Waɗiino e jamaanuuji,

moodibbo ndewo Alla,

njiɗɗo Alla.

O dewli denɗiiko togooso.

O yiɗi ɗum faa walaa heese.

O hoolii ɗum faa walaa heese.

O waɗataa huunde fu nde deekiiko haajaaka.

No o fotiri yidde ɗum.

Nyannde gom jemma kutuba hiiri.

Moodibbo men hiirdi e juulde.

O waaldi e juulde faa ɗo laamɗo subahaana ɓannginani o,

o rookoo kulle tati heɓa waɗana o,

o heɓa ko o wuurdi e adunaaru.

Moodibbo findini deekum haalani.

O wi'i:

“Min e nilaaɗo Alla ngoddunoo jooni.

Nilaaɗo Alla wi'i,

kulle tati Alla haajaa wadande kam.

So mi rookoke ɗe,

jooni Alla waɗana kam ɗe.

Yaha wara fu walaa.

Min du mi muuyay luttude ma.

Ɗuum de pindin-mi ma heɓa kaalanaa kam ko leeɓum rookaade".

Dey moodibbo wi'i gorum wonnii gaɗa findinii ɗum heɓa ƴama ko jey rookade.

O wi'i dow hoore arande fu,

a pamɗoraaɗo,

rooka danya ko ɓeedanaɗaa.

Moodibbo waɗi ko deekum wi'i.

O ɓeedanaa faa yottii teppere makko.

Debbo ndaarunoo gorum fu,

wi'i gasay,

rooka faa ɓuytoo.

Moodibbo waɗi ko deekum wi'i.

Alla famɗini o faa ɓuri no o worndunoo arande.

Debbo ndaarunoo gorum ni ɓeerndem metti.

O wi'i rooka Alla warta no wordunoo.

Moodibbo men rookii Alla warta no worndunoo.

Alla yedday.

Moodibbo warti no worndunoo.

Alla holli o koo tati o ɗaɓɓunoo,

tati o waɗanaa.

Ndelle so neɗɗo na hooloo deekum,

ta hooloo diwtina.

Saboo reedu jemma sumpalew,

nduu dawii nduu daraaki,

kammbu warii,

nimre fooɗii,

e maayo manngo Alla ɓuri mawnude,

e debbo,

kamɓoy poti luggude.

Neɗɗo anndaa ko woni e nimre,

neɗɗo anndaa ko woni e maayo maango,

neɗɗo anndaa ko woni e reedu jemma.

So neɗɗo na hooloo debbo,

ni hooloo heddita Alla e wi'aakanaa tati njogotoo debbo:

fotiire ɓaleere,

wudere ɓaleere,

fewre ɓaleere.

Bureyma Jallo