Fowru ɗowtunoo deekum yaha wuro bammum koo esum heddaaki. Be njehi faa ɓe mboɗɗowii. Ɓe tawi yaare na fukkii na fortii. Fowru wi'i dara faam ndaara ɗume fukkii nih. O ƴami yaare ndaare aan won moy? Yaare wi'i miin won susu ndaar. Ni deekiiko wi'i kuni taaɓa njeehen.

Fowru taaɓinoo ni wi'i so ngoonga ni min kaa kuungel ngel haalam naawii kam. Mi rutto mi susa ngel. Nde nih fowru ndu susunoo yaare men, nde fettii ɗum hinere. Ni o ƴewnii o haalani deekiiko, o wi'i jon kaa yonii ko puɗɗen bojji. Yonii koy! yonnii.

Deekiiko wi'i yonnay, na woɗɗi. O wi'i ndelle min kaa mi fuɗɗan. Ni fowru wi'i haay pattaali daande am, hannde mboyyan mi hinnere am. Deekkiko wi'i wanaa inna am kay mbullataa. Fowru wi'i, iii a wi'aanaa kuungel ngel yo sukka noon? Jon kaa faa ɓe njottowii wuro essiiko noon.

Faa waali duuɓi tati, nde o rewnoo ndoon fu, o tawi ndamdiri mbe'eewa na darii. O ƴamitii salle andi ndii ndamndiri o tawnoo ɗo, ko duuɓi tati ɗum naa? Ni o ƴami ndamndiri du. Ndamdiri wi'i ayyo miin tawunoɗaa ɗo nih. O wi'i ndelle a mawnii jon kaa? Ndamdiri wi'i sanne. O wi'i a fuɗii waare du? Ndamdirii wi'i ko njiwɗaa. A fuɗɗii layre du? Ndamdirii wi'i mi fuɗɗii. A fuɗɗii luwee du? Ndamdiri wi'i mi fuɗɗii. Wi'i ndelle jon kaa so a ŋattii neɗɗo ni maayan? Ndamdiri wi'i fay so leetii-mi neɗɗo, yo maayan.

Fowru wi'i ndelle ta leetam faam heɓa mi taaɓoo. A nannii naa ? Ni fowru rappitii taaɓii yoppi ndamdiiri.