Waɗiino e jamaanuuji, duroowo e deekum. Caara naati na'i maɓɓe hanti. Ɓe mbuytii ladde ɓe naati nder saare. Wari ɓe keɓi ɓiɗɗo gooto. Baabiiko laɓi o Pewel.

Nyalaaɗe na njaha na ngarta. Pewel wari mawni. Alla resi en reeni en ni baabiyo warowi maayi. Nde baabiyo o mooɓanoo, faa yimɓe kooti naati e golleeji muɓɓoy, inna Pewel nanngi ɗiɗim. Yo wullan deƴataa. Pewel ƴami innam ko saabii de na wulla deƴataa. Inna Pewel wi'i na woodi ko saabii de na wulla deƴataa. So Pewel du anndiino ɗuum ni wullan. Pewel ƴami innam ɗume won ɗuum. Inniyo jaabi wi'i: "Pewel yel am, walaa fu ko bammaa yoppidi en so wanaa puccu laccol." Pewel jaabii wi'i nde bammum wuurunoo du walaa ko ɓe njoginoo so wanaa nguun puccu.

Inniyo watti jaabii haala. O wi'i: "Pewel yel am, bammaa fewre waawunoo. Fewrem wuurnunoo ɓaade men, wuurni ɓaade moodibbo e wuro moyti-moodibbo." Pewel wi'i ta innam hula. Inniyo wi'i hulan saboo ko hulɓinii yi'i. Fewre wuurnunoo ɗum, penannooɗo maayii. Pewel wi'i: "Inna, min Pewel na mi ɓuri ba wawde fewre. So Alla jaɓii du fewre am njogoto en faa njogowoo ɓaade moodibbo e ɓaade moyti-moodibbo."

Heddii nde ngarooɓe njoota mayde baaba Pewel ngarnoo faa Pewel faamii koo goɗɗo fu wartaa gadi, ɗum ummii, ɗum soki puccu ngootu ngoodaangu nguun, o waɗɗii ɗum o dilli. Nde o dillannoo ndeen o wi'i inniiko, ko so Alla jaɓii, o hollan ɗum koo na o ɓuri baabiiko wawde fewre. O ɓotti darga puccu nguun o watti e bootooru.

Heddii Pewel dillunoo ni jippanowii kaananke wuro manngo. O jikkanaa. Ɓe kiirtodinoo fu na ɓe kiira. Pewel yoppi wi'i kaananke koo puccu jogii, de puccu ngu kanŋe e cardi rubbitata. Kaananke wi'i noon na! O wi'i noon. Kaananke wi'i so finii ni ndaaran ko puccu nguun rubbiti. Pewel wi'i laawol mum juutu, ndelle puccum tampu. Ngu rubbitan cardi e kanŋe de hasaaki ɗuuɗira dagu no e bada nih. Kaananke wi'i ɗuum walaa baasi. No cardi ndubbitaandi e kanŋe ndubtaaɗo pamɗiroy fu, haɗata kam kaa soodan puccu ngu.

Rewnoo faa jenngi, Pewel soosii yuppowi bootoorum ɗakkol tonteere puccum. O jilli ɗoon kanŋe seeɗa e cardi seeɗa.

Weetii. Kaananke ummanii puccu Pewel heɓa ndaara yalle comndi laawol haɗɗay ngu wadde ko ngu woowunoo, so rubbitinde kanŋe e cardi. Kaananke yottii tawi nani ɓoddere kanŋe. Nanaa mbuuɗu cardi. Kaananke heddii geli puccu. O wii o soodan ngu. Pewel jaabii o koo puccu ndubbitoowu kanŋe e cardi sottataake.

Kaananke yamiri Pewel saabu Alla. Pewel jaabii wi'i walaa ɗo saabu walaa. Yeegum kaananke hokka be'i hemmde, baali hemmde, geeloobi hemnde e na'i hemnde. Kaananke wi'i jawdi mbi'aandi ndi fu, hawran illa naange ɓantaaki. Fadde naange e nyawlude fu, tawi jawdi Pewel hawrondinaama.

Fadde Pewel e riiwude jawdim, haalani kaananke no leeɓi waarude. Pewel wi'i: "Kaananke, nyiɓu suudu yaajundu, na a ɓotta dubbunɗe puccu ngu na a watta toon. So rewii faa suudu heewii, ngaɗaa omtee. Kanŋe senndee feere, cardi senndee feere, barga cenndee feere. Alla jaɓii ni a hebbinan kanŋe e cardi."

Heddii Pewel e kaananke mbaynondiri. Oo jogii puccu, oo dillidi bei, baali, geeloobi e na'i. Nde Pewel honnoo fu, waɗi koole feere feereeje: koole be'i, koole baali, koole geeloobi e koole na'i.

