Waɗiino e leydi gooɗom ɓii-amiiru na wi'ee Sammbo. Sammbo na laatii jokolle lobbo dey kulol haɗata ɗum ɗo daroo: ɗuum waɗi ko banndiraaɓe makko noddiri mo Sambo kulol.

Nden le yo jamaanu konuuji. Waɗataa jeɗɗiire maa lewru tawee tubal fiyaaka. Jokolle fu na anndi ko jey gollude so tubal fiyaama. Mono fu doggantaana labbo maa takubaahi maa wawaade. Yimɓe fu tawondira gaɗa wuro sabu nanuɗo tubal fu na anndi maa wuro honetee maa kono oorata.

Sammbo men kay nde nani tubal fu, dogga naata ley suudu innum, fukkoo dow leeso, suddoo gude ni na saja kulol. Nyanndem kay non o fukkortoo faa naange saama.

Jooɗii faa Sammbo yoni dewgal. Inniiko e baakiiko fu na anndi semteende du warii sabu ɓii-amiiru so rewii faa dewlii fu, kam jey ardaade konu. Suka debbo ƴamaaɗo laato dey Sammbo fu jaabo: "Miɗo yiɗi dey mi suusaa, mi waawaa noddireede dey kulol."

Suka debbo na wi'ee Aysatu, kam tan wi'i Sammbo tan heɗinoo, so wanaa Sammbo, gooto fu dewlataa mo. Nanɗo fu wi'a: "Aysata, a haaŋaama, a ɓuytii dawla maa." Dewgal waɗaa. Sammbo Amiiru ɓaŋi Aysatu. Aysatu na miila ke Sammbo waylake, na laamni ke Sammbo Suusataa doggute yeesom so tubal fiyaama.

Nyannde gooɗom Sammbo fini, lootii, waddanaa pumaari. Ɗo o fuɗɗi fummugol ɗon tubal fiyaa. Aysatu na wonnoo yaasin; o naati suudu fa o ndaara noy goriiko lalindortoo fa naatowa konu. O tawi Sammbo kay waɗii ko woowno. Hewtii dow leeso, fukkake, suddake, na diwna. O memi fa Sammbo ummoo ni o ronnki. O tawi nakkan nakkataa ni o taaditii gudde makko, o bornii saayooji Sammbo, o duhii sarra muuɗum, o mellii lefol muuɗum, o hooƴi takubaahi muuɗum e wawaade muuɗum. O deki kirke dow puccu muuɗum, o suddi yeeso makko tekkere ta gere makko annditee, o ŋeecii puccu yaade konu.

Aysatu artii yimɓe fu hawrude honooɓe wuro. Heddii yimɓe na ƴamondira: "Moy won o ? Puccu yaa puccu Sammbo; kaddule du kaddule Sammbo; hey! Sammbo ni koy! Ndaaree haynde! Sammbo artake yimɓe fu e konu! Ndaaree no e taƴirta ko'e yimɓe! Ndaaree no o tipportoo labbo! Ndaaree no o ruttortoo! Sammbo amiiru! Sammbo amiiru!" Yimɓe naati e wallude mo.

Illa naange saamay ni Aysatu e walliiɓem ndiiwi honooɓe. Yimɓe paamay ke wanaa Sammbo. De, amiiru kay na sikkitiri! Jooɗorii non faa konuuji tati mbittii fu Aysatu na waɗa no waɗannoo. Sammbo du na waɗa ko woowunoo. Yimɓe fu laamni ke Sammbo nattii worɓe, laatake cuuso, laatake wanngaari konu. Amiiru du siinii say itta kumpa muuɗum nyannde konu nayaɓu waɗowi.

Nde honooɓe kippinoo wuro faa ndiiwaa fu, amiiru hewtii mbi'aaɗo kam won Sammbo, wi'i sudditan hoore makko fa anndita mo. O difii tan laɓi ɗeeɗi mo busal. O ŋeccii puccu makko doggi wartiri mo ɓaade. Amiiru heɓaay annditidde mo. Aysatu naati suudu, umini Sammbo, holli barmere muuɗum. O wi'i: "Sammbo, paamaa, no nawnorii-mi nih, mi waawaa waɗɗagol puccu gadin; si kono waɗii fu njiitaa no ngaɗɗaa; si a yehii an anndi, si a yehay an anndi!" Sammbo na murii. Aysatu naati e sawrugol busal mum.

Ni Aysatu e Sammbo na ngondi. Ɓuray nyalaaɗe tati ni konu ummii. Tubal fiyaa. Sammbo doggani leeso. Aysatu wi'i: “Wanaa hannden kay!" Aysatu nanngi mo, ɓorni mo kaddule makko, waɗɗini mo puccu, watti takubaahi e wawaade e junngo makko, fi puccu makko de wi'i: "Si a maayowan ni maayowaa." Puccu wurtodii e Sammbo men, fonndodii mo konu. Nde yimɓe njiinoo Sammbo fu, keddi na kiiɓa "Sammbo! Sammbo o!" Ɓe anndaa ke Sammbo kay nanntaa ko ɓe mbi'ata. Sammbo ŋaɗu dow puccu tan na omti hunnduko, na heɗii maayde.

Konuujo hooreejo buunyii Sammbo yawa ɗum labbo. Alla waɗi laɓi Sammbo yuwi mo. Jilla o yottaaki ɗum tan o saami. Sammbo wi'i ndaaree haaynde, jakan mi maayirtaa ni! Sammbo heddii na wifoo laɓi, na taƴa ko'e, na hiiɓa, na fernira yimɓe puccu muuɗum. Nyanndem Sammbo tan wari feccere kunu ngun fu. Nde Sammbo hootunu ɓaadem fu salii tubal deƴƴataa. To ƴuuruɗaa e wuru fu Sammbo tann jammetee.

Nde jemma warno fu amiiru noddi Sammbo, inna Sammbo e Aysatu. O wi'i: "Mi faamii huunde wooteere hannden. Yiɗɗe woni nafakka; yidde Sammbo waɗi faa Aysatu nafi Sammbo, nafi kam, nafi wuro. Sammbo laatake cuuso, wuro heɓii jaɓɓotooɗo ɗum, min du mi hebii donoo kam nyannde Alla muuyi e am. ƴuude hannden, nder wuro ngo, debbo fu dewlataake mo yiɗaa.