Waɗiino e jamaanuuji, debbo rimi ɓinngel mum. Ko foti o yiƴde ngel walaa. Wari o maayi o yoppi ngel. Ngel tawdaa baabiigel faa ɗum warowi ɗum dewli debbo keso. Illa debbo keso o dewlaa, cukalel ngel hewtay hoorem. Ko boni fu ɗuum o waɗetee. O fiyete, o yenete, wi'ete o waɗii ko o waɗay. Baabiyo memi hunngori. Deekum jaɓay. Nde weeti fu ngayngum e cukalel ngel yo ɓeedoto.

Nyannde gom moodibbo wari weerani ɓe. Illa wari yo cukalel ngel horanta. Golle walaa mo o gollataa. So wi'aama o waɗa ɗum, ni wi'ee o waɗa ɗum to. Bajel waɗa ko wi'aa fu. Waara yarla, waara saabu Alla. Ngel yurminii moodibbo o.

Heddii moodibbo men noddi cukalel ngel ƴami: "Noy de a tampiniree nih, cukalel ?" Ngel jaabii ngel wi'i: "Wallay na woodi; keeɗu e keeