Waɗiino e jamaanuuji, debbo adi reedu. Lebbi sappo e joy fu o hewtay hoore makko. Nyannde o rimunoo fu, heɗaa balɗe jeɗɗi mbaalti de kaananke wari heɓa laɓa o. Suka o faamunoo koo kaananke wari fu, ummii wi'i kaananke laɓataa ɗum saboo kam wi'etee "Hakkillo am na ɓuri hakkillo kaananke." Heddii ɓe kulataa kaananke ɓe, na noddira o "Hakkillo am na ɓuri hakkillo kaananke." Innde cukalel ngel naawi kaananke, faa wari kaananke muuyi warde ngel.

Nyannde gom kaananke haaldi e mbaroowo yimɓe. O wi'i so hiirii, o warowa "Hakkillo am na ɓuri hakkillo kaananke.

Hakkillo am na ɓuri hakkillo kaananke e ɓii-kaananke njaadata. Wakkati gom kamɓe mbaaldata. Kaananke le anndaa ɗuum. Nde hiirunoo jemma fu, mbaroowo yimɓe yehi heɓa adowa mbi'ungel hakkillom na ɓuri hakkillo kaananke faɗɗowa nder ɓunndu. Alla e ngaranteeɗo oon naniino ko kaananke haajaa wadde ɗum, de nyanndem ɗum waalay nder suudu ɗoon. Nde mbaroowo yimɓe yottinoo nder suudu, kam kay yo ɓii kaananke ni ronndii yehi faɗɗowi nder ɓunndu. Heddii kaananke waaway wari Hakkillo am na ɓuri hakkillo kaananke. Nde weeti fu kaananke yo terman de waawataa.

Nih faɗo cukalel wari mawni. Kaananke wi'i gaɗa heɓay no waɗa de wara o, ni jammboyto o dooɗo mawɓe makko. Kaananke fini subaka sohi gawri muutiri hokkowi baaba cukalel ada waɗa bokkaare. Gorko mawɗo miilii faa ɓooyi; tawi walaa no waɗa. Fuɗɗi bojji. Gomɗi ga, nyilɓe to, ko yurminii ɓuray ni. Cukalel wartunoo wuro fu, tawi baabam na wulla. O ƴami: "Ko saabi de a wulla, baaba?" Baabiiko itti fillii. Heddii o wi'i baabiiko ta wulla ɗuum, saboo hakkillo makko na ɓuri hakkollo kaananke.

Hakkillo-am na ɓuri hakkillo kaananke ɓotti kaaƴe faa heewi loowi e bootooru yaadi wuro kaananke. O yottowinoo fu, o jooriɗe na o una. Kaananke wari ƴami o: "Cukalel, ko saabii de kejjuɗaa na a una kaaƴe ?" Hakkillo-am na ɓuri kakkillo kaananke jaabii wi'i haajaakanaa kaaƴe ɗe ɓula ndiyam, heɓa soonirowa gawri mbeelaari waɗa bokkaare. Kaananke ƴami o salle hayre na ɓula ndiyam. Hakkillo am na ɓuri hakkillo kaananke wi'i: " Kaaƴe ɓulataa ndiyam so unaama de kejjuɗaa mbi'u ɗaa baaba-am waɗa gawri mbeelaari bokkaare." Ni kaananke sawranii baabiiko.

Nyalaaɗe na njaha na ngarta fa ɗo kaananke heɓi hakkillo wonngo gasi. O hejji o femmbi rewɓe makko de o wi'i ɓe njaha ɗo inna cukalel moorowa ɓe.

Rewɓe kaananke ndilliri wuro baaba Hakkillo sam na ɓuri hakkillo kaananke. Ɓe njottinoo fu ɓe tawi inna Hakkillo am na ɓuri hakkillo kaananke na jooɗii. Illa ɓe kaalay ko waddi ɓe, de dem-mawɗo o, fuɗɗi di'unude. Cirwol ƴeenyilawii ɓanndum. Rewɓe itti kaali ko waddi ɓoy. Dem-mawɗo ndaari nano, ndaari nyaamo, ndaari ley, ndaari dow: walaa fu no waɗa. Bojji ngari cakitii. Gomngol ga, nyilɓere to. Ɗoon ni Hakkillo am na ɓuri hakkillo kaananke yotti. O ƴami inniiko ko saabii de na wulla. Itti fillanii o. O wi'i inniiko ta wulla ko heƴay wulleede. Alla jaɓii ni ɗum fu ɗum gasan.

Hakkillo am na ɓuri hakkillo kaananke yehi teenowi leɗɗe yaadi wuro kaananke. O yottinoo fu o jippini leɗɗe ɗe. Na damƴa ɗe; ni na o hela ɗee to. Kaananke haalanaa wari wuytii. Nde yottinoo fu ƴami ko saabi de suka gorko o na waɗa ko watta ɗum. Suka gorko jaabii wi'i: "Mi haajaakanaa mi damƴa ɗe faa ɗe ɓula neɓam mi hokkowa inna am moorira rewɓe." Kaananke wi'i o leggal ceccal du jippintaa nebam sakko leggal jo'orngal. O dogga o hoota so wanaa comndi ɓoldi o haajaa. Suka gorko wi'i: "Kaananke, wanaa comndi ɓoldi kaajaa-mi. Mi haajaakanaa hollude ma koo so leggal jo'orngal waawaa jippinde nebam, ni inna-am du waawaa moorude ko'e pemmbaaɗe."

