Arande kenam e ɓinngu baabaare na keewunoo sanne.

Nyannde gom suka debbo yehi moorgol.

Hakkunde ɗo o moorotoo e dooɗo o ƴuuri yo nyalla hiirawol.

Laawol ngol du na nyaaɗi saboo rawaandu innditirteendu woni e maggol;

ndu inndee ndu anndee.

Oolal ndu noddirtirtee.

Suka debbo moorinoo hewnii ni wi'aa waala saboo jenngii wooɗi Oolal na woni e laawol.

Ɓiɓɓe baaba mbi'i ɗuum nanataake.

Jokolɓe ɗiɗo ummii.

Ɓe mbi'i kammbari oolal na woni e laawol de neɗɗo maani wara morgol de kulol haɗa ɗum honde!

Ɗuum nanataake.

Sukaaɓe men worɓe ummodii.

Nono fu adi laɓim e kaafaahim.

Suka debbo rewi ɓe.

Ɗo wanaa ɗo,

ɗo wanaa ɗo faa ɓe njottii hakunde ladde.

Sukaaɓe worɓe na ɓurondira manti.

Illa ɓe adi laawol yo manti ɓe ɓurondirta.

Mono e maɓɓe fu na wi'a:

"Allaahu akbaru!

Oolal wurtoo hannde ko na wurtano bone.

Mi waɗa ɗum nih de mi watta mi waɗa ɗum nih."

Ni mono fu na soppa ɓolum,

ni na tippoo labbom e leydi.

Suka debbo na jokkii sukaaɓe worɓe na mayri gootal.

Ni na ŋemoo:

"Alla dannu en sarli Oolal.

Alla reenu en."

Walaa fu ko suka debbo yoppidaa so wanaa du'aa'u.

Ni ɓee to du na mantoo.

Na njogorii Oolal faloke ɓoy ni faaman ko worɓe wanaa gootum.

Alla resi en reeni en faa ɓe kewti ɗo Oolal woowi taweede.

Rawaandu ladde le so aan artii yi'i ɗum de yi'ay ma a tawan reedum na daasoo e leydi.

So rewii faa gite mon timmii nay,

a hunoto mbi'aa ndu taganaaka reedu.

Ngoonga!

suka debbo o,

artii yi'i Oolal;

reedu na daasoo.

Kulol ƴeenyi o.

Na o jogorii:

"Alla suuru en,

Alla dannu en sarli Oolal."

Jokolɓe mbi'i Alla suura en e ɗume?

O heddii na o wi'a Alla suuru en,

laamɗo suuru en.

Ni na o du'oo.

Ni jokolle gooto wi'i:

"Hulu Alla de celdaa en e kulol maa ngol.

Alla suura en e ɗume?"

Suka debbo wi'i wanaa nani Oolal yeeso men na!

Ngoonga,

nani Oolal.

Tawi Oolal du yi'ii ɓe.

Ummii darii de haafii ba taganaaka reedu e bada.

Suka gorko gooto du mantotono ko na yi'a ndu na taƴa daande mayru.

Kam yoppi wi'i:

"Nduu pay won Oolal.

Kayru jaati!"

Na ɓe ɗakkitoo koyngal koyngal.

Jokolle gooto yoppi halɓi.

Na diwna carcar.

Ni Oolal na geeloo ɗum.

Dagu illa naane fu o haaja ɓantude labbo makko o tippo Oolal.

Junngo na diwna.

Wari o waawi o ɓanti labbo.

Oolal fooɗii ɗakkii o seeɗa e dullaangal makko.

O tawunoo koo Oolal ɗakkoke o fu na o jogorii:

"Yuwam mi ŋate.

Aan kaa yuwam nih.

Wallay a yuwii kam mi ŋatete.

Yuwam ndaaraa."

Ni na o rayta.

Warowi o huuɓi,

o wi'i jokolle ɗiɗaɓo o,

hula Alla de wara walla o.

Tawi jokolle ɗiɗaɓo o,

na ɓuri o kulol.

Kam daande suka debbo ɗootiraaɗo oon,

yehi nanngowi de na jogorii."

Inna,

hettina ko baaba wi'ata;

koo yuwam heɓa mi ŋate.

Inna,

ndaar o woofirta Koo Oolal yuwa o heɓa o ŋata ɗum."

Oo to,

du na heddii na jogorii yuwam heɓa mi ŋate.

Labbom na di'una,

nyiiƴem na cehondira.

Oolal taaɓii ba wanaa kam.

Yoppidi ɓe kulol.

Suka debbo o,

du na jogorii suka jokolle gooto o,

hula Alla de yoppana ɗum daandem ta wara ɗum.

O wi'i:

"Yoppu daande am nonni ko a warii kam."

Ndeen noon jokolle o,

sakitii yoppi o.

Heddii semteende haɗi ɓe hootude.

Ɓe peri faa hannde ɓe ngartay.

Alahaji Haamiidu Ciise