Waɗiino e jamaanuuji,

yimɓe ɗiɗo.

Ɓe koolondirɓe.

Ɓe kodduɓe.

Koddal ngal wooɗi faa walaa narndi.

Na ɓe ngorndi noon faa nyannde gom loonde dey gooto maɓɓe yewi.

Keeɗooje ɓottaa paɗɗoowaa nder ngesa ɗiɗaɓo o.

Na worndi noon faa ɗo tunnguuru fuɗowi nder heeɗoore daande loonde ndeen.

Tunnguuru men lanyi faa wooɗi.

Kaddi ngesa fu yo tunnguuru.

Warowi ndu rimi.

Illa ndu ɓenndi ɓennday,

jom loonde wi'i keeɗooje loondem haajaa.

Jom mbammbaawa wi'i o munya heɓa tunnguuru ɓennda.

So ndu ɓenndii,

ɓe njeɗonndiran paali mayru,

o hewtan heeɗoore daande loonde makko.

Jom keeɗooje loonde salii ko koddom wi'i.

Tilay hokkitee heeɗoore hunnduko loondem.

O memi o memti,

o hunngorii.

Hoddiraaɓe memi memti,

kunngorii.

Kanko kaa heeɗoore daande loonde makko o haajaa.

Hunnduko loonde du,

heɓataako so wanaa tunnguuru ɗoofaa.

Tuunguuru du paalim ɓennday sakko soppete.

Waande fu ɓuray nih.

Heddii tunnguuru soppaa.

Jom loonde hokkitaa heeɗoore daande loondem.

Jom tunnguuru adi paalim ɓenndi ɓennday liili e naange.

Fu ɓoomi mbonnii;

wooturu raw heɓaa sottaa.

Ko gorko men sotti tunnguuru ɗum heɓii ceede seeɗa.

O jooɗii na o lima ɗe.

Dow ɗoon jaadiiko oon yottii.

Kam e ɓiyum ngondi.

Ɗo ɓe mbaalnorirta jam ɗoon ni ɓiiko turii adi seedere fecci,

moɗi fecco wooto.

Gorko jom tunnguuru fitti faa hooti dow de laa'ini.

Wi'i fecco seederem haajaa.

Baaba suka wi'i tewtowan seedere wara hokkita o.

O wi'i fe,

fecco seedere makko o haajaa.

Baaba suka wi'i walaa no waɗee.

Jom seedere wi'i na woodi no waɗee.

Baaba suka ƴamtinii faa wooɗi.

O wi'i tilay suka huttee.

Hoddiraaɓe maɓɓe cawrini kunngi.

Ni ɓiɗɗo huttaa,

seedere ittaa e reedum.

Heddii kam kaa mursiraa nih.

Ndelle so neɗɗo haɓii,

ni sawroo.

Kummbo Jallo