗiɗaɓuru nduun ina wi'ee Gihon. Kayru fiilii leydi Kuus fuu. 14 Salndu tataɓuru nduun ina wi'ee Tiigiri. Indu ilira lettugal leydi Asiiri. Salndu maayo nayaɓuru nduun woni Efrat.
15 Laamɗo Joomiraaɗo hooƴi neɗɗo mo tagi oon, watti ɗum ley ngesa Eden ngaan faa rema nga, hayba nga. 16 O yamiri neɗɗo oon, o wi'i:
— Aɗa waawi nyaamude ɓiɓɓe leɗɗe gonɗe ley ngesa ɗeen fuu. 17 Ammaa taa nyaamu ɓiɓɓe lekki anndinoohi ko boni e ko wooɗi kiin, sabo nde nyaamuɗaa ɓiɓɓe makki fu, a maayan.
No debbo tagiraa
18 Ndeen Laamɗo Joomiraaɗo wi'i:
— Neɗɗo haanaa wonude kam tan. Mi waɗanan mo balloowo hono makko, kawranɗo mo.
19 Laamɗo Joomiraaɗo waɗiri daabaaji e pooli fuu e leydi, de waddi ɗi to neɗɗo faa yi'a no oon inndirta ɗi. Innde nde o inndiri ngel fuu, ndeen laatii innde muuɗum. 20 Hono nii neɗɗo oon inndiri daabaaji e pooli e kulle ladde fuu. De ley majji kaa tawi walaa balloowo kawranɗo mo. 21 Laamɗo Joomiraaɗo ɗaanini neɗɗo oon ɗoyngol teddungol, itti ƴi'al wecco muuɗum gootal, de uddiri nokkuure ndeen teewu. 22 Laamɗo Joomiraaɗo waɗiri debbo e ƴi'al wecco ngal itti e neɗɗo ngaal. O waddani neɗɗo debbo oon. 23 Ndeen neɗɗo wi'i:
Ɗum kaa wo ƴi'al jeyaangal e ƴi'e am,
wo teewu jeyaangu e teewu am.
O noddirte debbo,a
sabo e gorko o ittaa.
24 Ɗum waɗi de gorko yoppan inna mum e bammum, de nanngundura e deekum, ɓe ɗiɗo fuu ɓe laatoo neɗɗo gooto.
25 Gorko oon e deekum, ɓe ɗiɗo fuu ɓalli ɓoli ɓe ngonnoo de ɓe anndaano semteende.