Ni ndu yottii ndu heedowi to,

de ndu wi'i:

"Ɗum ni yaa mbaawuɗaa.

Wanaa hokkude neɗɗo ko nyaama sakko.

Warde ɗum kaa na a waawi.

Mbaraa ɗum illa ɓooyay".

Fowru men dilli ɗoon.

Indu yaha.

Indu yaha faa ndu yottii feto manngo Alla ɓuri mawnude.

Ndu hawi ndiyam tan ndu jooɗii.

Yimɓe du tawaa ɗoon na mbata.

Fowru men nani wi'aa araaji mbaati foonde na mbaali.

Ndu darii ndu miilii.

Noy ndu watta de ndu hewtowa foonde.

Ndu yi'i noora na yinoo.

Ndu noddi ɗum.

Noora men warnoo fu,

o wi'i ɗum walla o,

o feƴƴa.

Noora ƴami o salle so feƴƴinii o,

ɗuum minnyantaa ɗum baasi.

Fowru jaabii wi'i:

"Mballaa kam de baasi hewte!

Fay gootum hewtataako ma so wanaa du'aa'u lobbu."

Ni Noora wi'i Fowru waɗɗoo.

Ni Fowru men waɗɗii.

Ɗo wanaa ɗo,

faa ɓe kewtowi fonngo.

Fowru yinodanoo faa hewti fonngo ni jippii de hakkiti ngoraaku noora taaɓodii.

Noora men haasi de wi'i ko miilinoo waɗii.

Tawi Fowru kaa woɗɗowoke.

Ba neeɓan ni Fowru men tukkowi araaji banɗi.

Ndu nyaami faa ndu haari.

Ndu taaɓii.

Ndu warowi ndu hawri ɓiɓɓe pobbi.

Ndu ƴamitii noy ni ndu waɗata ta ɓiɓɓe pobbi ɗi,

njiitowa araaji banɗi ɗi.

Saboo ndu miilataakonaa yeeƴitaade nyaamowa ko ndu heddunoo.

Fowru men heddii wi'ii:

"Ɓiɓɓe pobbi,

njee ƴoree toon ko on tawowan araaji banɗi na mbaalii."

Gaɗa ɓiɓɓe pobbi nananii teewu ni itti gullal.

Ni sollaare ɓantii.

Nanaa ɓiɓɓe pobbi na ndogga.

Ɓoy anndaa ko ɓoy penana.

Ɓiɓɓe pobbi na ndogga ni sollaare na ɓeedoo.

Heddii njuuraa wi'i gasii;

bada ɓiɓɓe pobbi ɗi njiitowi araaji banɗi ɗi.

Ni sollaare na ɓeedoo.

Wari Fowru men ƴamitii:

"Anndi sollaare fewre na waawi fotude nih.

Huunde nde,

koo tawete ngoonga.

Ko mbi'um ɓiɓɓe pobbi ɗi ɗum tawete yo ngoonga."

Ni njuuraa tuuti ko wonnoo e reedum fu,

de itti gullal,

tokki ndoggooɓe.

Heddii ɓiɓɓe pobbi na ndogga ndarataako.

Fowru men siini hewtoto ɗi,

ta ɗi artoo ɗum e teewu.

Ɓe nyalli na ɓe ndogga.

Ɓe nji'ay fu huunde.

Fowru warowi miccitii ko ngoonga fu yo fenanno ɓiɓɓe pobbi.

Heddii o yeeƴitii to o tawunoo araaji na mbaati to.

Toon du o tawi goɗɗo luttii o,

nyaamidii araaji.

Fowru men wari hooti.

Adi nguru ngoraaku noora tafi tubal.

Nde weeti fu yo o tappan ngal.

O tappa de o yima:

Nguru ngu,

wanaa nguru nagge

Nguru ngu,

wanaa nguru mbaala

Nguru ngu,

wanaa nguru mbe'eewa

Nguru ngu,

yo nguru war njeggiten tan duu.

Koreeji na ƴamitoo ko baaba wi'ata nguru njeggiten tan duu.

Weetii fu,

yo o tappan tubal makko.

O wi'a ngarɗo ƴamani o fu,

wi'ee o maayii.

Alla resi en reeni en,

Noora du warowi yi'i Bojel.

Itti fillanii Bojel ko fowru waɗi ɗum.

O wi'i Bojel walla o,

o itta ɓeernde.

Bojel wi'i ɗuum walaa baasi.

Noora nyiɓa buguuji ɗiɗi.

Buguuru famardu e buguuru mawndu.

Noora men nyiɓi ɗi.

Alla resi en reeni en;

Bojel segilii faa wooɗi yehi wuro fowru.

Yottinoo ni nyallini jam.

Wi'i neɗɗo am o,

walaa ɗoon.

Wi'aa njuuraa maayilawi.

O wi'i walaa ko o waawi wiide gadi saboo dukkuru kaa waawaa ɓurde nih.

Ɓinngel njuuro ƴaakel ngel jaabii wi'i koree jam.

O jaabii o wi'i:

"Dukkuru kaa waawaa ɓurde nih.

