Gorko gomma wonnoo na wi'ee Sammbo Cuusu. Sukka debbo makko du na wonii e ngendi mboɗɗundi. Debbo o, wi'ataakenaa Aysata Arba. Wari nyande gomma kanko e koddo makko ɓe njaadi toon. Be njaanoo fu ɓe tawi sukka debbo o, luumo wuro mumɓoy. O wi'i sukka debbo o, hanndee kaa na mi yiɗɗi njiiden.

Sukka debbo oon hokki Sammbo cuusu nokkuure. O wi'i gorgal wuro muɓoy ɓokki makki woni ɗoon na wondi e luuro; ɓe kawran ɗoon. Nde rewnoo faa jenngi seeɗaa fu, ƴoonde nangi nano nangi nyaamo, toɓi kaddi ko waawi fu.

Wawtu oon, nokku yo heewu dawaaɗi ladde. Sukka debbo oon du wari yehi toon, ɓokki toon. O wari o naati ley luuro ɓokki toon imo doomi sukka gorko oon. Jakka ladeeru rimmi ley luuro ɓokki ɗoon. O lutti bogo gooto na o jooɗii. Laddeeru nduu du, ko rimi ɗum, ɓiɓɓem nyaamataa fu goɗɗum so wanaa teewu ɓii-Aadama.

Laddeeru wari warti waancule muuɗum tawi imo jooɗii ɗoon. Laddeeru ƴami ɗume foti wannude ma nih. O wi'i so ngoongaa ni hakkunde makko e yigoo; amaanu ɓe ngaddunoo faa ɓe kawra ɗo dey, ɗuum waddi kam dey mi yi'ay ɗum tay. O ƴami toy ɗum wonni. O wi'i ndii to ngendi. O holli ɗum inde ngendi ndiin.

Laddeeru ndu wi'i gaɗa ni a bonnay aadi a waɗɗii o ammaanu ni en andan aadi. Mi adete mi yaara toon. So ni a yehi, welo-welo hakkunde maa e gorko waɗowi a haali ke miin addi ma waddi fu, dow ɗo kaalataa ɗoon maayataa. Nokku fu ɗo uffowaɗaa mi waran mi utee mi hokke ɓiɓɓe am.

O wi'i ndelle o bonnataa aadi ammaanu. Laddeeru ndu, turii. O waɗɗii ndu. Joggii o faa ɓe camndii suudu sukka goorko; o heddii o fitti o tirgitii o naati suudu sukka gorko. O ƴami o, noy ni ngaɗɗaa dey warɗaa ɗo, koyɗe maa ngaɗay looppe.

O jaɓay haalde. Sukka gorko wi'i joonin kaa a jammbi kam. O wi'i ammaanu hakkude men o, mi haalante, ɗum minnyantaa kam jam. Laddeeru addi kam waddi dey ndu wi'aanaa so mi haali fu, ɗum minnyantaa kam jam. Dow ɗo o haali ɗoon ni o heddii o maayi; ɗo o waayi ɗoon ni heddii sukka gorko makko e koddo muuɗum ummii ɓe mbasani o, ɓe mooɓi o. Dow to ɓe mooɓi o ɗo ni laddeeru ndu yottii tawi sukka gorko o na darodii e jogolam ni hawri e laddeeru ndu, heddii wari ndu.

Heddii Allaa du e bawɗe muuɗum sukka debbo oon du ƴuuti. Nih ɗum yaari.