Waɗiino e jamaanuuji, debbo wondunoo e gorum. Debbo o yo yiɗu doggude. Goriiko tindini o hunngii. Fini nyannde gom o muuyi doggude. Tawi esiiko du sumii kaataarem tami cumcumte. Suka debbo itti cumcumte tati haɓɓi dillidi. Nih wonnoo doggii.

Suka debbo yehi, yehi faa naange wari saami. Jemma wari jenngi. O yehi faa o wari o somi. Ndeen noon o wi'i o ƴeenyan lekki, o fukkoo dow mum faa ɗo weeti. Ni o ƴeenyi e lekki. O itti wudere makko o haɓɓitii e leccungal ta o boɓɓoo.

Suka debbo warnoo heɓa fuɗɗa ɗoyɗi ni nani sonnyo. O ndaari wooɗi, o tawi yo rawaandu ladde. Kullol ƴeenyi o. Rawaandu yottinoo rotere lekki fu fukkii ɗoon. Suka debbo warowi muuyi jippagol. Anndaa fu no watta. Heddii o itti kaataare wootere o yoppi saami. Rawaandu harii kaataare moɗi; ɓooyay ni boɓɓii.

Illa rawaandu men moɗunoo kaataare nde fitaaki. Debbo o, to woni dow leccungal to, yo ƴamitoto salle ndu waatu naa, na ndu heddii na ndu wuuri. O heli leggal o faɗɗi ndu. Rawaandu ladde lataaki sakko ummoto. O watti o heli leggal o faɗɗi ndu. Watti ndu lataaki sakko ndu ummoto. Tataɓal nde, suka debbo faamii ko ndu wuuraa. Heddii o jippii, o fuɗɗiti yaadu makko.

Suka debbo warowi yottii tiinde maayo. O memi feƴƴude maayo o hunngii. Warowi o itti kaataare wootere o faɗɗi. Ni o heɓi laawol o feƴƴi. Ni na o yaha. O yahunoo faa o woɗɗii ni o lalli laawol. O ndaari nano o ndaari nyaamo. Walaa fu no o waɗay, o waaway o yiiti laawol. O fii ɓalinngo. O mummi gite makko. O mummitinnoo ɗe fu o yi'i debbo neejo metta yi'ideejo na jooɗi.

Neyyel walaa nyiiƴe, walaa ngaasa, koyɗem mbooɗaa. Hakkunde kunkuuru makko tan tomotte waawi ndaarude. Toon du yo tooroode sengii. Suka debbo huli, na foofa runnataa. Neyyel ƴami suka debbo ko foti waddude ɗum nder ladde yuurummbereere. O wi'i goriiko o doggi. Neyyel ƴami o kanko e moy ngondi nder ladde yuurummbereere nde. O wi'i yo kanko e Alla. Neyyel wi'i o wanaa kanko e Alla tan. Yo kanko e Alla e seyɗaani.

Kulol watti ƴeenyi suka debbo. Ɗoon noon o yiiti hakkillo o itti kaataare tataɓerde nde o faɗɗi. Ndeen o heɓi o yi'i gorko neejo giɗɗo Alla. Gorko oon soggi o yaari wuro de wi'i o tinnoo ta o dogga gasin.