Waɗiino e jamaanuuji, Alla hokku en jamaanuuji lobbi. Sukaaɓe ɗiɗo njaadannoo. Wari nyannde gom ɓe ndewi debbo neejo na yaha weendu. Ɓe njottinoo ɓulli ni debbo neejo itti ndiyam heɓa wiccoo.

Neyyel fuɗɗi wiccaade. Muuyi yigganeede kunkuurum. Heddii noddi suka gooto: "Hey, cukalel, war yigganam." Suka debbo ndaari kunkuuru neyyel faa wooɗi de siiɓii: "Kay, min kaa mi yiggataa kunkuuru tuunundu ndu. Ndaa ndu wa'i!"

Deel neyyel waɗi ba nanay fay gootum. O wi'i suka ɗiɗaɓo o, wara yiggana o. Cukalel wari. Na yigga. Na yigga. O yoppi o wi'i maama, kunkuuru maa luuro waɗi. Neyyel jaabii: " Ɗume woni toon ? O wi'i ɓiɓɓe polle. Neyyel wi'i ittu ɓiɓɓe polle ɗeen waddu.

Cukalel itti ɓiɓɓe polle hokki deel neyyel de fuɗɗiti yiggude. Ni na yigga. O watti o wi'i kunkuuru maa waɗii luuro, maama. Neyyel jaabii: " Ɗume woni toon ? O wi'i yo gawri muutiri nji'um toon. Neyyel wi'i ittu ndi waddu.

Heddii o nokki gawri ndi o hokki deel neyyel. Neyyel itti gabbe muutiri ndi runni cukalel ngel de wi'i ngel: "Cukalel, a anndi koo weendu ndu na nyanngi. Ko hewtii ma fu, ittaa wabbere wootere paɗɗaa. Alla jaɓii a heddataako. Ni deel neyyel dilli. Sukaaɓe ɓe du adi laawol wuro.

Illa cukaloy mboɗɗaaki ni ɓoy nji'i peeƴal na ɗuuti ɓoy. Peeƴal fuuntunoo e maɓɓe ni cukalel itti wabbere muutiri faɗɗi. Ni wuumoore diri ommbi, heedi hakkunde maɓɓe e peeƴal. Heddii ɓe ndaɗiri nih. Ni na ɓe njaha. Ɓe ngari ɓe ceeki ladde heɓa ɓe njottilawoo wuro. Jaka ɗo ɓe ndewi ɗo, ɓunndu woni ɗoon de ɓe anndaa. Huɗo uddi hunnduko ɓunndu fu. Ɓe njottinoo ni ɓe mboɓɓii nder ɓunndu.

Walaa fu ko walaa nder ɓunndu. Ko hulataa Alla tan won walaa toon. A anndaa, bolle ɗe luwe ɓuri ɗudde naa laddeeji ndafaaɗi mboɓɓiiɗi toon ɓuri ɗudde. Ɗo ɓe ndaari fu, hunnduko aarii heɓa moɗa ɓe. Cukalel itti wabbere muutiri wootere faɗɗi. Ni ɗum faɗɗaa yaasi ɓunndu. Jaadom du heddii nder ɓunndu, boneeji nyaami ɗum.

Ndelle so suka yeddii mawɗo ni mimsitan.