Waɗiino e jamaanuuji,

sukaaɓe nayo njaadooɓe.

Yimɓe fu na mana jaadiraagu maɓɓe.

Jaka ley maɓɓe ɗoon,

gooto woni nanataa ko saaraa mum wi'i ɗum.

Nde weeti fu,

sukaaɓe nayo ɓe yo mbaancoyto.

Nde ɓe njaɓitii laawol faa ɓe muuyi fellitilde fu,

gooto maɓɓe heddoo gaɗa.

Tato ɓe ƴama ɗum ko saaɓii.

O wi'a o waawataa fellitilde.

Ɓe ngatta ɓe ƴama o ko saabii.

O wi'a o waawataa fellitilde saboo mboddi falii laawol makko.

Sukaaɓe ndaara nji'ataa mboddi.

Keddoo mbi'a so o yiɗaa rewde ɓoy ni o yeeƴoo de o sela fenude koo mboddi haɗata o fellitilde laawol.

Ni suka gorko yeeƴoo.

Jogoriinoon faa nyannde gom ɓe ngari ɓe njahowi karaal dutal.

Ɓe tawi gorko mawɗo na jooɗii nder tanni.

Ɓe njottii ɓe nyallini jam.

Heddii ɓe njoodii;

ɓe nyallidi ɗoon faa hiiri.

Wari sukaaɓe men mbi'i:

"Gorko mawɗo,

minen nayo ɓe,

illa min ndimaa yo min njaadooɓe.

Nde min ngari heɓa min pellita laawol fu,

gooto amin wi'ataanaa mboddi haɗata ɗum fellitilde.

Kam tan du yi'ata mboddi ndiin.

Min nji'ataa ndi,

baabiraaɓe amin nji'ataa ndi."

Gorko mawɗo wi'i nanii.

Ɓe koota de ɓe ngartowa jeɗɗiirre waroore.

Balɗe jeɗɗi kuulunoo ni sukaaɓe men ngarti ɗo gorko mawɗo.

Ɓe tawi ɗum na jooɗii ɗo ɓe tawnoo ɗum arande.

Ɓe njootondiri faa jootiiru yottii.

Gorko mawɗo ƴami mono fu inndem.

Mono fu holli inndem.

O ƴamtinii salle na ɓe nji'a mboddi ndi jaadiiɓe yi'ata ndi.

Ɓe mbi'i ɓe nji'ataa.

Gorko mawɗo wi'i ɓe nji'ataa saboo du'aa'u saara rewi ɓe.

Jaadiiɓe na welna ɓeerɗe maɓɓe de welnataa ɓeerɗe saaraa ɓem.

Ɗuum saabii de na ɗum yi'a mboddi ndi.

Ɓe ƴami noy jaadiiɓe jey wadde heɓa accita yi'ude mboddi ndi.

Gorko mawɗo wi'i o welna ɓeerɗe saaraaɓe makko,

ko so Alla jaɓii ni o accitan yi'ude ndi.

Ni sukaaɓe mem ummii kooti.

Sukaaɓe worɓe konnoo ni pillanii jaadiiɓoy ko gorko mawɗo haalani ɓoy.

Illa nyanndem suka gorko o yedday innam,

yedday bammum.

Ko o wi'aa fu yo o waɗan.

O gollanan giɗo makko,

o gollanan ganyo makko.

Nyalaaɗe na njaha na ngarta.

Warowi sukaaɓe nayo ɓe fu njehi ɗo gorko mawɗo.

Ɓe tawi ɗum na jooɗii nder tannim.

Ɓe njootondiri dagu no e bada nih.

Gorko mawɗo ƴami ɓe salle jaadiiɓe na heddii na yi'a mboddi ndiin.

Ɓe mbi'i nani jaadiiɓe na jooɗii.

O wi'i:

"Suka gorko,

na a yi'a ko nji'annoɗaa faa hannde,

so a warii heɓa pellitaa laawol ?"

Suka gorko wi'i wallay yi'atta.

Gorko mawɗo wi'i o walla hoore makko ta golle makko nyaama o illa o maayay,

saboo golleji kewɗi,

Alla heɗortaako neɗɗo laakara.

Ndelle ta calanee saara!

Alahaji A.

Sibiri Baganaaba Jallo