73. Wuugaandu e lewla
Wuugaandu e lewla wo yaadiraaɓe sanne. Jemma e nyalooma fu ɓe ngondu faa nyannde gom tan ɓe muuyi yaroyde ndiyam. Nde ɓe njahannoo fa ɓe njaroowa fu, lewla wii wuugaandu: "Hannden ka wuugaandu, en njarowa keerkete." Wuugaandu nootii o wii: "Hey lewlel, accu ni njarowen mbaaliiɗam. Saabu dey, kerkete na tiiɗani ma." Lewlel wii o, ndelle so ni ɓe njarooytaa keerkete fu, jaadal maɓɓe timmii. Wuugaandu nootii o: "Ayyo wooɗii. Min kay mi yiɗaa fu ko senndata en. En njaha njaarowen keerkete so ɗuum weli ma.
Keerkete le wo ndiyam iiloojam ceeɗu ley gooruuwol hakkunde dubbe koole. Ɓe ndilliri kerkete. Ɓe njogii ɓe njaha faa ɓe njottii hunnduko gooruuwol tan ɓe ndarii. Ɓe puɗɗi yarude. Buugalel ɗomɗitilnoo fu, fiiri hoɗowi dow lekki. Lewlel yardunoo ni luwe ɗisii e ɗaɗi kooli. Memi ɗoofude luwe e ɗaɗi kooli waaway. Faa neeɓi. Wari poolel na yima:
Pooloy keerkete dannga lilifo,
ƴoogooɓe maana dannga lilifo,
Kamɓoy ina ngara dannga lilifo.
ƴoogooɓe maana dannga lilifo,
Kamɓoy ina ngara dannga lilifo.
Nde lewlel nanunoo fu, nootii kam du:
Kiiriri njeecoo dannga lilifo,
Kaarara njeeƴo dannga lilifo.
Kaarara njeeƴo dannga lilifo.
Nde lewlel wiinoo noon fu, heddii na diffoo, na fitta, na fooɗa hoore muuɗum faa wuurtoo, waaway. To ƴoogooɓe ton du tawi cukalel kam aardinoo. Nden cukalel ngel wii womɓe gaɗa muuɗum: "Goɗɗum ya na ton to keerkete to na haala." Womɓe gaɗa ɓen, mbi o fenan, o tinnoo tan o yaaha law." Nde wuugaandu yiinoo ɓe ngara warde fu, wii gatin:
Jaadel am lewlel dannga lilifo,
Ɗum ni mbiimaa-mi dannga lilifo,
Njaren mbaaliiɗam dannga lilifo,
Mbiiɗaa keerkete dannga lilifo,
Pooloy keerkete dannga lilifo,
ƴoogooɓe maana dannga lilifo,
Kamɓoy ina ngara dannga lilifo.
Ɗum ni mbiimaa-mi dannga lilifo,
Njaren mbaaliiɗam dannga lilifo,
Mbiiɗaa keerkete dannga lilifo,
Pooloy keerkete dannga lilifo,
ƴoogooɓe maana dannga lilifo,
Kamɓoy ina ngara dannga lilifo.
Lewlel nde nannoo fu, wii gatin:
Kiiriri njeeƴoo dannga lilifo
Kaarara njeeƴo dannga lilifo.
Kaarara njeeƴo dannga lilifo.
Nden wuugaandu wii o:
Kiiriri njottoke dannga lilifo
Kaarara njottoke dannga lilifo.
Kaarara njottoke dannga lilifo.
Timmii! Den kay himɓe wuro njottii tawi nani lewla na fitta faa tefa wurtagol, waaway. Ndeen ɓeen njottii kaɓɓi lewlel koyɗe. Ɓe nanngi hoore muuɗum, ɓe ngatti luwem ley ɗaɗi koole tan, ɓe mbuurtini ɗum yaasin; ɓe kiirsiɗum, ɓe kutti, ɓe cenndi tan ɓe itti baka buugalel ɓe kokki ɗum. Tan kam du nde hemnoo bakam fu fiiri furr! nanaa na yaha.
Tijjaani Ba