Waɗiino gorko gooɗom na wi'ee ngel ɓoggi. Jilla mo famɗi inniiko e baabiiko maayi mboppidi o naggel gootel e baalel gootel. Nyannde gom mawɓe wuro kawriti kaalani o koo yimɓe ɗiɗo na ndewannoo baabiiko nyamaande. Gooto maɓɓe wari haɓɓiti naggel acci mo wulla; ɗiɗaɓo oo du nili ko na wara fa jaɓa baalel.

Baalel duroy tan fowru nyaami ɗum jilla o waray. O waroy o wi'i no suka watta fu walla yoɓa o mbaalu makko. Suka holli mawɓe wuro. Mawɓe wuro taƴa ni cukalel sarɗi. Suka ndaari dow e ley, yiitay noy yoɓirta mbaalu makko, sabu hiraande ballaa ɗum.

Gorel manngel na woni ley wuro ngon na wi'ee ngel ɓoggi saabu boggi watta na sonna ko na wuuri. Ngel boggi walaa fu gooto si wanaa Alla. Ngel ɓoggi noddi suka gorko, wi'i mo: "A walaa gooto, mi walaa gooto, a walaa gootum mi walaa gootum. Accu ngonnden, aɗa walla kam e golle am, miɗa hawa ɓoggi, aɗa sonnana en. Na hasii a heɓan njoɓiraa nyamaande ma seeɗa seeɗa."

Ɓe njooɗorii non. Faa suka gorko mawni, dewli. Gorel manngel maayi, suka gorko du noddiraa ngel ɓoggi. Deekiiko ɓaŋaa wari. Tawi na ɓuri rewɓe wuro fu wooɗude. Sukaaɓe wuro fu mbanyi mo jon kay. Ɓe ndarii faa ɓe kaɗi ɓoggi makko soodeede. Noy o watta ko o wuura? O nyobbi ɓernde makko o waɗi ko o miilayno mo waɗa. O laati nanngoowo liƴƴi. Si o dawii ni o nanngowa liƴƴi, o suuɗoo o sonnowa ɗi gere, o warta wuro makko jemma.

Mbi'eteengel ngel ɓoggi gollitiri non hakke jeɗɗiire tan jemma gom o hoyɗi inniiko e baabiiko ngari kaaldi o, mbi'i o si o nanngii liƴƴi fu ta o suuɗoo gadin; o wartira ɗi wuro nyalooma, o acca faa futuro dey o seeka deedi majji, o wurtina ko o tawi ler ton dey, o sonna ɗi. O waɗi ko o wi'aa. O nyalli mo darii gere ndiyam o nanngey fay liingu faa naange ɓadii saamude. Nde o warnoo fa o dilla fu, o heɓi liƴƴi tati mawɗi. O wi'i: hannden kay gasay.

Suka gorko hooti wurom. O yottinoo fu, o wi'i deekiiko wadda laɓi; ɓe ceeki deedi liƴƴi ɗi; liingu ceekaangu fu ɓooɗe kanŋe tawetee ler reedum. Kamɓe le, ɓe anndaano kanŋe. Nde weetuno fu ngel ɓoggi adi ɓoddere wooteere holloy bahillo. Bahillo wi'i mo ɗum wiitee kanŋe, na sonne ceede keewɗe. O sonnani bahillo ɓoddere nden kay. Deekiiko hooƴi keddiiɗe resi ler tummbude doobu.

Nyannde gom goɗɗo nili sukaaɓe ngara cooda doobu ɗo maɓɓe. Ngel ɓoggi anndaa toy deekum resannoo kanŋe. O taykake tummbude nde walaa haaju na wondi doobu. O hooƴi o hokki sukaaɓe. Deekiiko wartoy, o haalani ɗum; tan nanngi hoore wi'ii: "Kaari, a helii en, ɗon kanŋe men wonnoo!" Ɓe anndaa toy sukaaɓe njeyaa sakko ɓe piloo ɓoy.

Caggal ɗum, ngel ɓoggi naati na resa kanŋem ler lefol mum. Nyannde gom o soodoy tew mo warta tan silgaare weeyi dow makko fa teeta tew. O ruttii tann lefol saami, silgaare kaasii ɗum dillidi. Ɓillaare maɓɓe warti ɗo wonnoo. Liƴƴi ɗi o nanngi fu tawdataake kanŋe gadin. Ɓe njooɗorii non faa waɗi duuɓi, ɓe ndimi sukkaaɓe: ɓillaare maɓɓe ɓeedii.

Jemma gom ngel ɓoggi hoyɗi gadin. Inniiko, baabiiko e gorel mangel ngel o wonndunoo, ngari kaaldi o. Ɓe mbi'i: "Deeka ɓadake rimude; nyannde o rimi fu min mballete nanngaa liingu ngootu; na hasii gaɗa maggu a nanngataa liƴƴi gadin." Deekiiko rimi; o heɓoy liingu, o seeki reedum, o tawi ɓoddere kanŋe luulu mawnde sanne. O holli deekiiko; ɓe nji'ay dagu ɗum abada.

Nde jemma warnoo fu, ɓe nji'i suudu maɓɓe na yaayni faa nanndi e nyalooma. Sukaaɓe maɓɓe mbaali na pija. Jilla subaka koddo maɓɓe wari dukani ɓe, wi'i ɓe kaɗii beerom ɗaanagol hankin. Ɓe kolli mo ɓoddere luulu, ɓe mbi'i: "Huunde nde min tawi ler liingu, si jemma warii fu njaayri ɗum watta ley suudu."

Beero koddo maɓɓe wari, yaari ngel ɓoggi nokkuure ferwunde; o wi'i: “Leydi aaraɓɓe ƴuuru-mi; mi ɓii-kaananke wuro amin; baaba am nili kam. Jilla jamaanu nulaaɗo maama am gooto suuɗi jawdi amin ler maayo. Liingu moɗu ngu ɓoddere luulu holli mo resiran nde duuɓi keme joy dey sakitoo hokkita mo; ngu holli mo si ngu warii heɓa ngu waata fu, ngu hokkan nde ɓiyiigu, kamdu hokkan nde taaniigu, non ni faa hewta hannden, ɗum baabiiko hoyɗi ko ummini mo fa o wara o sootta luulu maɓɓe."

Aarabbo hokku mo ceede ɗe o waawaa limude. O danyi faa o ɓuri wuro fu. Na'i makko keewi faa anndaaka noy poti. Nyannde gom o soodi nokkure ley ladde faa o waɗa hoggo na'i. Na o haccoo goɗɗum na rawna dow lekki; o nili sukaaɓe ndaarowa ko ɗum laati; sukaaɓe ƴeenyi lekki, tawi lefol makko ngol silgaare peesinoo ngol.O fiirti lefol o tawi kanŋe makko no o resirnoo. O warti ɓaade makko o tawi njawdiri baali ndi, heɓay doobu nyanndem; deekiiko naati wuro na filoo doobu. Debbo gom miccitii soodiino doobu to makko dey wartiray tummbude; on hokkiti mo tummbu nden; o tawi nde heddodii doobu seeɗa; o watti junngo makko o tawi kanŋe makko dagu no o resirnoo ɗum nih.

Nih Alla hoynirani ngel ɓoggi.