Waɗiino e jamaanuuji, gorko tawanoo de yo hiran hunnde. Kanko du won kaananke wuro. Li'eewa o waɗi, deekiraaɓe makko na njaha na cafowa haabu.

Nyannde gom kaananke ƴeenyi soorowal mum na jooɗii. O yi'i worɓe na piloo deekiraaɓe makko. Ɗum metti o sanne. O noddi minyiiko o haalani. O wi'i ɗum, so ngoonga ni kanko won kaananke wuro de no huunde nde, mettiri o, de na o ɗaɓɓa minyiiko, sawaranoo o, ɓe njoppa laamu ngu, de ɓe ndilla ɓe lalla e ladde maɓɓe. Minyiyo o, heddii yedday. O wi'i ɓe ndilla nokkuure nde, ndelle.

Ɓe ndilli. Na ɓe njaha. Na ɓe njaha faa ɓe ngarowi ɓe naati nder ladde yuurummberere. Ladde noddee ladde nootoo. Naange wari saami ɓe. Ni na ɓe njaha. Ɓe njehi faa nih won jenngii.

Heddii ɓe njottii rotere lekki ɓe ndarii. Ba ɓe pukkoto ɗoon, ni ɓe mbi'i ikka nde ɓe ƴeenyi koo ndeen ɓuri ndeenaagu. Ni ɓe kootowi dow lekki ɓe ɗaanii toon.

Tawi jinnaaru du wonnoo nder ladde ɗoon na yaha, na ronndii keesuwal manngal. Gaɗa jemma jenngii, jinnaaru wi'i jippinan footinoo. Heddii jippinowi lekki ki kaananke ƴeenji ki. Rewnoo faa jinaaru men ɗaanii, ni deekum fi keesuwal wuytii.

Ngoonga! Nder keesuwal jinnaaru ndu, deekum wonnoo ɗoon. Kiram saabii de jinnaaru men dilli wuro ngo wonnoo. Ley keesuwal debbo waalata, ley keesuwal debbo nyallata. Ko foti jinnaaru kiram walaa.

Ndelle jinnaaru ɗaanoke. Debbo omtii keesu faa wuytoke. O ndaari dow; Leƴƴule lekki na moorii na ummanii kammbu. O ndaari faa wooɗii. O yi'i kaananke e minyum na cekii hakkunde leɗɗe na ɗaani. O ƴeenyi lekki o tawi ɓe toon. Heese heese faa o findini ɓe e dullaangal jinnaaru.

Kaananke e minyum pini. Ɓe ndaari dey jinnaaru. Illa ɓe poofi ɓe nji'ay debbo wooɗiri nih. Ɓe kawriti ɓe moosi. Dey jinnaaru ruɗi ɓe mooso maɓɓe. Ba neeɓan ni dey jinnaaru wi'i: "Jooni yaa gootum woni. Maa gooto mon jippoke min ngaɗii ko mawɓe jelgooɓe maa mi huuɓii, jinnaaru ndu fina, tappa on faa maayon. Saboo tawdan en, wooɗi yerum e kiram le walaa."

Kaananke e minyum ndarondiri. Ɓe njiɗaa wadde ko debbo o, haajaa ɗum, na ɓe kulana yonkiiji maɓɓe. Gooto maɓɓe heddii jipoɗii e dey jinnaaru. Ɓe ngaɗi ko mawɓe jelgooɓe. Ɓe njottinnoo fu, suka gorko yeeƴii ɗo wonnoo. Dey jinnaaru du yeeƴii nder keesu ommbitii. Ni jinnaaru na fukkii na hara. Fay mayɗo fotaa ɗum ɗaanaade.

Rewnoo faa fajiri yottii, jinnaaru men fini. Itti ndiyam wuyɓii de heddi nanngi. Alla waɗi jinnaaru men juuli faa juulidi. Yehi tappowi keesuwal kile tati. Debbo fini. O omti keesu. O wi'i debbo wuytoo juula. Debbo wuytii na juula. O ndaari ɗum faa wooɗi de o wi'i: "Saa Alla bada wi'aa aan e gorko on njiidii gadi so wanaa min." To kaananke e minyum ngoni to, na nana jinnaaru na haala. Debbo juuli juulidi. Jinnaaru watti nanni ɗum nder keesu de ronndii keesuwal mum dillidi.

Kaananke e minyum gorko anndunoo ko ɓe mboɗɗoke ni njippii. Minyiyo o, noddi mawnum faa nootii de wi'i: "A yi'ii ko dey jinna waɗi. Walaa ko mbaawanɗen e kiram. En koota wuro men, kawritowen e suudu baaba." Heddii kaananke yedday.

So neɗɗo hirii sanne fu, yeggitaanaa kiirndam.