Kaananke lutti waɗi suudu mawndu yaajundu nyiɓaa. Nde weeti fu darga puccu ɓootee wattee nder suudu de ommbonoogo ommbee faa wooɗa. Kaananke warowi waɗi suudu omtaa, darga puccu ƴaraa. Kanŋe tawaaka, cardi tawaaka.

Kaananke wi'i ɗo Pewel tawaa fu, yiitowee waddee. Waddee heɓa hirsee. Nilaade njehi lettugal njehi gorkal. Pewel wari faami ko kaananke haajanaa ɗum. O fini subaka o waɗi mbe'eewa hirsaa, looturum ittaa. O adi looturu ndu o loowi ƴiiƴam faa heewi de o wi'i inniiko jaɓa ndu waɗa koɗol. Heddii inniiko yedday. O wi'i ɗum ɓe njahan wuro kaananke. So Alla waɗii ɓe njottoke ɗo kaananke, o yuwal looturu ndu. Inniko boɓɓoo heɓa wi'ee kanko wari ɗum.

Pewel e innam ummanii wuro kaananke. Ɓe njottii ɓe kooni kaananke. Kaananke wi'i walaa ko waɗa hooniiru maɓɓe. Pewel wi'i so kaananke walaa ko waɗa hooniirum ni waritoto de innam artotoo wara. Kaananke jaabii wi'i koo ɗuum waannay ɗum. Fadde kaananke e yottinde haalam fu, tawi Pewel waɗii daande innam laɓi. Inniyo fitti bobbii. ƴiiƴam wubban, darataako. Yimɓe ndiri kawri. Kananke ƴamitii ko jey wadde Pewel. Pewel fenii sonniri o puccu lacol ngu rubbitataa kanŋe. Pewel warii innam. Wi'aa Pewel waree. Yimɓe fu na ndaaraa Pewel.

Pewel juwi fitti bobbii; itti leydi saaki; jali huuɓi. O wi'i: "Kaananke, so a haaja warude kam ni mbaraa kam. Fay gooto felataama. De ta felam saabu mi waɗii inna am laɓi. So mi muuyii o ummoto. Kaananke wi'i Pewel muuya. Heddii Pewel meemi innam. Nanngi junngom nano faɗɗi, nanngi junngom nyaamo faɗɗi, de naatondiri e ŋemagol. Ba neɓtan seeɗa ni inniyo ummii darii.

Nde inna Pewel fintunoo fu, kaananke beegaa. O ƴami Pewel no waɗi de mayɗo o finti. Pewel wi'i yo basi jogii. Basi ki walaa ko sawrata faa e mayde. Kaananke wi'i na yiɗi basi mayde. Pewel wi'i basi ki, yo ɓuji hemnde, e ɓeeɗi hemnde jaɓitee. Kaananke wi'i ɗum tiiɗaa. O kokki Pewel jawdi ndiin de o jaɓi basi mayde kiin.

Pewel hooti. Kaananke lutti waɗi tubal fiyaa. Aduna diri hawri. Kaananke itti fillii. O wi'i: "Suudu baaba, mi heɓii ko tiiɗi heɓude. Mi heɓaanaa basi mayde, ki walaa sikki sakka." Yimɓeeje laa'ini. Wa'ani kaananke ba ko wi'i ɗum jamnaaki yimɓe. Ndeen noon o wi'i cikkitinɗo fu hejja wara wuro makko. O waɗan woɓɓe mbaree de o waɗa ɓoy ƴuuta.

Nde weetunoo fu, adunaaru diri hawri. Kaananke waɗi korsuɗom hirsaa. Yimɓe laa'ini. O waɗi hammadi makko kirsaa. Yimɓe laa'ini. O watti o waɗi minyiraaɓem njoyo kirsaa. O waɗi kirsaaɓe limaa. Ɓe tawaa ɓe njeɗɗo. Kaananke wi'i so Alla jaɓii ni ɓe njeɗɗo fu ɓe ƴuutan. Yimɓeeje puttini gitte. Mono fu na ndaara ko laamiiɗo watta.

Kaananke waɗi booto basi waddaa. O waɗi basi. Korsuɗo makko ƴuutay. O enndi ɗow hammadi. Kam du ƴuutay. O memi, o memmemti, o waaway. Njeɗɗo ɓii-aadama remmbe na pukkii. Fu yo mayɓe. Laamiiɗo leydi wari ɓoy taadu hokkaama basi mayde. Kaananke hunnginoo ƴuutinde ɓe fu, waɗi ɓe mooɓowaa de itti nilaaɗe njaha ngaddowa Pewel. Ba neeɓan seeɗa, ni nilaaɗe ngaɗɗe capanɗe jeɗɗi e jeɗɗi ummii. Fu yo Pewel tewnata.

