Waɗiino e jamaanuuji,

debbo lobbo.

Dagu makko e wodde walaa.

Sukaaɓe worɓe ɗiɗo du ngonnoo dagu muɓɓoy e ngorgu walaa.

Kamɓe ndiiwondirta e suka debbo oon.

Debbo o,

mo ngorgu yiɗi waɗa gorum.

Worɓe ɗiɗo ɓe,

annduɗo moy ɓuri ngorgu e maɓɓe walaa.

Suka debbo noddi gooto maɓɓe wi'i na yiɗi ɓoy tawondira luuro ɓokki na lettugal wuro maɓɓe.

O wi'owi suka gorko ɗiɗaɓo o du noon.

Yeru ɓokki du e hulɓinaade jemma walaa.

Laddeeru rimi ɓinngel ceccel de kiikiiɗe fu ɗoon jaaƴotoo.

Sukaaɓe worɓe le anndaa tiiri laddeeru nduun.

Heddii suka debbo yehi naatowi luuro ɓokki na hedii sukaaɓe worɓe.

Naange na saama,

suka gorko gooto na yottoo.

Tawi ndeen laddeeru du e ɓiyum njaaƴotonoo ɓokki ɗoon.

Bii laddeeru fijinii wiiti luuro ɓokki.

Suka gorko yi'unoo ɗuum ni haandi.

Doggi faddii luuro.

Binngel laddeeru yottinoo ni ɓe kaamondiri.

Fadde inniyo e warde,

tawi ɓii laddeeru waati.

Laddeeru fiiri faa hooti dow heɓa jippitoo dow suka gorko.

Suka gorko tawi ndu dow.

Ɓe keɓondiri toon.

Suka debbo na woni ley luuro na moosa.

Suka debbo boɗeejo coy,

mo daande mbilla.

Suka gorko jaaltii laddeeru.

Ndeen noon suka debbo wuytii wi'i:

“Mi yi'ii ngorgu maa.

Na mi ɗaɓɓe kootaa ko mi nilanoyte."

Ni suka gorko adi laawol wurom.

Suka debbo anndunoo koo suka gorko woɗɗoke,

daasi laddeeru nanni e luuro ɓokki.

O fukkii de o adi laddeeru ndu e ɓiyum,

o deki dow makko.

O yoppi lefol makko hoore na luuloo e dammbugal luuro ɓokki.

Ba jenngan seeɗa ni naa suka gorko ɗiɗaɓo o,

na wara.

O yappataa o yawɗataako.

O yottii daande luuro ɓokki.

O yi'unoo lefol suka debbo ni o haanɗi.

Nde wootere ni o sorkii nder luuro.

O tawi laddeeru na huufi suka debbo.

O haami hoore laddeeru heɓa o durwida ɗum.

Laddeeru sonnyay latay.

O annditi koo laddeeru waatilawii.

Ndeen noon suka debbo ummii.

Na moosa.

Ɓe kiirnondiri jam.

Ni suka debbo na moosa.

Heddii o wi'i suka gorko hoota ko o nilanowan ɗum.

Ndelle yidde jaalii kulol.

Saajo Bari