Waɗiino e jamaanuuji, wojere e famndu ƴamdannoo debbo. Walaa fu ko ɓe ngaɗay. Ko o, wari hokki debbo, ɓuri ɗuum oo to warta hokka. Debbo yo jaɓan na loowa, bammum yo jaɓan. Kanŋe e cardi yo ngaran. Cogge be'i e baali yo njaaƴoto. Nih faa wari baaba debbo heɓi hakkillo. O noddi bojel e famndu o hawrondini. O wi'i ɓe, jawdi warii heewi, teddeengal waɗii. Ɓiiko debbo du, wanyaa fay gooto e maɓɓe. Debbo du hawtataake goriraaɓe ɗiɗo. Ndelle na o ɗaɓɓa bojel e famndu kawra ɓurondira gullal. Ndaɗoyɗo, kam hokketee suka debbo hoota dewlowa.

Nde baaba debbo yottinnoo daandem ni bojel fitti jali de wi'i e ɓeerndem: "Min o muuyani debbo o, de o huli yitere paaɓel. Toy famndu waawi fiidude wojere gullal!" Paaɓel yoppi ɓalinii. Fay yeesom fesaa ƴiiƴam warataa. Nyalaande gullal ittaa. Mono fu hooti wurom fadde nyalaande e finude.

Nde paaɓel hootunoo fu haalani yimɓem ko baaba debbo wi'i. Mawɓe mbi'i o yaha, o fukkina hakkillo makko, ko so Alla jaɓii ni bojel heɓataa debbo o. Ardo paaɓi itti nilangal yehi ɗo famndu woni fu. Paaɓi ndiri kawri. Daande darnaa. Wi'aa so nyalaande gullal finii, paaɓi ndewtondira faa ɗakkol sekko debbo. Paaɓi mbi'i njaɓii. Koyngal ɗiɗi faa yaha koyngal tati famndu tawete so nyalaande nde fini. Illa ɗo gullal ngal oorata faa e ɗo ngal jaaƴotoo.

Nyalaande gullal finii. Bojel e paaɓel ndardoke. Paaɓi keddiiɗi ufoke e laawol. Aduna hawrunoo fu, tubal tappaa. Gullal fuɗɗi. Bojel umminii gullal faa ɓooyii ni ndaara salle paaɓel na heddii na rewi. Famndu yoppa ɗiila faa yeeso. Nih faa ɗo bojel doomowi sekko deɓɓo. Ɗo gittem cammbi gite surbaajo daneejo, mo gitem ɓuri kosam rawnude, surbaajo daneejo mo daande mbilla o, famndu fitti dekii dow koyɗe debbo. Nde wootere ni ɓeernde bojel heli. Heddii paaɓel hokkaa subaajo daneejo o, hondi.

Ndelle so neɗɗo foti e suudu baaba, walaa ko waawaa wadde.