Waɗiino e jamaanuuji, debbo tawanoo de heɓay ɓeengu. Golleeji ɓaade fu yo kanko gollata. Kanko wuuwata, kanko ƴoogata, kanko lonnata, kanko defata, kantko teenoyta leɗɗe. Ɗo o gollata ɗo fu yo yidde e saabu Alla. Kaddule goriiko tuunataa, kaddule esiraaɓe makko tuunataa.

Wari nyannde gom debbo o fini, yehi weendu. O wartunoo fu, o tawi o liɓanaama haɓɓere leɗɗe, o dekanaama faande makko. Huunde nde haynii o. Wari o dilli cippal. O wartunoo fu, o tawi gollal ngal o woowunoo gollude, wallaa ngal o gollanaaka. Huunde nde watti haynii o. Nih faa walii lebbi. Gollal ngal o yoppi fu o warta o tawa gollaamaa.

Heddii o yehi to moodibbo heɓa o faamitowoo ko woni. O itti o fillanii ɗum. Moodibbo wi'i walaa baasi, o tewta hoore junngo o hokka ɗum ko so Alla jaɓii o faaman ko woni. Debbo men itti fiyaarem honndu hokki. Moodibbo jaɓii fiyaare loowi de wi'i: “Umma hootu. So a hoota, ndaaraa junngo nyaamo. A yi'an kaareehi makki. Ittaa hakkilowol makki ƴakkaa. So Alla jaɓii a heɓan anndude moy gollante golleeji ɗi e dullaangal maa." Debbo o ummii heɓa hoota.

O adi laawol wuro. Na o yaha. Na o yaha faa o wari o yi'i kaareehi makki. O seli o yehi kaareehi toon. O yottinoo ki ni o itti hakkilowol o muɗɗii. Na o ƴakka, dagu no moodibbo o wi'iri ni. O tawi hakkilowol ngol yo welu. O wi'i so hakko welii ni tawete heccere ɓuri welde. O itti haareere heccere o ƴakki. O tawi haareere nde ɓuri welde. O wi'i so heccere welii, e ɓenndunde le! Ni o tewti haareere ɓenndunde o ƴakki. O adi yuunuure haareere nde o hondi o wattowi e wadarde makko. Waaltunoo balɗe seeɗa fu, yuunuure nde waylii ɓii-aadama remmbe. Oon ɓii-aadma gollannoo golleeji makko ɗi. O adii suka, o waɗi ɓiiko.

Ɓiɗɗo o, tawaa yerum e wodde e jaɓude ko wi'aa walaa. Innam yaari ɗum ɗo moodibbo. Moodibbo wi'i: "Debbo, a ɓooyii a heɓay ɓeengu. Suka o, daroto darnde ɓiya. Faamu ko na o jogii mboɗa. Leeɓaa o ɗakkoo baaniye." Debbo wi'i nanii. So Alla jaɓii o yaataa ɗo baaniye woni. Debbo o laɓi ɓiyum oon Jiija.

Jiija tawaa ɗo innam faa surbinɗini. Walaa fu ɗo haala wodde makko haalataake. Faa wari kaananke leydi mawndi, ndi nyalla yaha, hiira yaha waawaa hewtude, warowi faami haalaare makko. O itti nilangal yehi to inna Jiija ɗaɓanowa o Jiija.

Nde nilangal kaananke hewtunoo inna Jiija ni ɗum wi'i: "Na mi famɗi heɓa wi'ee mi salanoke kaananke moƴƴere. Ndelle na mi daɓɓa on so Alla waɗii on kootii mballon kam kaananke faama koo so na yiɗi Jiija ni yo kam jey Jiija. O watta o faama koo jiija na jogii mboɗa: Jiija leeɓaa ɗakkoo baaniye."

Nilaaɓe kaananke kooti, kollowi daande inna Jiija. Kaananke wi'i ɗuum walaa basi. Nyalaaɗe njehi ngarti. Dewgal jiija waɗaa. O soggitaa o hooti wuro kaananke. Hiiro nyalli, waali. Dagu maggo yi'aaka illa aduna jooɗii.

Hiiro hiiraa faa timmi. Kootooɓe kooti. Ndeen noon kaananke sakiti hawrondini yimɓem, haalani ɓe ko Jiija woɗii. O wi'i du njedduɗo mboɗa o fu, o waɗan hirsee. Heddii Jiija hooraa suudum. Nyalaaɗe na njaha na ngara. Walaa ɗo yimɓe ƴuurataa na ngara na ndaara ŋari makko.

Nyannde gom kaananke wi'i gaɗa yimɓe na ngarda wurom saabu ŋari Jiija ni gure de fu kaalanee koo kawrital na woodi wuro maɓɓe ɗoon. Kaajaaɗo yi'ude Jiija fu wara nyaanndem saboo gaɗa ndeen nyalaande o accata yimɓe na naatira ɓaade makko no kaajoraa taadu koo Jiija kaajaa yi'ude. Kaananke waɗi nyaamduuji feere feereeji ndefanaa werɓe. Nder ndefu ɗoon, bullaalii ummii. Fadde worɓe e yottaade, tawi Jiija haynodoke.

Kaananke noddi rewɓem hawrondini. O feli ɓe. Mawɓe wuro cawrini kaananke.Yimɓe ƴamondiri moy hoorata mayde Jiija. Wi'aa kooroowo mayde Jiija na tiiɗi saboo Jiija, kam tan innam joginoo, mboɗam du haalilawaama. Nduɗɗaaɗo fu hula. Kaanaan heddii wi'i hooran nilangal ngal. Ni kaananke wi'i o yaha.

Heddii kaanaan yehi wuro inna Jiija. Ngal yottinoo fu, na ngal fiiltoo suudu inna Jiija. Yimɓeeje mbi'i kaanaan wardii daande. Inna Jiija wurtii yaasi. O yi'unoo kaana ni o annditi. Jahaangal ittaa yehi wuro kaananke ƴamtinowii. Kaananke itti fillii. Inna Jiija wi'i na anndunoo tiiri. Debbo waɗanay nawlum mboɗa e bada.

Ndelle paamee koo nawliraaɓe njiɗondira. So keɓii laawol fu na mbarondir.