Waɗiino e jamaanuuji, yimɓe ɗiɗo. Oo yo giɗo Alla, oo to yo keefeero. Ɓe ɗiɗo fu ley wuro wooto ɓe ngoni. Keefeero na woni gorgal wuro, giɗo Alla na woni lettugal wuro. Ko keefeero o, woni gorgal wuro to ɗum, golleeji bonɗi tan gollata. Mo o waray fu yo jawdim o teetata. Giɗo Alla o, waraa hoyɗinaa kile kewɗe koo yahan to keefeero o.

Gaɗa koyɗi ɗi keewi, giɗo Alla wi'i hannde, so Alla jaɓii, yahan to keefeero. Ni o dawani keefeero. Jaka keefeero du hoyɗinaama kile kewɗe koo giɗo Alla waran ɗo mum. Alla e giɗo Alla woowaa fantude keefeero, de anndaa toy ɓaadem woni pay pay. Heddii o tawi gorko mawɗo na jooɗii. O ƴami ɗum: "Gorko mawɗo, wuro neɗɗo maani kaajaa mi." Gorko mawɗo wi'i giɗɗo Alla ta haalda ɗum haala keefeero. Saboo keefeero waranii mo hammadi makko, waranii mo Sammbo makko; keefeero ronanii mo hammadi makko, ronanii mo Sammbo makko. Ni giɗo Alla wittii.

Giɗo Alla wari tukki debbo neejo. O wi'i ɗum: "Dem-mawɗo, wuro neɗɗo maani kaajaa mi." Dem-mawɗo jaabi wi'i o hula Alla ta o haalda ɗum haala keefeero. Saboo balɗe jeɗɗi hannde o fuɗɗiri wullude. Keefeero du saabii bojji ɗiin. Ni giɗo Alla wittii.

Gorko men warowi yiiti ɓaade keefeero. O yottinoo ɓaade ɗoon fu, o tawi kettuɓe e keefeero na ndeeni ɓaade. O itti o fillii ko waddi o. Ɓeen njaabii mbi'i: "Neɗɗo maani na ɗoon de hoyaa yi'ude. Ndelle kanaa taaɓoroɗaa yeeso. A tawan kettuɗo o toon." Ni giɗo Alla taaɓii hewtowi yeesoojo oon. O salmini ɗum. Kam du jooti o de sakitii ƴami ko waddi o. Giɗo Alla itti fillii. Kettuɗo e keefeero jaaɓii wi'i: "Ndelle aan won Addaare! Kile kewɗe mo tewtataa o, hoyɗinaama ko na a wara. Wittora suudu yeesooru. A tawan na o jooɗii na o juula tooruuje makko. So a weli hoore, o haalday ma, ta haaldu o."

Addaare hewtowi jonnde keefeero. O tawi na ɗum wirda. Tooruuje na keedi ɗum nano e nyaamo, gaɗa e yeeso. Addaare jooɗii faa neeɓi. Keefeero wari timmini juulɗem, salmini de sakitii ɓoylitii hucciti e Addaare. O ƴami: "Aan won moy?" Addaare wi'i kam won Addaare. Ndeen noon, keefeero sakitii wi'i heɗoroke o duuɓi kewɗi; laabi ngalaa kaddi na hoyɗinee o. Gasii hannde gaɗa o wari.

Ni Addaare itti fillii ko waddi ɗum. O wi'i: "Nder fewre ngoonga, mi hollaama galle lobbo mo nyiɓanaɗaa nder algenna. Min na mi anndi, aduna na anndi, Alla na anndi golleeji maa mbooɗaa. Ko saabii ndelle de nyiɓanaɗaa algenn a? Ɗuum kaajaa mi paaminaa kam."

Keefeero miilii faa neeɓi de wi'i: "Duuɓi am hannde yo capanɗe jeetati e jeetati. Illa poofum mi waɗay jam so wanaa nyannde gom, na mi ummanii teetooru. Dow laawol tawum dem - mawɗo e taaniraaɓem funeeɓe na mbulla rafo. Fay gooto e maɓɓe waawanaa hoorem. Ɗume debbo mo duuɓi cappanɗe jeɗɗi e sukaaɓe ɓe lebbi sappo e jeɗɗi mbaawi? Nyanndem tan yuurmeende ɓii-aadama remmbe naati kam. Heddii kaɓɓitil mi bootooji am, njuppum nyaamdu ndu njooɓinoo mi e ndu njoɓaninoo mi yaadiiɓe am kokku mi ɓe. Nyanndem tan anndum mi waɗii ko Alla haɗay. E miilo am so mi nyiɓanaama suudu ley algenna, ndelle yo saabu nyaamdu ndu kokkor mi dem-mawɗo o e taaniraaɓem ɓe." Heddii Addaare wi'i yo saabu ko ngaɗanɗaa dem-mawɗo o e taaniraaɓem ɓe de Alla waɗi nyiɓanadaa algena to.

Ndelle paamee, ko neɗɗo waɗani ɓii-aadama fu, yoɓtoyte so Alla jaɓii.