Illa ɓooyay, nilaaɓe ngaddi Pewel. Kaananke wi'i, no Pewel duppiri ɗum yiite, de Pewel ta accee omta hunnduko. Tawi bootooru nyootanooma. Nde Pewel yottii fu loowee nder bootooru, haɓɓee faa ɓiika de faɗɗowe hakkunde maayo. Liƴƴi ngara nyaama ɗum fa ɗo maayi. Kaananke anndunoo koo Pewel wattaama e bootooru, suɓɓii jokolɓe njeɗɗo ndillidi bootooru heɓa paɗɗowa hakkunde maayo.

Heddii Pewel ronndaa. Jokolɓe na njaha. Ɓe njehi faa ɓe ndoomowi maayo. Ɓe nji'i mbilla na laƴa. Ɓe njipini bootooru de ɓe ndewi mbilla laƴoowa. Ɗo wanaa ɗo, faa ɓe mboɗɗowii. Jokolle gooto miccitii bootooru kaananke. O yeeƴii daande weendu toon.

O doomunoo bootooru fu na o nana Pewel na ŋemoo. O ƴamtinii ɗum faa woɗi ko ŋemotoo. Pewel wi'i doolɗataakenaa ɓoornoo laamu. Kam le yiɗaa laamu. So gorko o, na yiɗi laamu fu, haɓɓita o de wara lutta e bootooru.

Jokolle men haɓɓiti bootooru. Pewel wuytii. Jokolle naati. Pewel nanngi bootooru haɓɓi de suuɗowi gaɗa wuumoore. Nanaa jokolɓe ndiwunooɓe mbilla na ngarta. Njottinoo fu ndonndii bootooru paɗɗowi hakkunde mayo. Bootooru diƴƴi. Ɓe kooti ɓe kaalanowi kaananke. Kaananke wi'i ɓe so Alla jaɓii Pewel fenantaa goɗɗo faa ɗo aduna timmi.

Alla resi en reeni en, faa leɓɓi ɗiɗi yaade tati mbaati. Pewel yehi wuro kaananke. O yottinoo fu kaananke wi'i: "Mi huni wanaa Pewel. Pewel kaa maayii ko lebbi tati ɗum." Pewel jaabii wi'i amiiru na woodi ngoonga. Ɗum maayiino ɗum ƴuuti. Kaananke ƴami salle mayɗo na ƴuuta. Pewel wi'i so mayɗo ƴuutataa du kam ya ƴuutii. De so ngoonga wanaa muuraadu waddi ɗum. To woni to so wanaa tilay e kulol gite mawɓe, bada neɗɗo muuyi dillude sakko kam wartata ɗo ƴuurunoo. Ni kaananke beegaa. Rewnoo faa Pewel annditilnoo koo fewrem naatii kaananke ni ɗum junyi kaananke jollooru. O wi'i yo maanmiraaɓe kaananke kokki kaananke waree hokkee. Kaananke jaɓi jollooru. Julli ko woni nder jollooru metti. Tawi illa rimaa heɓay ko weliri nih metti. Kaananke adi jollooru, yardi ko wonnoo nder mum fu.

Pewel waɗi kaananke hawrondini suudu baaba. Nde yimɓe kawrunoo fu, Pewel itti fillii: "Suudu baaba, maamiraaɓe e baabiraaɓe kaananke nili kam. Ɓe mbi'i mi haalana kaananke wara ɗo maɓɓe, annda no ɓe mbuurdi. So nguurndam maɓɓe nanngii hakkillom, wara haalana on, on fu ngaron." Illa Pewel yottinay ni kaananke teɓɓitii haala. O wi'i: "Suudu baaba, baabiraaɓe men e maamiraaɓe men nilanii kam. Ɓe nildii jollooru weli weli du mi yarii. Jooni, jam finii jaango ni mi dillan. Njogiiɗo nilangal fu wadda."

Heddii kaananke ƴami no waɗata de hewtowa nokkuwel. Pewel wi'i kaanaa kaananke wattee e bootooru de haɓɓee, yehee yoppowee hakkunde maayo. Kaananke wi'i ɗuum walaa baasi. Ɗum yahan, ɗum wattee e bootooru, ɗum yoppowee hakkunde maayo.

Nde Pewel anndunoo koo fewrem nanngii kaananke, wi'i won ko yeggitinnoo haalude. Kaananke wi'i ɗume gadi. Kori wanaa ko waawi bonnude jahaangal. Pewel wi'i: "Kaananke, wi'aakanaa so na a yaha to ƴuurum to, ni kalfinaa kam wuro. Tawee a seedinii suudu baaba." Ni kaananke men seedini suudu baaba ko Pewel ɗum halfini wuro. Ko ɗum waawunoo wadde nder wuro ngo, Pewel du yoppee waɗa. Heddii kaananke wattaa e bootooru yoppowaa hakkunde maayo. Pewel du lutti laamii wuro. Nilani innam du wara nyaama laamu.

Nde inniiko warnoo fu, o ƴami: "Inna faa inna lobbo, Pewel maa ɓuri fewre naa bammum ɓuri fewre ?"