44 Pullo debbo e ɓeengem.
Waɗiino e jamaanuuji,,
pullo gorko joginoo deekum.
O wari o dewli debbo goɗɗo o ɓeedi.
O fecciri ɓe ɓeeɗi.
Ko debbo keso o wi'i fu,
ɗuum woni;
gorko o yeddataa.
Fay jemma wari de debbo keso o,
wi'i yo nyalooma,
goriyo o,
wi'an ngoonga,
nani naange na darii.
So taweede yo nyalooma de debbo o wi'i yo jemma,
goriko o,
jaaboto wi'a ngoonga,
nani koode.
Debbo keso o ɓeenge jogii.
So o yehii hoggo,
o ɓira nge,
o wuccoo nge,
o taɓsoo nge,
o tappa ɓiige.
Huunde fu ko woni e yeere nagge nge,
o ɓiran faa laaɓa.
Ɓii-nagge nge,
rafo wara wara ɗum.
Nde nagge rimi fu,
o ɓira ɗum,
o wuccoo ɗum,
o taɓsoo ɗum,
o fiya ɓiyum faa wara minnyana ɗum wande.
Worndi noon faa nyannde gom duroowo oori na'im.
Na o dura ɗi faa naange wari hakkunde dela.
Tawi na'i nyaamii faa kaarii.
Fu ƴuutini nder ɗooɗe na mbaccoo.
Duroowo ƴeenyi dow lekki na ndaara ɗi.
Ko foti ɓeerndem welde walaa.
Buttuli noore e norsay yo ɓurondiran ɓuttiɗilde.
Na'i ndaari nano ndaari nyaamo nji'ay duroowo muɓɓoy.
Kalahaldi na'i ɗi,
wari na metta ɓeenge debbo keso o.
Ɓeenge nge,
wi'i ta kalahaldi ndi metta ɗum saboo ɓeerndem welaa.
O wi'i ɗume de ɓeernde maa welaa.
O wi'i ɓeernde am welaa saboo ɓiɗɗo mo ndimum fu,
yo ɓirɗe,
taɓsaade e wuccaade mbarata ɗum.
O anndaa fu no o watta de o heɓa o darna fay ɓinngel gootel.
O wi'i ɗuum na torli yonki makko sanne.
Duroowo o na woni dow lekki to na hettinii.
Kalahaldi ndi,
jaabii wi'i:
"Ɗuum kaa aan waɗi.
Aan won haalayno.
So a haaliino,
ɗuum selilawiino jon."
Ɓeenge hecce nge ƴami ko jey waɗude.
Kalahaldi ndi wi'i:
"So pul-debbo o warii,
o sorii heɓa o ɓira,
o toƴƴoke ɓiya faa o fuɗɗii ɓirde,
cusaa,
mboodaa,
min fu min ngara.
Kawriten mbooden.
Njaaɓen o,
taƴen o.
O maaya o yoppane ɓiɓɓe maa maaraa.
Ɓeenge hecce nge,
wi'i so ni jaaƴoke hannde,
so ɓiyum yoofaama,
warii fuɗɗii hoontude faa pul-debbo o tonngoke,
toƴƴoke ɗum ni ɗum fuɗɗan woodude heɓa ɗum wallee tayte kam du heddodoyto fay so ɓinngel gootel.
No ɓiɗɗo foti weldude.
Na'i oorti.
Pullo gorko lutti jippii.
O fiilowii o ƴuuri na'i hoore taa ɗi anndita ko o nanii ko kalahaldi ndi e ko ɓeenge nge kaalannoo.
Pullo gorko duri na'im faa kiikiiɗe wari,
naange hiiri.
Futoro juuli.
Heddii o jaaƴii.
Na'i naatidinnoo nder hoggo ni o yottowii jom wuro.
O ɗaɓɓi ɗum haalana deekum tinnoo ta ɓira nagge maaniiwe nge hannde.
Jom wuro wi'i duroowo waddii ko tiiɗi:
"Mi wi'a neɗɗo maani taa ɓira maaniiwe,
ɗuum kaa hoyataa o."
Duroowo o wi'i o hula Alla o haalana deekiiko o,
ta ɓira nagge nge.
O acca ɓiige musina.
Jom wuro haalani deekum ko duroowo o,
wi'i.
Debbo wi'anoo ta ɓira nagge ni fooɗi ɓalingo de rewtini ciiɓaali.
O wi'i:
"Ayyo!
A wi'an ta mi ɓira ɓeenge maaniiwe kaa.
Ko waɗi de a haɗay nawlam kay ta ɓira ɓeengem de mbi'aa kam min ta mi ɓira ɓeenge am."
Pullo gorko wi'i ɗuum walaa baasi.
O yaha o ɓirowa nge.
Pul-debbo waɗi ɓii-nagge yoofaa.
Ɓii-nagge wooni,
musini faa ƴuufo ronndii;
pul-debbo annditi koo ɓeengen tiritii.
O yottii o tonngii ɓeenge makko.
O toƴƴii ɓiyum.
O fuɗɗi ɓirde.
Ɓaafe na njaha na ngarta.
Na o ɓira fii-foo,
fii-foo,
fii-foo.
Nagge susi ni woodi.
Hoggo fu hawriti woodi.
Naggel e nagga fu caami e makko.
Ɗi njaaɓi o.
Ɗi ngaɗi o taƴel,
taƴel,
teɓel teɓel.
Tekkel ɗo ni,
gudel gah ni,
padel to.
Jom wuro e koreejim ɓotti fu kawrondini.
Ɓe njehi ɓe mooɓowi.
Ɓeenge hecce na heddii e hoggo.
Pul-debbo ɓiroowo fu na haani woynaade ɓii-nagge,
na haani woynaade nagge,
ta acca nagge ngeen hutoo ɗum.
Pul-debbo fu na haani ta acca jawdi hutoo ɗum,
na haani yurmaade nagge saboo nagge pul-debbo jogortee.
Neɗɗo so walaa nagge ni pul-debbo wartaa ɗo mum.
Bureyma Jallo