Waɗiino e jamaanuuji,

kafay hakkunde hunnduko e hoddiraaɓem.

Njannde gom hunnduko maayi.

Suudu baaba noddondiri heɓa ufoo hunnduko yiitee.

Wi'aa hinere jey ufude o.

Hinere noddaa hollaa.

Ɗum jaabii ɗum wi'i:

"Wallaahi Alla,

mi ufataa hunnduko."

ƴamaa ko saabii.

Hinere holli ko saabii.

Ɗum wi'i:

"Yo koddal hunnduko cawtum.

So mi nanii goɗɗum na luuɓa,

ni mi deƴƴinoo.

De hunnduko jaaboo wi'a,

en mbonii waɗii lumngol.

Anndi ɗume luuɓata ?

Alla e ɗuum de mi sawtiino koddal hunnduko.

So hawtii e muyɗe am du,

mi ufoytaa hunnduko."

Suudu baaba wi'i gaɗa hinere saloke,

ni yitere noddee wara ufowa hunnduko.

Yitere yotii jooɗii.

Ittaa fillanaa.

Yitere wi'i ufoytaa hunnduko.

ƴamaa ko sabii.

Yitere wi'i:

"Na woodi ko saabii de mi ufoytaa hunnduko.

Ko nji'um fu,

yo mi deƴƴinto de hunnduko yoppa wi'a yitere am nde yi'i."

Suudu baaba wi'i gaɗa yitere saloke,

ni noppi hollowee wara ufa hunnduko.

Noppi hollowaa.

Wi'i mayde anndi,

bada ufowi hunnduko.

Wi'aa ko saabii.

Noppi wi'i:

" Na woodi ko saabii de mi ufoytaa hunnduko.

Ko nanum fu yo mi deƴƴinto de hunnduko wi'a noppi am ɗi,

nani.

Alla e ɗuum de haala am walaa e ufoyde hunnduko.

Tewtee faa hannde."

Suudu baaba wi'i gaɗa noppi saloke,

ni hoore noddowee wara.

Hoore ittaa fillanaa.

Hoore wi'i mayde anndi bada ufowi hunnduko.

O ƴamaa ko saabii.

O wi'i na woodi:

"Ɗo nji'an mi ko teddi,

ko mi waawataa adude de hunnduko yoppa wi'a anndaa mballon kam ɗum yottoo e hoore,

saboo yottoke e hoore ni timmii.

Ndelle Alla e ɗuum de mi loɓɓaaka e ufude hunnduko."

Suudu baaba wi'i gaɗa hoore saloke ufude hunnduko ni njunngo nyaamo noddee wara.

Junngo nyaamo wari jooɗii.

Ittaa fillanaa.

Junngo nyaamo wi'i nanay kaal.

O ƴamaa ko saabii.

Junngo nyaamo wi'i "Na woodi ko saabii.

So neema warii,

no wuliri fu,

min artotoo e le'al.

Na mi itta na mi yaara e hunnduko.

So reedu heewii,

ni hunnduko wi'a walliree ndiyam loota junngom.

Junngo men lootee.

Lootee faa laaɓa.

Ɗo nyaamdu heddinoo na takki fu takkitee.

Ndelle wanaa min won ufoowo hunnduko.

Tewtee faa hannde."

Suudu baaba watti hawriti.

Huunde nde,

walaa no waɗee.

Gooto yoppi ɗaɓɓi haala.

Ɗum hokkaa haala.

O wi'i:

"So ngoonga suudu baaba tewtata,

ni nilana kuutol,

saboo ko hunnduko nyaami fu yo kuutol hokkoyta.

Wi'aakanaa nafondirooɓe won pantondirooɓe.

Pantondirooɓe leeɓi ufondirde.

Alla e ngeele,

nilanee kuutol de pantowon junngo nano.

Suudu baaba ƴami ko saabii de o wi'i nano fantowee.

Gorko men wi'i:

"Nano fantete tilay,

saboo subaka Alla fu,

kam hoonoyta kuutol."

Heddii kuutol e juungo nano ndewondiri ufowii hunnduko.

Ndelle ta en kaala yeegum koo huunduko njogiten.

Bukari Jallo