Waɗiino e jamaanuuji, Alla hokku en jamaanuuji lobbi. Suka wonnoo, de illa rimaa yo caliiɗo. Ko o haɗaa tan o waɗata. Baabiiko memi o kunngorii.

Nyannde gom moodibbo wari weeri. Ɗum wi'i suka o, ɗum haajaa ɗum jannginowa. Baaba suka jaabii wi'i: "Suka o, hoyaa marude. Minen ndimi o de na min kula o. Moodibbo wi'i ɗuum walaa baasi. So ngel mawnii ni ngel accitan. Yo cukaaku tahen. Baaba cukalel jaabii wi'i manngaaku lobbu illa e cukaaku anndetee. Moodibbo faɗɗiti haala. O wi'i cukaaku mbonngu hawtaa e manngaaku mbonngu. Baaba suka wi'i o yaada suka oon ndelle.

Heddii moodibbo hokkaa suka. Ɓe ndawdi. Ɓe mboɗɗinoo wuro ni moodibbo wi'i suka gorko daroo. Cukalel darii. O holli ɗum ko o woɗii fu. Cukalel yedday. Wi'i rewii. Ni ɓe anti laawol maɓɓe.

Moodibbo e gariibum njehi njipanowii kaananke. Ɓe njikkanaa. Ɓe kiirti, ɓe kiiri faa jenngi de ɓe pukkii. Gariibu anndunoo koo moodibbom ɗaanoke ni ummii yehi tonteere puccu kaananke. O soppi koyngal puccu o taƴi. O wari o defi faa ɓenndi. O sakitii o findini moodibbo makko. O wi'i ɗum: "Moodibbo, umma koo won ko ngadanaɗen."

Moodibbo ummii. Ɓe kawriti ɓe ƴakki koyngal puccu kaananke faa hantii. Moodibbo looti juuɗem de yeeƴii e daɗɗom heɓa fukkoo. Gariibu yoppi wi'i: " Moodibbo am, teewu ngu, yo teewu koyngal puccu kaananke. Naane taƴoy-mi ngal." Moodibbo dawray de wi'i: "En mbonii. Noy kaananke watta en so weetii?"

Heddii moodibbo e gariibum kokkondiri hakkillo. Ɓe mbi'i ɓe ndoggan illa wuro finay? Ni ɓe ɓotti bootooji maɓɓe ɓe ndilli. Nanaa na ɓe njaha. Illa na ɓe coosoo ni faa wari yo ɓe ndoggan. Wari ɓe njottii lekki makki. Moodibbo wi'i ɓe ƴeenya lekki ki, ɓe cuuɗoo. Gariibu yedday. Ni ɓe ƴeenyi lekki. Ɓe cuuɗii toon. Jaka liwre lobii dow lekki. Ɗoon woni na huufi ɓoccooɗem. Gariibu yi'unoo liwre ni wi'i tilay tappa ɗum. Moodibbo wi'i wanaa haala, bada o tappi liwre nde, o yoppi ɓoccooɗe unndaaɗe. Moodibbo haɓi waaway. Duko mum ummini liwre. Liwre huli muuyi fiirude. Gariibu nanngi koyngal liwre. Moodibbo du nanngi koyngal gariibu. Ni liwre ɗoofodii ɓe faa ɓe kootowi hakkunde kammbu e leydi.

Gariibu anndunoo koo liwre hootii faa dow ni yoppi wi'i: "Moodibbo am, min yaa mi yoppii." Moodibbo rookorii o saabu Alla ta o yoppa koyngal liwre. O wi'i: "Moodibbo, saa Alla, ko ɓuri Alla walaa, mi yoppan koyngal liwre." Moodibbo yamiri o saabu Alla o acca kam du heɓa nannga koyngal liwre gootal, de o yoofitoo o fotta so na o haajaa. Gariibu wi'i jaɓii.

Moodibbo foortii. Junni junngo heɓa nannga koyngal liwre. Dow ɗoon gariibu yoofitii. Nanaa na ɓe mbiiti e leydi. Ni ɓe caami. No bonni fu, noon ɓe ngay. Mo helay junngo fu yo koyngal mum heli.

Ndelle Alla dannu'en sarli bonɗo.