Waɗiino e jamaanuuji, Moodibbo wi'unoo hijjowan. Neɗɗo gomma wi'i rewan o wayloo sahiijo makko. Moodibbo salii saboo yooɓaaki nyaamdu. Sahiijo wi'i ɗuum walaa baasi.

Heddii Moodibbo e Sahiijo ndewondiri. Tawi Moodibbo men na joginoo cobbe tati na resi e gineejim. Sahiijo adi gineeji Moodibbo ronndii. Ɓe adi laawol na ɓe njaha. Wari ɓe ndafaa. Sahiijo wi'i: "Moodibbo, mi rafaama." Moodibbo wi'i: "Jippin gineeji men ɗi nde ndaaraa ley bootooru raneeru ndu, a yi'an cobbe tati. Ittu wootere heɓa ndiiben njaren."

Sahiijo itti sobbere wootere diibi. Cobbe keddii ɗiɗi. Jaka sahiijo haaray. O soosii o soorti sobbere wootere. Ba waɗan seeɗa, ni o adi sobbere heddinoonde ndeen du. Ni na ɓe njaha. Na ɓe njaha faa neeɓi. Sahiijo watti wi'i moodibbo koo rafaama. Moodibbo wi'i o jippina gineeji maɓɓe ɗi o itta sobbere wootere ɓe neemo de ɓe pukkoo ɓe pootinoo heɓa weeta. Saahiijo jippini gineeji. O tewti cobbal o ronki o yiitataa. O wi'i: "Moodibbo, sobbere fay wootere heddaaki e bootooji ɗi njiwɗaa ɗi." Moodibbo tewti cobbe yiitay. O faamii jooni kaa koo yo sahiijo genndii o.

Moodibbo joƴƴini Sahiijo de ƴamiri ɗum saabu Alla, haala so kam adi cobbe ɗiɗi keddinooɗe ɗe. Sahiijo wi'i aday. So Moodibbo na haaja ni huɗa Alla bonna aduɗo cobbe ɗe. Moodibbo wi'i huɗataa. Heddii ɓe mbaaldi.

Nde weetunoo fu, moodibbo e sahiijom adi laawol hijjoore. Ɗo ɓe njaata ɗo, ɓe nji'i koobi na ndogga. Moodibbo waɗi daliili kooba ngoota bobbii. Ɓe kirsi nga ɓe nyaami de ɓe keddi ɓe ngaɗi njooɓangu. Ɓe antunoo jahaangal maɓɓe fu, moodibbo ƴami sahiijo salle ɗum yi'ii ko o waɗi. Sahiijo wi'i: "Mi yi'ii." Moodibbo wi'i ndelle na ɗaɓɓa o, o hula Alla so kanko adi cobbe ɗiɗi ɗe ni o haala. Sahiijo wi'i Alla ƴamu ɗum aday. Moodibbo jaabii wi'i Alla ɓamu ganyo maa. Ni na ɓe njaha.

Moodibbo e sahiijo ndewndiri na njaha. Ɓe njehi faa nyalooma wari. Ɓe ndaraaki sakko ɓe njooɗoto. Naange nyalli nyanndem ba dagum nyallay e bada. Sahiijo yoppi wi'i: "Moodibbo, mi ɗomɗii." Heddii moodibbo adi sawrum fii e tuntere. Ni tuntere men fusi ndiyam. Sahiijo yari de lootii. Ɓe ngatti ɓe adi laawol hijjoore.

Ɓe njahunoo faa ɓe mboɗɗi fu, moodibbo wi'i sahiijo: "A yi'ii ko ngaɗum; unum tuntere ndiyam wubbi." Sahiijo wi'i yi'ii. Moodibbo wi'i na ɗaɓɓira o saabu Alla, so kanko adi cobbe ɗiɗi ɗe ni o haala. Sahiijo jaabi wi'i: "Moodibbo, mi aday cobbe ɗiɗi ɗe, mi anndaa anɗo ɗe. Huɗu joomum faa Alla bonna ɗum."

Ni na ɓe njaha. Moodibbo men faamii jooni kaa, koo sahiijo jaɓataa wi'ee kam soorti cobbe ɗe. Heddii murii. Nde yaadu maɓɓe woɗɗinoynoo ɓe fu, ɓe nji'i tile tati. Moodibbo o waɗi tile tati ɗe fu ngaylii tile kanŋe. O hucciti Sahiijo o ƴami: "Giɗo Alla am, tile ɗe yo tile foti ?" Sahiijo jaabii wi'i tile ɗe yo tile tati. Moodibbo wi'i noon paray.

So a yiɗi kanŋe, danyan ko kokkor-mi ma. Sahiijo wi'i na yiɗi. Moodibbo wi'i ndelle: "Tilde wootere nde yo min jey; ɗiɗaɓerde nde yo aan jey; tilde tataɓerde nde yo aan e sobbere nde njey." Nde Moodibbo haalunoo yottini fu, kulol ƴeenyi Sahiijo. Ndeen noon heɓa o ngoonɗina koo kanko adi cobbe ɗe. Moodibbo jali deƴƴinii. Gaɗa wardiinoo, Moodibbo-men yoppidi sahiijo tile tati ɗe fu, de heddii adi laawol hijjoore.

Sahiijo jooɗii na ndaara tile kanŋe tati ɗe. Goɗɗo fu hawtay o ɗe. Kanko tan yoppidaa ɗe ɗe fu. Nder ko sahiijo jooɗii ɗum yahalleeɓe ɗiɗo ngari tawi o ɗoon. Ɓe njootondiri faa jootiiru yottii kaddi. Sakitii noon sahiijo ɗaɓɓiɓe ɓe ndaarana ɗum tilem kanŋe heɓa ɗum yaha wuro ɓadiingo ngo ɗum tewtowa neema de ɗum wara. Yahalleeɓe ɓe mbi'i ɗuum walaa basi so tawii o ɓooyoytaa wuro toon. Heddii sahiijo ummanii wuro.

Nde rewnoo faa sahiijo totti, yahalleeɓe kawriti ndawridi. Ɓe mbi'i so sahiijo wartii, kanaa ɓe tappa ɗum faa fewa, de ɓe ada kanŋe ɓe konda. Tawi hakkillo bonngo dagu ngool sahiijo du jogii ley ɓeerndem. Na o miiloo soodude ko warata yahalleeɓe, o watta nyaamdu o hokkowa ɓe ɓe nyaama heɓa ɓe maaya. Noon watta de o ittataa kanŋe o, o yeɗa yahalleeɓe ɓe.

Sahiijo soodi nyaamdu nyaami faa haari de soodi ko wardoyta ndeenan ɓe ɗum tilem kanŋe, hawrondini e nyaamdu. O ronndii bone oon heɓa o hokkowa ɓe. O rewnoo faa o yottii, ɓeen kawriri o cabbi. Ɓe tappi o faa o maayi de ɓe mbi'i ɓe nyaaman fadde maɓɓe e yeɗondirde tile maɓɓe tati kanŋe. Na ɓe nyaama nyaamdu ndu, na ɓe mboɓɓoo. Ni kamɓe du ɓe mayri.

Ndelle paamee koo bonde wooɗaa.