Waɗiino e jamaanuuji, Alla hokku en jamaanuuji lobbi. Jinni njoginoo garuwal muɓɓoy nder ladde yuurummbereere. Nde hiiri fu ɓe ndilla ɓe njoppa garuwal ngal, de ɓe mbaancowoo faa jennga de ɓe ngarta. Walaa fu nyaamdu ndu ɓe ngalaa nder garuwal ngal.

Worndi noon faa ɓooyi. Nyannde gom bojel wari faamani nyaamdu jinni ɗi. O yehi o memi omtude dammugal garuwal o hunngorii. Wari o heɓi hakkillo. O wi'i o moggoto o heɗoo jinni ɗi ngarta; so ngarii na naata ni o annditan to dammbugal heedi. Ndeen o wartonowan nyaamdu jinni ɗi.

Ni bojel moggii gaɗa garuwal. Nanaa jinni na ngara. Njottinoo ni mbi'i: "Garu yaynu, garu yay yay." Ni garuwal yayni, omtii, jinni naati. Ɓe ngarnoo heɓa ɓe ndilla ni ɓe mbi'i: "Garu niɓɓu, garu niɓ niɓ."

Gaɗa nyanndem, de jemma wari faa jinni ndilli fu, bojel yottoo wi'a: "Garu yaynu, garu yay yay." Ni garuwal omtoo. Bojel naata nyaama faa haara, de itta nyaamdu yaarana wurooɓem. Ni wuytoo faa wuytodoo de wi'a: " Garu niɓɓu, garu niɓ niɓ." Ni garuwal ommboo.

Njuuraa walaa fu ko waɗay de heɓay ko nyaama. Yehiino nder hoggooji waɗitii ɓinagge. Fu waɗay heɓa nyaamdu heɓee.

Njuuraa warowi taykii koo ɗo rafo ngo woodi ɗo fu, bojel e koreejim yo payu. Narndaa ba hitaande rafo fe. Ndelle njuuraa yehi ɗo bojel heɓa faamitowoo ko woni. Bojel wi'i: "Njuuro, so ngoonga ni won ɗo njiitum na mi yaha jemma jemma. So neɗɗo yehii toon tawan sifaaji nyaamduuji ɗi ngalanaa reere. De so mi hollii ma ni a waɗan nanngeɗen."

Heddii njuuraa yamiri bojel saabe Alla. Bojel jaɓay. Nde subaka Alla fini fu, ɗo bojel njuuro woni. Yo ɗaɓugol nih. Bojel wari tawi walaa fu no waɗa. Jemma warnoo ni ardini njuuro. Ɓe ndewondiri faa e garuwal jinni. O holli njuuraa ko jey wadde so na haajaa naatude maa wuytaade garuwal jinni. O wi'i: "Heɗa faa wooɗa, njuuro. So a doomii dammbugal ngal ni mbi'aa garu yaynu, garu yay yay. Garuwal ngal yaynan. Naataa nyaamaa faa kaaraa de ittaa nyaamdu njaaranaa koreeji maa. So a anndii koo a wuytoke garuwal ngal, mbi'aa garu niɓu, garu niɓ, niɓ. Garuwal ommboo, taaɓoɗaa. A nanii na njuuro ?" Njuuraa wi'i nani.

Nyanndem ɓe keddii ɓe ndewondiri ɓe naati nder garuwal ngal. Ɓe nyaami faa ɓe kaari de ɓe mbuytii. Jaangoorem jemma, nanaa njuuraa na wara. Yottinoo tiinde garuwal ni wi'i: "Garu yaynu, garu yay yay." Ni garuwal yayni. Njuuraa naati. Yo nyaamɗe nih. Nde o haarunoo fu, o yeggiti koo leeɓanaa o wuytoo de o wi'a garu niɓu, garu niɓ niɓ. Kanko kaa nder garuwal toon o heddii de na o jogorii garu niɓɓu, garu niɓ niɓ. Ni garuwal na niɓɓina, ni na niɓɓina, faa ommbodii fu. Tawraa noon faa jom garuwal en ngarowi ngarti.

Jinni njottinoo ni mbi'i ko mboowunoo wi'ude. Ni garuwal waɗi ko woowunoo. Omtii. Ni jinni naati. Njuuraa naati e gineeji suuɗii. Jinni njooɗii na ƴakka teewu. Cukalel togosel tawaa ɗoon wi'i: "Inna, teewu ngu kokkuɗaa kam ngu yo heewu ƴi'e." Inniiko jaabii wi'i so heewu ƴi'e ni o faɗɗa de o itta teewuure wonnde. Njuura tawaa na suuɗii nder gineeji ɗakkol cukalel ngeel na soonoo: "Cukalel, a yiɗaa ƴi'e ni paɗɗaa kam ga, min na mi yiɗi ƴi'e."

Ɓinngel jinnaaru wi'i innam koo goɗɗo soonotoo koo ƴi'e yiɗi faɗɗaneede. Jinni kawriti mbi'di nde wootere, koo ko cukalel ngel wi'i ɗum wanaa ngoonga. Walaa fu no goɗɗo naatiri nder garuwal sakko kam ɗaɓɓata ƴi'e. Ni watti ɓii jinnaaru wi'i: "Inna, min yaa, mi waaway ƴakkude teewu ngu. Yo ƴi'e. Mi faɗɗan ngu." Ni njuuraa watti na soonoo: "Cukalel, a yiɗaa ƴi'e ni paɗɗaa kam ga, koo min na mi yiɗi ƴi'e." Ni cukalel watti haalani innam. Inniiko humpiti jinni ko ɓiyum wi'i. Jinni ngatti njaɓanay ngel. Ɓoy mbi'i illa garuwal ngal nyiɓaa, janano annday tiiri sakko kanyum naatata ngal.

Cukalel ƴamitii no watta heɓa faamee ko ɗum fenataa. Heddii o yiiti hakkillo. O wi'i: "Moy haajaa teewu, nootoo faa toowa ?" Njuuraa faamay ni jaabii wi'i: " Miin!" Njuuraa yeggitii koo suuɗino. Heddii jinni kawriti nanngi njuuraa, tappi ɗum faa feewi.

Ndelle Alla hiinu en sarli eelgal.