Waɗiino e jamaanuuji, yimɓe ɗiɗo njaadannooɓe. Dagu no o yiɗiri oo to nih, oon du wanyiri ɗum. Na worndi noon. Weetii fu yidde o, yo ɓeedoto. Ngayngu oo to du yo noon ta noon.

Nyannde gom ɓe njehi ɗo moodibbo ɓe tewtowa du'aa'u heɓa ɓe ndanya. Ɓe njottinoo ni moodibbo winndi dalliili hokki ɓe. O wi'i ɓe daliili o, nanngataa ngonɗo hiila. Heddii o wi'i ɓe ceeda nyanndem. Oo wiita gorgal, oo to wiita lettugal. Mbiituɗo lettugal o won njiɗɗo jaadom. Oon won laaɓa ɓeerndeejo. Mbiituɗo gorgal o won jom ngayngu. Kam wanyi jaadom de hollinay. Ndelle kam won jammbuujo.

Mbiituɗo lettugal o, yehi, yehi faa naange hiiri ɗum. O warowi o yii ɓokki makki njogiiki luuro. Gaɗa jemma jenngii ni o naati e luuro ɗoon heɓa o waala. Jaka dow ɓokki ki, ɓiɓɓe ladde, bonngel e lobbel fu mbaalata. Fu ngartiri gootel gootel. Ɗii pukkii e leydi, ɗii to koɗi dow ɓokki kiin. Pooli won ko hoɗi dow. To ɗi ngoni to yo ɗi kiiran.

Haala waddi haala ni wooturu majji wi'i: "So ngoonga ni wuro maaniiwo na ɗomɗi hannde. Na mi anndi no ngo watta de ndiyam hoya ngo de mi haalantaa yimɓe maggo, goɗɗo haalantaa ɓoy." Foondu wooturu ƴamtinii haala ka. O fiirtanaa haala: "Hayre woni gaɗa ɓaade kaananke wuro ngoon. Hayre nde yo hunnduko ɓunndu ommbi. So nde fottinaama, ndiyam ɓunndu ndu hantataako e bada."

Ni foondu wonndu jaabii wi'i: "Bumɗo na woni wuro lettugaawo to hannde. Ko foti o jawdi walaa. Na mi anndi ko wumtinta o de mi haalanoytaa o, goɗɗo haalanoytaa o." Wi'aa ɗume wumtinta o. O jaabii o wi'i: "On nji'ii ɓokki ki ngonɗen dow mum ki, nde o uraa haako makki fu o wumtan." Worndinoo faa weeti.

Weetunoo ni gorko men wurtii ɗo wonnoo. O yehi o weeranowi kaananke wuro ɗomɗungo ngo. O yottinoo ni o waɗi yimɓe kawrondinaa. O waali na o waajoo ɓe. Rewnoo faa weeti ni kaananke wi'i du'aa'u ɗaɓata o. O wi'i du'aa'u ɗume. Kaananke itti fillii. O wi'i ɗomka haajaa warude o, kanko o yimɓe makko. Beero men wi'i ɗuum walaa e du'aa'u. O nodda maccuɓe nayo o wadda. Maccuɓe ngari. O sappii ɓoy hayre. Ɓe pottine kaaja. Jaka kaaja yo hunnduko ɓunndu ommbunoo. Kaaja na fottinee, diyam na fusa. Nano e nyaamo fu yo liƴƴi pittata.

Gaɗa kaananke heɓii ɓunndu heewundu ndiyam ni ɓeerndem welii. O waɗi gorko men hokkoraa na'i hemnde, baali hemnde e be'i hemnde. Ni o ɗaɓɓi laawol heɓa o hoota.

Gorko men riiwi jawdim taaɓodii. O dilliri wuro lettugaawo. O yottinoo ni o jippanii gorko bumɗo o. Jawdim walanaa reere. O waali na o waajoo mbumndi e koreejim faa weeti. Weetunoo ni mbumndi men wi'i: "Nani na'i hemnde, baali e be'i hemnde, surbaaɓe hemnde. Aan jey so a waawii a waɗii du'aa'u mi wumtii."

Tawi gorko men ittiino haako ɓogga luuro na loowi. O waɗi baaniye waddaa. O itti ƴulɓe o watti e heeɗoore. O wi'i mbumndi men usoo. Mbumndi usii. Ni gite peertii. Gorko men suɓii surbaaɓe tato ɓurɓe wodde, riiwi na'im, baalim e be'im de adi laawol wuro bammum.

Gorko men dillirnooɗo lettugal, ɗuum won jom jammbu o, yiiltowoke faa tampi. Gaɗa heɓay fay gootum, ni wi'i wartan. Kam du adi laawol wuro. Wanaa ko heɓay fay gootum ɗum waani o, o woyataanaa ta jaadiiko o, heɓowa goɗɗum. Wari ɓe kawri. Jawdi lettugaajo walanaa kaddi. Gorgaajo heɓay fay gootum.

Heddii jaadiyo dillirnooɗo lettugal o wi'i: "En ɗaɓɓiino du'aa'u faddemen dillude tewtiiru jawdi. En ndillii. Mi heɓowii du so ngoonga. Mi waɗan jawdi am ndi ngeɗuuji tati. Aan ngeɗu ngootu, moodibbo men ngeɗu ngootu, min du mi ada ngeɗu ngootu." No jaadiyo o, hiriri de wi'i yiɗaa ngeɗu. Haajaakanaa o holla ɗum no o waɗi de o heɓowi jawdi ndi. Oon du ittii fillii. Naa gorko men na yaha. Dillirii lettugal. Oo to du heddii yottii nder wuro.

Naange hiirunoo ni gorko jammbuujo yottii ɓogga luuro. O naati nder luuro ɗoon. Rewnoo faa jenngi ni pooli ngari keewi dow ɓokki ɗoon. Ɗi ƴuuri lettugal, ɗi ƴuuri gorgal. Duko tan. Wooturu yoppi wi'i ɓii-aadama luuɓata ɗum. Ɓe njeddondiri faa ɓooyi. Foondu wooturu wi'i jippoto ndaara. Ndu ndaari faa ndu ndaari nder luuro ɓokki. Nanaa ɓii-aadama oon na suuɗii. Heddii ɗi mbuytini o, ɗi ceeli o, ɗi nyaami.

Ndelle ta bonu e jaado maa.