Waɗiino e jamaanuuji, nyiiwa e donto kaɓi e beete. Ko saaɓii hamnde maɓɓe ? Nyalaande gom finunoo, nyiiwa yehi hokkowi geese muuɗum cannyoowo. Cannyoowo na sannya. Dontoori warowi wari. Yottinoo fu ƴami: "Moy sannyantee ɗo. Cannyoowo wi'i o, yo nyiiwa waddi geesem na sannyanee. Donto jaabii wi'i: “Ko won nyiiwa!" Yoppu geese makko o, de cannyaa geese am.

Cannyoowo jippini geese nyiiwa de adi geese donto na sannya. Nyiiwa warowi wari. O wi'i moyni, a sannyidii geese am o ? O wi'i mi sannyiday. Ko saabii de a sannyiday? Cannyoowo itti fillii. O wi'i donto wari wi'i mi yoppa geese maaɗa de mi sannya geesem. Noon du ngaɗum. Nyiiwa wi'i yoppu geese makko o, de adaa geese am. Cannyoowo yoppi geese donto de anti geese nyiiwa. Na jogoriinoon faa ngarɗo fu o anta geesem de o yoppa geese mo o sannyannoo. Noon faa warowi ɓooyi.

Nyiiwa warowi warti. Tawi geesem na waalii, geese goɗɗo na sannyee. ƴami geese moy sannyetee nih? Cannyoowo wi'i yo geese donto. Njiiwa wi'i allam dey, moy wi'etee donto? Cannyoowo wi'i donto, yo gorel togosel, njiɗungel yawɗaade, ngel leeɓol junngol hakkunde lacol. Nyallan na waancoo. Njiiwa soofini, rubbiti faa tilde dubbunɗem fotondiri e no darnde ɓurndi fu mawnude e dontooje waawi fotude. O wi'i: "Cannyoowo, so donto wari, so ɓuri donto e jaasi donto wari, kaalanaa ɓoy, mo tilde doodim waawaa fotude e tilde doodi am ndi, tinnoo ta wi'a ɓiltaa ngeese am de ada geesem cannyaa. Sannyu geese am o!"

Cannyoowo jippini geese mo sannyannoo de watti adi geese nyiiwa. Na sannya. Ni na sannya faa ɗo ndontoori du warowi.

Donto men yottinoo ni wi'i noy! A sannyidii geese am na cannyoowo? O wi'i mi sannyiday. Donto ƴami ko saabii. Cannyoowo wi'i ngoonga, nyiiwa luttii ma ga. O wi'i mi wallina geese maa de mi ada geese makko. Donto wi'i ngoonga fu noon nyiiwa wi'i maa! Cannyoowo wi'i ngoonga. Nani tilde doodi makko. O wi'i mo waawaa hanyude dagu tilde makko nde fu, ta jippina geese makko so wanaa nde sannyidaa.

Donto haɓi seeki tekke. O sankiti dubbunɗe nyiiwa de o suuli suuldere ɓuttere. O itti leeɓol rotere makko ɓuru ngol fu mawnude o seŋi dow cuulal makko. O wi'i: "Cannyoowo, jippin geese nyiiwa, de ɓilaa geese am, cannyaa faa wooɗa. So nyiiwa warii, kaalanaa ɗum, ko mo leeɓol roterem fotaa e leeɓol rotere am waawaa haɓude e am. A faamii ?" Cannyoowo wi'i faamii. Donto wellii. Cannyoowo na sannya geesem. Geese nyiiwa yeggitaama hoo!

Wari nyiiwa warowi. O tawi geese makko na waalii. Geese donto na sannyee. O wi'i cannyoowo, ko kaalunoo-mi ɗum a jaɓay na ? Cannyoowo wi'i donto luttii ma. Mi hollii ɗum ko ngaɗuɗaa, mi hollii ɗum ko mbi'uɗaa. O wi'i so a warii, mi holle ko o waɗi." Nyiiwa wi'i ɗume o waɗi? Cannyoowo holli cuulal dontal de wi'i: "O wi'aanaa neɗɗo fu mo leeɓol roterem footaa e leeɓol ceŋiingol e cuulal ngol fu, waawaa haɓude e makko. Nyiiwa wi'i ayyo wooɗii. Ndelle kaalanaa o, min kawra nyannde hinna maaniire nde, nokkuure hinna maaniire nde.

Nilaangal nyiiwa hewtowi donto. Kam du haalani ko fiirata e ko fippata fu wara walla ɗum. Nyiiwa du haalanoy ko ɓuttiɗi na waawi rubbitilde tilde mawnde fu.

Nyalaande hamnde fini. Yimɓe donto e yimɓe nyiiwa kawri. Ɓe njottondiri. Tawi nyaaki ngariino dow innde donto. Naati nder noppi nyiiwa e ko wallata nyiiwa fu. Ba ɓooyan ni donto jaaltii nyiiwa e ko wallata ɗum fu.

Ndelle neɗɗo noddirtaa hamnde taadu semmbe jogii.