Wanaa araaji nay mbaati faa hunnduko weendu to!

Min le mi ronku fu no ngaɗan-mi e majji.

Mi sikkinoo so mi tawinoo njuuro ni min njahanno min mballondira.

Jooni le walaa ko mbaawum wiide."

Ni njuura nootii.

- Ɗo ngonum.

Ɗo ngonum.

- Ndelle ɓe anndanaa ma noon?

- Ɓe anndi.

Ɓe meereeɓe munaafikiiɓe.

Ni Fowru men wari kam e Bojel njootondiri.

Ni Bojel itti fillii.

O wi'i so ngoonga ni won ko waɗi hunnduko weendu to.

Araaji nay mbaati toon.

O anndaa fu noy o watta de njuura faama.

Koyngal makko du yo naawan.

Nani na o fiili ɗum tekke.

Fowru wi'i gasii gaɗa a warii a haalanii kam.

Jooni kaa a waɗɗoto kam heɓa keɓen njottilawo ɗen.

Bojel wi'i:

"Mi waɗɗe!"

O wi'i wattu kirke de ngattaa lagamal heɓa njehen.

Bojel watti njuuro kirke de watti ɗum lagamal.

Fowru wi'i waɗɗa noon.

Ni Bojel waɗɗii.

Njuura rappitii.

Nanaa na ɓe njahana araaji nay mbanɗi na mbaalii tiinde weendu.

Tawi buguuji ɗi,

nyiɓanooma.

Bojel haalani njuuraa koo araaji tati ɗi e buguuru mawndu to cuuɗaa ta kujje ladde nji'a ɓoy sakkoo nyaaman.

Araawa heddiinga nga,

ley buguuru famardu to wattaa.

O wi'i kanko du ɗuum o waawi o waɗi fadde makko e warde ɗo njuraa.

Njuuraa jaabii o wi'i:

"Ɗum waɗi de na mi yiɗi ma Bojel.

A woodu hakkillo sanne.

Wallay a tinnoke."

Ni Bojel na dekii dow njuura.

Koyngal na fiilaa tekke jaka naawataa.

Ni njuuraa na dogga.

Nih faa ɓe paanii daande weendu.

Bojel e njuuraa paaninoo weendu ni ndarii.

Njuuraa wi'i ta en mbiita to,

saboo toon esiraaɓe men ngoni.

Ɗuum won ɗo o gollunoo Noora golle bonɗo to.

Bojel wi'i wanaa haala.

Ɗume wiitinta neɗɗo ɗo esiraaɓem keedi illa weetay!

Buguuji to njaaten njuuro.

Bada kuccuɗen toon sakko anen njaata wuro esiraaɓe maa.

Ni ɓe njottii buguuji.

Bojel wi'i njuuraa:

"Araaji tati ɗi,

ley buguuru mawndu ndu ngoni.

Araawa ngoota nga,

ley buguuru togoyru ndu woni.

Toy artortoɗen?"

Fowru men moosi de wi'i:

"Waɗii ko janninii!

A anndi kaa to tati to artortoɗen.

Ngollen ko ngolleten.

Kutten ɗi faa wooɗa.

Noy ni watta de puɗɗiren ɗo ngoota nga?

En njaha buguuru mawndu to".

Tawi Noora men du,

buguuru mawndu to woni.

Ɓe njottii Bojel wi'i o o uddita heɓa ɓe naata ɓe puɗɗa golle maɓɓe.

Njuuraa omti buguuru.

Tan Noora men waɗi ɗum kap de ƴami:

"A yiɗaanaa mi suge naa mi lage."

Sugaade won wurwude reedu faa ɓiɓɓe reedu nduun ceekoo.

Lagaade won ɗeɗɗude njuuraa faa ɗum waata.

Njuuraa wi'i ikkana ɗum wurweede.

Noora tefi leggal ngal noppi wurwi reedu njuuraa.

Wurtini ɓiɓɓe reedu ndu fu de ɓotti njaareendi luttini.

O tefi kusel teewu togosel o takki e fuudo njuuraa ta njaareendi ndi,

jooroo de o wi'i ɗum,

ummoo dilla ta o jayna ɗum noon.

Bajjal ummii na rayrayta.

Gomngol ga,

joodaali to.

Tawi Bojel kaa heɓii ko heɓatam faa dillii.

Fowru men yottii wuro.

Sukaaɓe na ndiira:

"Baaba wartii,

baaba warti."

Ni njuura na rayrayta.

Joodalol gootol fu na foti e raande waareteende tonƴe.

Njuuraa turinoo ni tawi cofal yi'i kusel cukkaangel e fuudom.

Coffel suppiti kusel.

Tan njaareendi na jooro.

Ni sukaaɓe keli kawri:

"Ba waddii lamtiiri,

ba waddii siiniiri.

Ba waddii lamtiiri,

ba waddii siiniiri."

Ɓe njogorii noon faa ɗo Fowru men boɓɓowii.

Heddii waatiri noon.

Alahaji Haamiidu Ciise