Waɗiino e jamaanuuji, jaadiraaɓe tato. Ɓe mbi'i ɓe tewtowan anndal e kanŋe. Fini nyannde gom ɓe ndilli. Gooto maɓɓe reedu yoppidi deekum. Ɓe njottii ɗo Moodibbo mawɗo. Ɓe ndarii ɓe njanngi faa ɓe timmini. Wari ɓe naatondiri e tewtiiru kanŋe. Ɓe tewtiri duuɓi. Mono e maɓɓe fu heɓi ko Alla hokki ɗum. Ɓee keɓi ɓoɗe kanŋe seeɗa, o heɓi ɓoɗe kanŋe ɗuɗɗe.

Gaɗa jaadiraaɓe tato ɓe, keɓii ko njahannoo, mbi'i kootan wuro. Ɓe adi laawol. Ɓe njottinoo hakkundeeji fu, gooto maɓɓe wi'i ɓe panta gorko mawɗo na woni faro ɗoon, ɓe ɗaɓɓa anndal ɓe ɓeeda. Heddii ɗiɗooɓe ɓe ɗootiri o faa o doomi wuro gorko mawɗo, de cakitii mbi'i njottataako. O wi'i ɓe njottoo gorko mawɗo o, ko ɓe keɓan anndal ɓe ɓeeda Alla e anndal heƴataa; ɗiɗo ɓe calii. Kanko kaa o yottowii gorko mawɗo.

Suka gorko yottodii ɓoɗe kanŋe tati. O wi'i: "Gorko mawɗo, mi waraanaa heɓa kollaa kam ko nafata kam saboo ko nji'ataa so a jooɗoke ɗum, fay ndarii-mi mi yi'ataa ɗum." Gorko mawɗo wi'i o hokka ɗum hoore junngo. Suka gorko hokki ɓoddere kanŋe. Gorko mawɗo wi'i o, ɗo naange hiiri o fu, o waala toon. Suka gorko watti hokki ɓoddere kanŋe. Gorko mawɗo wi'i o, ɗiɗaɓal majjum, o terma faamitaade huunde fadde makko wadde ko o watta fu. Suka gorko itti ɓodere kanŋe hokki o gadi. Gorko mawɗo jaɓi ɓoddere kanŋe loowi de wi'i o, tataɓal majjum, ko ngarɗaa heɓa ngaɗa fu, ta waaru ɗum ɓeernde, ta waaru ɗum harugu, accu taƴoraa.

Heddii o yeƴii ɗo jaadiraaɓe makko. Sukaaɓe men worɓe adi laawol wuro muɓɓoy. Nanaa na ɓe njaha. Ɓe njehi faa naange warowi saami ɓe. Suka gorko tataɓo o wi'i ɓe ndaroo ɓe tewta ɗo ɓe mbaala. Ɗiɗo ɓe calii. Taaɓii. Kanko du o jippini kineeji makko, o waali ɗoon.

Weetunoo, suka gorko adi laawol. Wari o tawi jaadiko gooto na maayi e laawol, ɗiɗaɓo o na nyonoo ɗum. O ƴami ko saabii. Wi'aa o meemti. Ɓe mballondiri ɓe mooɓi mayɗo o. Ni ɓe anti laawol maɓɓe. Na ɓe njaha. Ɓe njehi faa ɓooyi. Wari na ɓe paama sonnyo. Jaadiiko wi'i o wara ɓe kumpitowoo ko woni. O salii. O holli ko gorko mawɗo wi'unoo o. Oo to, jaabii wi'i: "Gorko mawɗo o le wanaa hiilu ma jaɓi jawdi maa." Heddii o seli heɓa o humpitowoo ɗume saabii sonnyo ngo. O yottinoo fu, o tawi rawaandu ladde rimi. Fadde makko e doggude, tawi rawaandu ladde waɗɗoke o waddii e leydi. Nih o maayiri kanko du.

Heddii suka gorko men hawrondini ɓoɗe kanŋe e dewte maɓɓe ɓeedi ko mum ronndii. Ni na o yaha faa o doomi wuro makko. Tawi futuro warii. O jippini gineeji heɓa jennga de o yottoo ɓaade makko.

Jemma jenngunoo ni suka gorko men yottii ɓaadem. O tawi suka gorko na fukkii na samndii deekiiko. Nde wootere o faɗɗi gineeji ɗi o ronndinoo de o soorti laɓi heɓa o soppa suka gorko. Heddii o miccitii ko gorko mawɗo wi'unoo o: ko o wari heɓa o waɗa fu, o terma faamitaade tay. Ni o meemi hoore deekiiko. Debbo harbitii darii dow. O ƴami ɗum moy fukkii ɗakkol mum. Debbo haalani o: "Reedu ndu njoppunoɗaa ndu, luttaa rimaa. Ɓiɗɗo oon fukkii nih."

Nih o faamiri koo tindinooje gorko mawɗo o, nanngii o. Ndelle ko mawɗo jooɗotoo yi'a ɗum, suka ndariiɗo yi'ataa ɗum.