Debbo wonnoo, dey maraanaa baali, be'i e coppe. Goriiko jogaaki fay gootum. O wi'i goorko o, kee kanko kaa o heddataako hakkunde yimɓe. So wanaa o jooɗoo ley laddee. Goorko o, sallii. O joggii goorko faa wari jaɓi.

Heddii ɓe kooti ladde. Ɓe njooɗowii toon. Ɓe tawaa toon faa nyannde gom woɓɓe puɗɗi ni ngara ɗo maɓɓe nyalooma. Jon kaa o tawi wannaa tagaaɓe. Kam kaa fini nyande gom haɓɓi gineejim wi'i debbo o, so a hootan kaa heɓina faa kooten, so a hontataa du, min kaa mi hootii. Debbo o, wi'i o yaha o yoppida ɗum kam kaa baalim, be'im e coffem. Heƴii ɗum ko faddoo.

So weeti, ni bonneeji ladde ngara nyallida e makko. Ngari mbii ngaran ɓe kiiraa. O wi'i ɓe ngara ke kanko du o heɓɓan ɓe o hirda. So o heɓii ni na o yiɗi. Jon kaa hiirnoo ni ɓe ngari. Jaka dammucce ɗe, na anndi ke wanaa tagaaɓe. Ɓe ngarnoo fu, ɓe mbi'i kiirii jam.

Heddii baali mbi'i debbo o, hiiray ɗo. Debbo jom sawru kummbaldu linngilimti linngilim, ni ɓe nduuɗii. Weeti. Wennoo ni o yehi weendu. O yahunoo weendu ni o haawri ɓe. Be mbii min ngarii dey min tawayma. Baali maa mbi'i a walaa ɗoon.

O wartunoo ni o naŋŋii baali mawɗi o sonnii. O yoppi ɓiɓɓe mumɓɓoy. Hirnoo ni ɓe ngari, ɓe njottinoo ni ɓe mbi'i kiirii jam. Ni ɓiɓɓe baali mbi'i: "Debbo koo hiiray gaa, debbo jom sawru kummbaldu linngilimti linngilim. Heddii ɓe nduuɗii.

Ɓe mduuɗinoo fu weeti. Watti o ye'hi weendu o hawroy bonneeji ɗii gasin. Ɓe mbi'i ɓe ngarii dey ɓiɓɓe baali ɗi mbi'i a walaa ɗoon. O nanngi ɓiɓɓe baali o sonni. O wi'i so hiirii hande ni ngaron. Hiirnoo ni ɓe ngari. ɓe mbi'i kiirii jam. Be'i ɗi, mbi'i debbo koo hiiray ɗoo; debbo jom sawru kummbaldu linngilimti linngilim; heddii ɓe nduuɗii.

Wennoo ni ɓe kawri debbo; ɓe mbi'i min ngarii dey be'i maa mbi'i a walaa ɗoon dey min nduuɗii. Deɓɓo o, wi'i weetii ni ngaron. Wennoo ni o nanngi be'i makko o sonni. Hiirnoo ni ɓe njehi, ɓe kiirni jam; ni ɓiɓɓe be'i makko mbi'i debbo koo hiiray ɗo. Debbo jom sawru kummbaldu linngilimti linngilim; ni ɓe nduuɗii.

Wennoo ni ɓe kawri debbo; ɓe mbi'i min ngarii dey ɓiɓɓe be'i maa mbii a walaa ɗoon dey min nduuɗii. Debbo o, wi'i weetii ni ngaron. Wennoo ni o nanngi ɓiɓɓe be'i makko o sonni.

Hiirno ni ɓe njehi, ɓe kiirni jam. Ni coppi makko mbi'i debbo koo hiiray ɗo. Debbo jom sawru kummbaldu linngilimti linngilim; ni ɓe nduuɗii. Wennoo ni ɓe kawri debbo; ɓe mbi'i min ngarii dey coppe maa mbii a walaa ɗoon dey min nduuɗii. Debbo o wi'i weetii ni ngaron. Wennoo ni o nanngi coppe makko o hirsi.

Hiiri. Ɓe ngari ɓe mbi'i kiirii jam; ɓe ɓadii ni o ummii o nooti. Jon kaa ɓe ndaɗɗi sekko na ɓe kiiraa. Bonneeji ngari mbi'i en taalondira. Ɓe puɗɗi na ɓe taalondira ɗoo ni mawndu ndu wari wi'i: "Miin joggel, oo to wi'i aan koyngel." Niini yaa, min joggel aan koyngel, ni ɓe karii debbo.

So a wi'ii a yiɗɗaa yimɓe fu, hoore maa woonnoo a yiɗɗaa.