Waɗiino e jamaanuuji, Alla hokkor en jamaanuuji lobbi. Ndemoowo wonnoo de deekum yo kulo Alla. So ndemoowo e dukum na njaha ngesa, debbo o, hebbina loondem ndiyam, ronndoo jipinowa hakkunde gesa. Jahalleeɓe ndewa njara, ndemuɗo ɗomɗi yaha yara. Noon nih faa haala makko waraana haalee. Yeru makko e hulude Alla walaa.

Jaka ko haala kulol Alla dey-ndemoowo o, haaletee ɗum, mettii dey-koddom. Kiram ƴeenyii. Debbo kiroowo o, tewtowi mbarduɗum watti nder loonde dey ndemoowo e dullaangal mum. Dey-ndemoowo kaa yottinoo, adi loondem hebinni ndiyam dagu no e bada nih. O ronndii o joƴinoy hakkunde ngesa. Mbarduɗum soofi nder loonde e dullaangal adunaaru.

Nde naange fuɗunoo faa na'i ɓiraa ɓirdaa, ɓii debbo kiroowo oori na'im. O duri ɗi. O duri ɗi faa naannge ɓantii. O doomunoo ngesa ndemoowo ni o dogani loonde. O yari fa o ɗomɗiti de o sakitii o jooti ndemoowo e koreejim. Illa jootiiru yottaaki, duroowo men fuɗɗi ɓoylagol. Yo tuutan yo bawlan. Ni foortowii e leydi na talloo. Yo ottan yo uuman. Ndeen ndemoowo e koreejim annditi koo yo o naawete. Fu ndoggi ngari kawri dow hoore makko. Jom ngesa ƴami o ko hewtii o. O itti o fillii. O wi'i yo ndiyam loonde nde, o facci o yari de naawu ummorii o. Duroowo na haalda, na maaya.

Nde wootere ni dey ndemoowo fii nyonaango: "Wuy mi boni! Ɓi neɗɗo maani e neɗɗo maani maayii." Dey ndemoowo nyittoto yo fiifoto. Nyilɓere ga, gomngol ga. Duroowo o, yo ɓii jaadiiko. Narndanii o ba halal makko. O wullan o deƴataa.

Ba neɓtan ni adunaaru diri hawri. Wurooɓe nilanaama faa ngari. Inna mayɗo o du warii. Tawnoo ɓiyum na waalii ni fii nyonaago. Wi'i waɗii ko mimsiti. O dawray ni o wi'i koo kanko wattunoo mbarduɗum nder loonde dey ndemoowo o. O ƴamaa ko saabii. O wi'i kanko e dey ndemoowo njaadata. Yimɓe fu yo oo to njiɗi. Fay gooto saynay o. Ɗuum waɗi de o muuyi mettinde ɓeerndem. Jaka e hoore makko heltata.

Ndelle celee kiram, saboo kiram na wanna on ko on ummanaaki.