Waɗiino e jamaanuuji, gorko mo yiɗaa suudu baaba. No o wanyiri suudu baaba de o eggi o hoɗowi feere makko nder ladde. O ɓadaaki fu wuro. No o wannyiri suudu baaba ni, noon hoore makko du yooriri. So o aawi gawri yo bogodollo fudata. So cofal makko unndoke, yo buugaali tonnyata, piira njoppa ɗum.

Yimɓe memi nannude gorko o suudu baaba, kunngorii. O hollaama koo sennditaade suudu bammum wooɗaa, o hollaama koo sennditaade nyiɓa cuuɗim kam tan wooɗaa. O memaa o hunngoraa.

Fini nyannde gom, coffal makko tonnyi pooli, daguno woorunoo nih. O wi'i o nanngan tonnyannde artiinde nde o jonnga. Tonnyannde artiinde du yo poolino. Gaɗa ngaɗii lebbi joy joy, o wi'i njonii ko ƴakkee. O tappi ɗi o wari. O hawrondini jeɗɗi foondu o tummbi e faannde makko. O jooɗii na o junca. Ni na o junca. Pooloy ɓenndataa, kanko o ummataako.

Wuro woni faa lettugal wuro neɗɗo men. Molu kaananke wuro ngoon tannyi. Aduna fu naati e tewtiirum. Tewtooɓe tato ngari ɗo neɗɗo men njeeka molu kaananke. O wi'i ɓe o yi'ay molu kaananke, nde o yi'i o haalataa. O yiɗaa yimɓe wuro baabiiko sakko yimɓe wuro baaba goɗɗo. Haala molu le haalaaka. Haajaa wayloo molu kaananke.

Haala gorko o naawii yimɓe ɓe. Wari waylii pooɗaagu. Ɓe nyonyondiri faa ɓe liɓowi faande dekinoonde e kaatane. Koyɗe pooli njuwi ngaylii koyɗe puccu. Tewtannooɓe molu kaananke tooka. Ɓe mbi'i tilay ɓe mbara mbanyungel suudu baaba. Gooto heddii sawrini. Wi'i ɓe njaaran o ɗo kaananke. Tawi o ɓoortino saaya makko. Wi'aa o naata o heɓinoo heɓa o yaaree wuro kaankanke. O naatunoo nder suudu fu, o ɓornii saaya makko de o adi jammbere makko o wakkii. Ɓe fu ɓe ndewndiri faa e danki kaananke.

Heddii ɓe njottii ɗo kaananke. Tewtannooɓe molu kaananke itti pillii. Ɓe mbi'i ɓe tawaana gorko o na jonnga koyɗe molu. Gorko fitti faa hooti dow de yeddi. O wi'i cofal makko tonnyata pooli. O nanngi pooli to'nyannde arandeere o joongi. Kanko le o anndaa noy waɗi de koyɗe pooli makko narnditi e koyɗe molu. Illa o yottinay haala makko de hewɓe mbi'i o tappee o waree.

Kaananke wuro ɗaɓɓi cawraaku, de wi'i yimɓe kettinoo. Heddii o ƴami suudu baaba neɗɗel. Gorko haali. Suudu baabiiko nilanaa wari. Neɗɗel haɓɓitowaa waddaa. Filla fillaa faa yottii. Yaafaaji ɗaɓɓaa. Kaananke wi'i: "Saabu suudu bammaa de a warataake. Umma rewu ɓe hootu." Ɗo o wari heɓa o ummoo ɗo hore makko fii leggal danki kaananke. Leggal heli ɗisowii e yitere kaananke nande. Nde footere ni yimɓe caami e makko tappi o mbari.

Ngol taalol hollataanaa koo yimɓe leeɓaa ndewtondira bonde. Leeɓaanaa cuurondira dagu no suudu baaba muy runoo suurirde neɗɗo bonɗo o nih.