Sukaaɓe ɗiɗo njaadannoo. Gooto oo kay, innum maayii, bammum maayii. O; wiitaakenaa Ali. Gooto oo du kam kay na jogii inna, na jogii baaba; kam du Ali wiitee. Jon le, mo walaa inna, walaa baaba o, yimɓe kalfini ɗum mo inna e baaba o. Wooɗi ɓe nanndu du sanne. Kamɓe du njaadata jemma e nyalooma.

Wari jon kay inna Ali, Ali ngooduɗo inna e gooɗuɗo baaba o, innum jon kay anndaa fu moy woni ɓiyum. Waawaa senndude ɓe. A wiitaana funeeɓe. Faa nyannde gom tan, o yehi o yi'owi moodibbo. O wi'i, sukaaɓe ɗiɗo o jogii. Oo kalfinaaɗo, oo ɓiyiiko. Suka mo o halfinaa o, e ɓiiko nanndu sanne. Wooɗi ɗiɗo fu Ali mbiitee. Dem-mawɗo anndaa fu moy woni ɓinngel muuɗum; ɗum ni yiɗi faama fa sennda ɓe, annda moy woni ɓiyum.

Moodibbo on wi'i mo, o acca jon kay faa nyannde ƴoonde ruuyna; artiiɗo naati suudu makko fu, kam woni ɓiyiiko. O jogii, o jogii faa nyanmde gom henndu waɗi, ƴoonde ruuyni. Tan cukaloy ɗiɗoy fu ndoggi warde. Ɓiyiiko o ni artii naati ley suudu. Artinoo naati fu, o fooɗi suudu ndun o ommbi, o yoppi keddiiɗo on yaasin.

Tawi jemma le. O yoppi cukalel keddiingel ngel walaa inna walaa baaba ngel yaasin. Biiteengel Ali ngel. Nde yoppanoo yaasin fu, kam du doggi yeccii. Tawi ley ɓaade ton, lekki makki na woodi, makki sanne.

arŋarti ƴeenyi dow lekki ton, faa dow, heɓa suuɗoo ƴoonde. Ta ƴoonde e henndu keɓa ɗum. Cukalel naatu ngel ley suudu innum ngel du, yi'ii banndum waraay wooɗi nani ƴoonde na toɓa. Tan wi'i: "Ali! Ali, war naatu Ali", Ali wi'i:

Timmii. Tan ngel to, anndaa fu no watta. Filii gadin ley suudu ton fu, na nodda: Ali! Ali! Ali wi'i fey! Ali salii jippataako.

Tan o nodda ɗum gadin; nde jenngunoo fu o wi'i ɗum: "Ali, war naatu Ali." Gonnɗo yaasin oon du wi'i:

Timmii! ƴoonde du waali na toɓa faa weeti.

Debbo mawɗo on salii Ali omtataa suudu sakko o yi'a banndiiko; yoppi Ali muuɗum ley suudu ton, yehi noddowi yimɓe wuro faa suka on jippinee. Suka oon salii jippataako.

Laamiiɗo waddaa; bawɗo ƴeenyude lekki kin le fu walaa. Fay yimɓe ndekondiri mbaawaa ƴeenyude lekki kin. Toowu, wooɗi ji'e du ngon e muuɗum. Fay gooto, suusaa ƴeenyude no lekki kin sukkiri.

Yimɓe fu ngari. Cukalel ngel salii jippataako. Yimɓe omti suudu ngel to wurtii; wurtinoo fu na filoo Ali. Tawi Ali faa dow lekki woni. Suudu omtanoo, suudu na omtee, banndiiko on na wurtoo. Nde o yiinoo o fu, o ŋarŋarti o jippii. Nde o jippinoo fu, laamiiɗo ɗon woni, wi'aa jon kay dem-mawɗo haalanee, ta o waɗee fu ko boni, o accee ɗon ni, o waalaa inna o walaa baaba.

Timmii! dem-mawɗo acci mo ɗon, wooɗi yiɗaa mo le. Jon kay wanaa faami ooto won ɓiyum na!

Nyannde gom tan ɓe njaadi lonnooru ɓunndu. Nde ɓe njaadunoo ɓunndu fu, dem-mawɗo on, wi'i suka muuɗum Ali on, jooɗoo; ƴoogi, oya to wari fa walla ɗum. O salii. Suka makko on waawaay wurtinde cawgal ngal ley ɓunndu. O too wari walli ɗum. Ɓe pooɗi ɓe mburtini. Dem-mawɗo o, nanngi banndo ɓiyum on, fii ɗum, wi'i ko saabi de walli Ali. Ali ɗiɗaɓo o, toowti na wulla. O wi'i ɓiyiiko on gatin ƴooga wurtina; ƴoogi, waawaay wurtinnde. Oya to wari walli ɗum gatin wurtini. O nanngi ɗum o fii; nde o fiinoo ɗum fu, ɗum doggi.

Nde on ton wurtinnoo fu, o wi'i ɓiyiiko ɓe ummoo ɓe njaha; o ronndii gineeji makko, o yoppi suka on. On du ɓeerni, salii Ali tokkataa ɓe. O hondi e ɓiyiiko. Nde o hondunoo e ɓiyiiko fu, jaado biyiiko, Ali on, warno fu fitti saami ley ɓunndu ton. Maayi ley ɓunndu ton, yoolii. Suka makko on nde hootunoo fu, filii Ali ton. Ali waraay; wurtii fa ndaara o, ndaari, ndaari faa yehi to ɓunndu ton, yurnii tawi jaadom Ali on na huywa, tan kam du fitti saami ley ɓunndu ton, maayi kam du.

Nih ɓe maayiri.