Waɗiino e jamaanuuji, suka tewtoowo anndal. O wi'i walaa fu ko o yiɗi so wanaa anndude ko woni e adunaaru.

O yehi to gorko mawɗo. O itti o fillanii ɗum. Gorko mawɗo men wi'i o yaha de o warta o fillanoo ɗum ko o yi'i.

Nyalaande dillol makko fini. O dilliri lettugal. So o waalii ɗo hannde, ni o waala to, jaango. Walaa fu ko o hiirnii so wanaa tewtiiru anndal.

Heddii suka gorko men wari tawi hayre raneere toy na waalii. O wi'i hee bawɗe laamɗo! ndaaree hayre rawniri. Ni o turii heɓa o ada nde. Ni hayre men fitti foɓii tiinde makko de fottowi yeeso. O memi adude nde, o hunngii. Ndeen noon o watti o wi'i, waɗii haynde nde haynaaki Alla. Hayre men wi'i o, ɗum koo haynaaki; yaw yeeso ko a yi'an ko haynii.

Suka gorko adi laawol. Na yaha. Na yaha faa woɗɗii. Wari o hawri jabaare na dogga, na doggida kure sappo e ɗiɗi. Huunde fu waɗay ɗum. O ɗaaƴi jabaare daroo. Jabaare darii. O wi'i ɗum waɗii ko haynii haynaaki Alla. Noy de piɗaɗaa kure sappo e ɗiɗi, a boɓɓaaki sakko aan waatata ? Jabaare men wi'i o, ɗum koo haynaaki; yaw yeeso ko a yi'an ko haynii.

Suka gorko men adi laawol. Na yaha. Na yaha faa woɗɗii. O wari o tawi jabaare wonnde na fiɗaa kural gootal na boɓɓii, waati na waalii. O wi'i bawɗe laamɗo! Jaka ko jabaare nde wi'unoo ɗum yo ngoonga. Ɗum na yaadannoo kure sappo e ɗiɗi, boɓɓaaki sakko waatan, de ɗum kural gootal tan, de na waati na waalii. Goɗɗum tawaa ɗoon, wi'i ɗum koo haynaaki.Yaw! So Alla jaɓii a yottowoke yeeso, a yi'owan ko ɓuri ɗum haynaade.

Suka gorko adi laawol. Na yaha. Na yaha faa woɗɗii. O wari o tawi gorko mawɗo mo duuɓi capanɗe jeenay na woni hakkunde sukaaɓe ɓe duuɓi sappo e sappo e ɗiɗɗiɗi. Sukaaɓe ɓe, ƴommbe mbaɗɗii na ndoggina hano pucci ni. Gorko nawɗo o, na jooɗii nder lekki. Sukaaɓe ɓe, camndondira pucci ɗi nay nay e tati tati, ndoggina de ngara ndaasoo yeeso gorko mawɗo o. Faa hakkunde naange hewta. Faa ɓe ngara ɓe coma. Ɓe ngara ɓe njooɗoo ɗakkol gorko mawɗo. Warowa nyaamdu waddee. Suka ngarɗo heɓa nyaama fu, itta lonngere wootere watta e le'al de sakitoo fuɗɗa nyaamde.

Ko woni e le'al ɗum wonnoo nyaamdu gorko mawɗo. Haɗataa ɗum haarude, haɗataa sukaaɓe ɓe, haarude. O jooɗii o ndaari. O wi'i bawɗe laamɗo! waɗii ko haynii haynaaki Alla. Gorko mawɗo men wi'i o, ɗum koo haynaaki. Ko ɓuri ɗum haynaade na woni yeeso. Ta termu hantude ko haynii so wanaa a hulataa tampiri. Ko ɓuranoo kam ni kootaa wuro maa.

Heddii suka gorko yedday. O yeeƴii ɗo o ƴuurunoo. O yottinoo fu, o jippowii ɗo gorko mawɗo, mo o wayninoo ko o tewtowan anndal o. Ɓe njootondiri faa jootiiru timmi. Gorko mawɗo wi'i a yehii tewtiiru anndal faa a wartii. O wi'i mi yehii faa mi warti. O wi'i ɗume nji'oyɗaa ?

Suka gorko jaabbbii o; o wi'i, hoore aranande fu, nde ndillunoo-mi, mi yi'aanaa hayre raneere toy toy. Mbi'um waɗii hayre na rawna. Turii-mi heɓa mi ada. Hayre fitti fii kam tiinde. Termum faa waɗi koyngal tati, mi waaway adude nde.

Gorko mawɗo wi'i hayre raneere toy nde, hollataanaa ibiliisa filataako ɓii-aadama remmbe. Neɗɗo filotoo ɗum.

Ni suka gorko wi'i, taaɓii. Warowi hawri jabaare na doggida kure sappo e ɗiɗi. A anndaa ngale ɓuri mawnude. Jabaare boɓɓaaki sakko waatan. O wi'i waɗii ko haynii haynaaki Alla. Jabaare wi'i, o yaha ko o yi'an ko ɓuri ɗuum haynaade.

Gorko mawɗo wi'i jabaare nde njiwɗaa na yahada e kure sappo e ɗiɗi de waatay nde, yo ɓii-wuro. Ɓii-wuro ko waɗi fu na munyanee faa waɗa kile sappo e ɗiɗi, de sakitee waɗee ko wattee fu.

Ni suka gorko wi'i, taaɓii. Gorko mawɗo ƴami ko o yi'i nde o taaɓinoo. O wi'i nde taaɓinoo-mi, jabaare nji'um na waati na waali. Ndaarum, tawum kural gootal ngal ɓuraa fay gootum, fiɗaa de waati.

Gorko mawɗo wi'i, jabaare nde kural gootal wari nde, hollataanaa koo janano, ɗo yehi fu, nannga hoore muuɗum. Golle gooto na waawi heddude ɗum.

Ni suka gorko wi'i, taaɓii. Warowi tawi gorko neejo na jooɗii ley lekki; sukaaɓe, ɓe duuɓi sappo sappo e sappo e ɗiɗɗiɗi na ndoggina ƴommbe na ngara na ndaasa yeeso muuɗum. Nyaamdu waddee. Gorko mawɗo, ittee lonngere lonngere hokkoree. Kam haaran, haɗataa sukaaɓe du haarude.

Gorko mawɗo wi'i, gorko mo tawɗaa ley lekki o, oon won sifa gorko annduɗo ko gollata. So neɗɗo anndii ko gollata, no sukaaɓe ngardi e muuɗum fu, na heƴi e muuɗum. Kaa mo anndaa fu, wi'ataanaa yo gorko jayɗo. So mawɗo jaasay, marataa sukaaɓe, marataa mawɓe.