Balɗe seeɗa ni kaananke watti heɓi hakkillo wonngo. E ngal kaa, sikki sakka walaa, o heɓan Hakkillo am na ɓuri hakkillo kaananke o waɗa hirsee. O nilani bammum. Nde gorko mawɗo warnoo fu, o wi'i ɗum o haajaakanaa o nyiɓanee suudu dow. Gorko mawɗo miili tawi ɗuum na tiiɗi. O ƴami kaananke noy o waawiri nyiɓude suudu dow. Kaananke wi'i anndaa, de o faama koo so caamal naange tawii suudu ndu, nyiɓaaka ɓiiko hirsete. Gorko mawɗo fii ɓalinngo. Ɓanndum fu yo di'unan. O ummii o hooti. O tawi ɓiiko na jooɗii; ƴami o ko saabi de na o ɓalinii. Baabiyo o itti fillii. Ɓiyum jaabii wi'i: "Baaba, so ɗuum ni mbelnaa ɓeernde maa. Hakkillo kaananke fotaa hakkillo-am sakko kam warata kam." Umma hawrondin gollitirɗi maa de njahaa mbi'aa kaananke dobbane suudu nduun koo nyimngo mayru tiiɗaama."

Baaba Hakkillo am na ɓuri hakkillo kaananke ruuɗii wuro kaananke. Yottinoo fu, wallini gineejim de jooɗii. Njedduɓe Alla kaalanoy kaananke koo suudum nduun fuɗɗaaka nyiɓeede faa hannde. Nyiɓoowo oon yo ɗoogim tefi na jooɗii. Kaananke nanunoo haala ka fu, tookaa, yehi tawowi gorko mawɗo na jooɗii. O wi'i: "Gorko mawɗo, so wanaa ko a wanyan ɓiya o yonkim fu, umma de nyiɓaa suudu ndu." Heddii gorko mawɗo jaabii wi'i: "Kaananke, mi warii mi wardii e gollitirɗi am. Jon kaa dobbanam suudu nduun heɓa mi annda ɗo gayɗe looci leeɓi waseede." Kaananke memi diidude suudu ni hunngorii; heddii wi'i gorko mawɗo hoota.

Ɓeernde kaananke metti faa ɓuri no arande. Subaka e jemma fu yo o ƴamitoto no o jey waɗude heɓa o wara mbi'ungel kam wi'etee Hakkillo am na ɓuri hakkillo kaananke. Nyalaaɗe na njaha na ngarta. Jeɗɗiije na tawtondira. Wari kaananke men yiiti hakkillo heso. O wi'i gaɗa o waawaa wardude suka o hakkillo ni o wardan ɗum semnde.

Nyannde gom kaananke nili illa fajiri mbi'unga Hakkillo-am na ɓuri hakkillo kaananke wi'etee noddee wara. So o warii, o yehee o haɓɓee faa o ŋeeta de o faɗɗee ley suudu winndeeru gaɗa ɓaade kaananke.

Suka gorko waddaa. O nannowaa suudu winndeeru. Huɗo e cankalenku ɓottaa hebbinaa dow suudu. Kaananke wi'i o yoppee nder suudu ɗoon faa nyalooma wara, tawa o somii, de ndu waree ndu wulee. Nyalooma doomunoo fu ɓiɓɓe kaananke njehi ɗakkol suudu wuleteendu ndu na pijowa. Nde Hakkillo am na ɓuri hakkillo kaananke nanannoo ɓe ni fuɗɗi na haɓitoo kam tan nder suudu: "Na mi haalana on ko mi nyaamataa nyaamdu welndu ni na on ndoolɗa kam." Sukaaɓe nanannoo o ni ndoggi ngari heɓa o hokkora ɓoy ɓoy nyaama. O jaabii ɓe o wi'i: "So na on kaajaa nyaamdu welndu ndu, kanaa ngaron kaɓɓiton kam de adon lunnde am nde." Ɓiɓɓe kaananke ngari kaɓɓiti Hakkillo am na ɓuri hakkillo kaananke. Kam noon haɓɓi ɓe faa ɓe ŋeeti de doggi wuytii. Nyalooma warnoo fu, kaananke nili suudu duppee. Nduppoowo ndu yottinoo fu, na nana ɓiɓɓe kaananke na mbulla. O hakkilanay ɓe fay seeɗa. Heddii o duppi suudu nduun.

Suudu duppaa faa bayaare ɓantii. Nde ngulu nyifidinnoo fu, kaananke tawaa na jooɗii nder dankim; o foofi faa ɗo poofaali ɓii aadama mbaawi yottaade de o wi'i: "Wallaahi hannde nyalooma o, na mi yetti Alla gaɗa cukalel ge'del Alla ngel maayi..." Illa o yottinay haala makko ni Hakkillo-am na ɓuri hakkillo kaanande yottii. Cirwol yoppi ƴeenyi kaananke; ɗum faamii ndeen kaa ko hakkillom fotaa hakkillo suka o.