Waɗiino e jamaanuuji, Namaa e Ru. Ɓe ndimi ɓiiɓe na wi'ee Kanaana. Kanaana tawaama yo mawɗo, Alla ɓuri mawnude. Wari yonii ko Kanaana tewtanee kaddungal. Baaba Kanaana tewtiri haabu duuɓi jeɗɗi. Inna kanaana mottiri haabu duuɓi jeegom waɗi gaaraaji palle e geese. Cannyoowo sannyiri gaaraaji ɗi duuɓi joy. Njootoowo nyootiri saaya Kanaana duuɓi nay.

Saaya kanaana nyootidaama. ƴuude haabu, rewa sannyooru yottoo nyootooru, duuɓi noogay e ɗiɗi saaya ka adi. Fini subaka saaya waraa hokkitaa baaba Kanaana. Kanaana nilanaa. Wari jaɓi saayam ɓoornii. Saaya doomi wuddu yottaaki.

Baaba Kanaana noddi kanaana. O wi'i: "Kanaana yel am, na mi yiɗi ma, na mi yiɗani ma. Mi termii heɓande ma saaya mi waaway. Jon kay no ngaɗɗaa fu na mi yarli." Kanaana wi'i so bammum yarloke ni gasii. Dillan tewtowa saaya yottiika ɗum.

Heddii kanaana dilli. O yehi. O yehi. O yehiri duuɓi tati. Nde weeti fu o yahan. Nde weeti fu o yeeyan ɗo o heɓoyta saaya njottiika o. Wari o yottii nder ladde. Ladde noddee, ladde nootoo. O taaɓii. Wari o yottii daande maayo. O wi'i walaa ɗo yehee walaa ɗo yeeƴee. Yeeso yo maayo. Caggal yo semteende. O yiɗaa goɗɗo yi'a o, yiiray o saaya. Heddii o wi'i o naatan e maayo ngo, o yooloo, o maaya heɓa o hewta hoore makko.

Maayo na daɗɗii na lalli e ladde. Sikki sakka walaa, naatuɗo ngoo maayo maayan. Ni Kanaana naati ngo. Walaa fu ko eelata so wanaa mayde. O yehi. O yehi. O yehi faa ndiyam waddi o koppi. O heddii na o yaha. O yaari balɗe jeɗɗi sakitii ndiyam waddi o wuddu. O watti o yaari balɗe jeɗɗi, o wari o tawi lugginam weendu yo ɓuytoto. Ndiyam ɓuytii faa warti o koppi. Ndeen noon o ƴeewi kammbu o wi'i: "Alla bawɗo, mi tewtii saaya njottiika kam, mi heɓay, mi tewtii yoolaade, ɗuum du mi heɓataa." Na o yottina miilo makko, foondu na moɗa o. Poola moɗi o ba cofal moɗata gabel siiniiri.

Poola moɗunoo Kanaana ni ummanii daande maayo. Yottii hoɗi. Tawi nanaa liwre na fira warde. Poola na hoɗa, liwre na jipoo e muuɗum. Liwre men moɗi poola moɗunoonga Kanaana de heddii heɗii ko warata weendu heɓa yara ndiyam, heɓa heɓa ɗuum du moɗa hebbita reedum.

Ndelle no Alla waari neɗɗo fu, ɗum yetta saboo tawan hunngataako dagum.