Ndamndiri mbe'eewa wonnoo,

de walaa fu golle so wanaa rewde nder fiilooji be'i na susa.

Nyannde gom ndi dilli suso na ndi warta.

Ndi woɗɗoke ɗo ndi ƴuuri,

ndi hewtay ɗo ndi ummanii.

Ndeen ndi falondiri e mo ndi ɗaɓataano Alla falondirde:

ɗuum won leendu.

Leenga ƴami ndamndiri:

"Ndamndiri,

a yiɗi yonki maa naa a yiɗaa?"

Ndi wi'i na ndi yiɗi.

Leengaa ndaari ndamndiri faa ɓooyi de watti wi'i:

"Ndamndiri,

so na a haajaa mi yoppide e jonki maa,

kanaa kollaa kam ngoongaaji tati celluɗi,

ndariiɗi."

Ndamndiri men miilii faa wooɗi de wi'i ɗuum walaa baasi.

O heɗɗoo ngoongaaji tati ɗiin.

Leengaa wi'i na heɗii.

Go'o,

ramto wi'i:

"So mi anndiino koo na a rewa ngol laawol,

bada ndewu-mi ngol."

Leenga jaabii wi'i a yiitii.

Na mi heɗii faa hannde.

Ɗiɗi,

ramto wi'i:

“Wallaahi so mi hootii mi haalowii ko mi hawrii ma de njoppidilɗaa kam e yonki am,

wi'ete mi fenu."

Leengaa jaabii wi'i ɗoon du a haalii ngoonga.

Ngoongaaji ɗiɗi ɗi fu yo celluɗi.

Tinna faa hannde so na a haajaa mi yoppide e yonki maa.

Ramto wi'i:

"Tati,

so mi daɗii ma hannde,

so na en kawra du tawete wanaa dow ngol laawol."

Leengaa jaabii wi'i kaal du yo ngoonga.

Ngoongaaji tati ɗi,

ɗiin ndanni ramto.

Ndelle,

tinnee e wawde haala,

saboo waawde haala na danna on tiiɗormaaji kewɗi.

Bukari Jallo