Hitaande gooɗom, rafo waɗi sanne. Nyaamdu fu walaa. Yaare wurtii, na filoo ko nyaama. Fowru du wurtii na filoo ko nyaama. Fa ɓe ngari ɓe kawri hakkunde ladde. Fowru wi'i: "Ɓii! waa, koree jam ?" Yaare wi'i: "Ɓii! bone, huunde fu walaa wuro. Wooɗi faa joonin mi yi'aay fu no ngaɗan-mi ko mi nyaama."

Fowru wi'i min du, ɗuum ni wurtini kam, mi anndaa fu no ngaɗan-mi. Yaare wi'i min ya, miɗo anndi miɗo jogii malfa, dey fidde ka na tiiɗi. Fowru du wi'i: "Miɗo anndi to kujje ladde ngoni dey mi walaa malfa. Ayyo wooɗii! en njaha, min kay miɗo jogii malfa." Timmii! yaare e fowru tokkondiri, faa ɓe njehi nukkuure ladde.

Tawi keeɗu, kujje ladde fu ɗon tan njuurotoo. Ɓe njehi, faro sallifana juulaama, laasara waraay. Ɓe ndarii faa kujje ladde ngari: nani nyiibi, dawaaɗi ladde, lewli, boje, fu njarii ndiyam faa kaari. Mohen fu jon kay na heedi feerem na fukkii, ɓe ndaara. Fowru wi'i, a yi'ii na ? O wi'i wallay mi yi'ii, nani nyaamdu kay. Fowru wi'i mo: “Toy woni malfa maa ? O wi'i miɗo jogii malfa, dey malfa am ka, fidde ka na tiiɗi, si wanaa mi heɓa nyoƴƴanɗo kam hinere am. Hinere am nyoƴƴetee-mi kom fiɗa malfa. Fowru wi'i: "Ɗum kay miɗo waawi." Yaare wi'i, "Wooɗii."

Timmii! Yaare men wi'i fowru: "Nyoƴƴanam hinere am ndelle fam fiɗa." Fowru hooƴi hinere muuɗum nyoƴƴi dow hinere yaare. Wooɗi yaare le, aɗa anndi si a nyoƴƴii hinere muuɗum fu, nden heɓintoo. Tan yaare hooƴi laacol tonti dow fowru. Nde tontunoo fu, fowru halɓi faa dow! Halɓaango muuɗum gon, kujje ladde gonnooɗe na pukkii ɗen, yoga kay, taƴo-taƴo wari ɗum, yoga du ummii bempondiri, keli, ko halkata halki, fowru du naati ladde na hiiƴa, na hiiƴa. Faa, faa, fa laasara wari, tawi yaare na dari kam kay, sottaay ɗo wonnoo.

Faa warowi laasara, naange ɓadake saamde. Fowru wartowi fa ndaara jaado muuɗum, tawi jon kay tooke ɗen cu'ake seeɗa. Tawi yaare na darii na heɗii ɗum. O wi'i: "Hey an! an koy, malfa maa ka fu, dow am non piɗɗaa. Yaare wi'i mo: "Ta Alla ɓanne, an kay alburuutu non, kam meemi ma; ndaar ɓe piɗu-mi kay, ndaar ɓe kemnu-mi."

Fowru ndaari, tawi nani kujje ladde ko heli na fukkii, ko waati, ko taƴo-taƴo wari. Nani fu na pukkii na mbaati. Fowru ndaari, wi'i: "Innahadillaahi! an kay, Alla hiinam sarri malfa maa ka!" O wi'i: "A yi'ii malfa am ya, jon kay, mon fu ɓarke junngel muuɗum. Mon fu noddowa koreeji muuɗum, ɓe ngara ɓe kooƴa kadde ko ɓe mbaawi hooƴude. Ɓe kooƴi.

Timmii! Ni fowru ɓoɓti, yaare ɓoɓti, ɓe njaari to maɓɓe, ɓe mballini. Heddii ɓe nyaama, ɓe nyaama fa, fa fa mon fu hanntowi ngeɗum.

Rafo waɗoy gatin. Mon fu dawi na filoo ko nyaama. Ɓe ngarowi gatin ɓe kawri. Fowru wi'ii: "Ɓii, waa! koree jam? O wi'ii: "Ko arannde ɗum ni ya; nyaamdu hantake, mi anndaa no ngaɗan-mi; nani kam miɗo yaha." Fowru wi'i: "De noy ngatten ?" Yaare wi'i miɗo jogii malfa am ya. Fowru wi'i mo: "A waddii nyoƴƴanoowo ma hinere maa naa?" Yaare wi'i wanaa nani ma? Leendu jaabii o, wi'i: "Abada, wanaa min kay, filowa goɗɗo."