Waɗiino e jamaanuuji,

Alla hokkor en jamaanuuji lobbi.

Debbo wondunoo e ɓii- nawlu e ɓiyum.

Goriiko timmi ɓe nayo.

Sukaaɓe ɓe le yo cunɗu.

Baaɓii ɓoy warowi maayi.

Inna cukalel minyiragel ngel du rewti.

Heddii wuro ngo,

yo yimɓe tato ngoni ɗum:

inniyo o,

e ɓikkoy ɗiɗoy koy.

Debbo keddiiɗo o,

wanyu ɓinngel nawlum ngel faa hoddu hoɗataa.

So ngel duroway ni yo ngel sogginoy.

So ngel manyoway ni yo ngel duroy.

Mawniragel du wi'ee wuytataako yaasi sakko goɗɗum hewtoto ɗum.

Ndelle ko watta fu,

waɗa ngel innam heddaaki ngel.

Duuɓi mbaali.

Wari inna njiɗaangel neewi,

fu fay gootum waɗay ngel walaa inna ngel.

Wari jon kaa deel neyyel muuyi suka o,

maaya.

O haaldowi ɓii-ladde.

O wi'i ɗum so jemma jenngii faa koyɗe ndaroke,

o yulan suudu sukaaɓe de o waɗa ɓinngel nawliiko ngel,

fukkoo hende e wudde toon.

Ndelle so ɓii-ladde warii ni ada kettuɗo e wudde nde.

Deel neyyel yuli suudu.

Jemma warnoo ni sukkaaɓe naati pukkii.

O wi'i ngel innam heddaaki heeda e wudde to.

Kam du yedday o.

Jemma rewnoo faa jenngi ni ɓii- neyel fii ngel fottini de heedi e wudde heɓa henndu wifa ɗum.

Reedu jemma hewtunoo ni ɓii-ladde wari.

Tefi dooɗo wudde suudu heedi.

Heddii soorti ɓii-neyyel taaɓodii.

Cukalel fii nyonaandu,

na nodda innam:

"Inna yo min.

Inna war wallam.

Inna,

yo min kuunga adi.

Inna war wallam".

Inniyo nani bojji.

Ɓeerndem weli.

No ɓeerndem weliri de annditay koo ɓiyum nyonotoo.

Ni ɓiɗɗo na nodda:

"Innaa yo min."

Deel neyyel jaaboroo:

"Daddu yoo daddu.

Alla haɗu ma ma wartude."

Faa ɗo ɓingel woɗɗodowaa.

Weetunoo ni o yi'i juungo na waalii.

O miilii ko junngo ɓii-nawliiko.

O wi'i e ɓeernde makko:

"Hannde kaa mi hewtii wuro,

ɓiyam hewti wuro."

Ɗoon ni o yi'i ɓii-nawliiko wuytii e suudu.

O wi'i:

"Mi bonii.

Jaka yo ɓinngel am kuunga ladde adi".

Ndelle ta en ngaɗa ko boni koo yaawu yeeƴitaade e ko'e men.

Raamata Bari