Waɗiino e jamaanuuji,

bojel e njuuraa.

Rafo waɗi hitaandem.

Walaa fu ɗo neema heɓee.

Bojel yiiti hakkillo adi bootoorum naati ladde.

O rewni jolloru ndiyam e haɓɓere buurɗi.

Bojel naatunoo ladde ni tawi ɓiɓɓe ladde na pija.

O jooti ɓoy de o darii na o ndaara fijirde muɓɓoy.

Ba neeɓan ni ɓoy ƴami bojel noy de na wakkii bootooru.

Bojel wi'i wakkaakiinaa bootooru heɓa so ƴoonde ɓalinii,

ɓe ndogga ɓe naata.

E ndiyam ɗam le ?

O wi'i so ɓe pijii faa ɓe ɗomɗii ni o hokkora ɓe,

ɓe njara.

E buurɗi ɗi le ?

Mi fittana on nokkuure yaaja so hiiro moddii.

Bojel suuwi buurɗim e ndiyam dow dullaangal ɓiɓɓe ladde.

O adi ɓuurɗi leppuɗi o misi de o wi'i ƴoonde toɓii.

Ɓiɓɓe ladde ndoggi naati nder bootooru bojel.

Ni o worcitii bootooru.

O tappi ɓiɓɓe ladde faa ɗiggi de o adi laawol wuro.

So o yehii yehii ni o ƴama:

"Moy heddii!"

So gootel jaaboke ni o tappa.

Nih faa o wari ɓiɓɓe ladde fu,

o wartiri o hokki wurooɓe makko nyaami.

O baantii wurooɓe njuuraa du.

Reedu jemma hewtunoo ni njuuro soosii findini bojel walla ɗum heɓowa teewu so naati ladde.

Bojel itti fillanii o,

no waɗi de heɓi teewu.

Njuuraa du waɗowi noon.

Tewti bootooru,

ndiyam e buurɗi.

Weetuno ni njuuro dilliri ladde.

Tawi ɓiɓɓe ladde na pija.

O nyallini ɓoy jam.

Ɓe njootondiri faa jootiiru yottii.

Ɓiɓɓe ladde ƴami njuuro ko ƴamunoo bojel.

Njuuro wi'i ɓe:

"Mi haajaakanaa wattude buurɗi ɗi nder ndiyam ɗo,

de mi ada mi misa,

mi wi'a on koo ƴoonde warii heɓa naaton nder bootooru am ɗo."

Illa njuuro yottinay de ɓiɓɓe ladde caaki njoppi njuuro na darii kam tan.

Njuuro adi bootoorum wakkii.

Hulli hondude bootooru ɓoldu.

Heddii o ɓotti kaaƴe o loowi ndu.

Nanaa na o ummanii wuro.

Njuuro doomunoo ni fuɗɗi ƴewnaade:

"On kawrataa kam njaɓon teewu ngu!

On ngarilaway ni ngu wayloto kaaƴe."

Ni sukaaɓe ummii kawri o."

Baaba wartii,

baaba wartii."

Njottii,

njaɓi bootooru.

Bootal haɓitanoo ni tawaa kaaƴe.

Nde wootere ɓiɓɓe njuuro kawriti mbi'i:

"Baaba yo kaaƴe ngaddanɗaa en."

Njuuraa jaabii ɓe wi'i:

"Mi haaliino;

mi holliino on ko so on kawrilaway kam ni teewu ngu laatoto kaaƴe."

Ɓiɓɓe njuuro mbi'i:

"Ngoonga!

en kawrilaway baaba faa teewu laatoke kaaƴe"

Ndelle rafi hakkillo na metti.

Kummbo Jallo