Sukaaɓe gooɗom, ɗiɗo. Ɓe mburtii fa ɓe lohowoo; lohagol kam wonno filaade kujje ladde fa nyaama. Ɓe njaha. Ɓe njaha fa ɓe ngari e nokkuure. Ɓe tawi kuse teewu, na fitta, na wurtoo, naatii ley ngayka ni wurtoo, si fittii naatii ley ngayka ni wurtoo. Tawi le ɓe njolbii. Suka gooto o, wi'i: "En ƴakka kusel ngel. Gooto o wi'i: "Hey! min kay miɗo hula ƴakkude tew dagu ngu; a yi'ii na fitta, na naata, na wurtoo, a anndaa fu to ƴuuri." Jaadiiko wi'i: "Min kay mi nyaamataa." Tan gooto o kam kay hooƴi kusel ngel ƴakki. Na ƴakka, reedu muuɗum na heewa.

Reedu heewi bumminii. Fay ummaade o waawaa. Jaadiiko o, ndaari o de wi'ii: "A yi'ii ya maani, mi haalaniino ma ta ngaɗaa; joonin noy podiɗɗen wadde ? A waawaa yaade wuro, mi waawaa ronndaade ma. Min kay ndelle, accu mi hoota wuro, mi haalanowa yimɓe, ngara ndaare.

Nde jaadiiko on ooncinoo fa hoota haalanowa yimɓe fu, o noddi ɗum:

On du, nde o wiinoo noon fu, yurminii ɗum. O waawaa yoppude o. O yottii o ƴeɓti o, o bammbi faa o woɗɗowii. Tawi o tampii. O wi'i ɗum jon kay jooɗa, ɗo Alla joƴƴini ma, fa mi yaha wuro dey, mi haalowa. Nde o joƴƴinnoo ɗum o fuɗɗi yaadu fu, wi'ii mo:

Tan, on yurminii ɗum. O yotti o ƴeɓti mo gatin o bammbi faa, faa, faa ɓe mboɗɗowii. Fa tawi ɓe mboɗɗaa wuro sanne; o wi'i jonkay mi tampii, jooɗa ɗo Alla joƴƴini ma, faa mi yaha dey, mi wara. On wi'ii mo gadin:

Timmii gatin. Nde o yimunoo fu, o waawaay gatin yaade; o yottii o ƴeɓti mo faa o yottini mo gaɗa wuro, ni gaɗa ɓaadeeji, joƴƴini mo, wi'i mo jonkay jooɗa ɗo Alla joƴƴini ma, fa mi yaha de mi wara. Na o ummoo fa o yaha gatin, oo to wi'i:

Timmii gatin! O waawaay yoppude ɗum gaɗa wuuro ɗoon. O ƴeɓti ɗum faa o yottini ɗum ley ɓaade muuɗum en. Nde o yottinnoo ɗum ley ɓaade fu, koreeji mburtii. Na mburtoo, na nji'a ɗum, reedu muuɗum na feccoo. Reedu nduun nde feccinoo fu, baɓɓatti ni, pooli ni, ko fiirata ɗum fu na wurtoo ley reedu muuɗum na fiira.

Ni wonnoo kaddi ngol du.