Neɗɗo haanaanaa hula laakara illa na woni e adunaaru. So rewii faa yahowii, ko huli e ko jootii fu, daɗataa gasi. Ndelle haanaanaa hula illa e aduna ɗo. Jootoo illa e aduna ɗo. Saboo Alla haali, Alla fenataa.

Nyannde neɗɗo waalowi yanaandem, jemma arano o, le'e tati tawata ɗum toon: ɗe waajibiije; ɗe luttataa; ɗe mbaasataa warde. Kaa ɗe le'e tati ɗe, won no ɗe njaarata. So ni laamɗo hoddiri faa neɗɗo jaaƴoke yanaandem, faa futoro welloke, ngaddooɓe le'e tati ɗe, ndewndiran ngara, njoƴƴina ɗe de njeeƴoo koota.

Ɗume ɗum fiirtata ? Le'al feccere neema, feccere mbullarga ngal, ɗuum won so a heɓii beero, a waɗii hiraande maaɗaa faa wooɗii, aan e beero on nyaamii, ko beero nyaamata ɗum, wartoyta neema. Ko neɗɗo nyaamata ɗum,wartowa mbullarga.

So ni a waɗii hiraande maa, rewii faa joƴƴinaama, nyaamaa aan tan; goɗɗo heeday ma nano, goɗɗo heeday ma nyaamo. Nyaamaa faa kaaraa de mbi'aa ko heddii adee ɓilee. Njannde ngaal le'al wartoyta fu, mbullarga wartidata. Nyiiri walaa, lu'o walaa.

So koddo maa heɓii beero, a ummoke, o sanjoke, a diirii a waɗii neema lobbo, a wattii e le'al yehee hokkowee hokka beerom, aan kaa tawee a nyaamay. Nyannde ngaal le'al na warta, no yaarunoo wartirta. Neema laaɓuɗo faa wooɗi, heewata ɗum.

Ndelle ta njeggitee, koo ko ngaɗɗon fu, yo ko'e mon ngaɗanɗon.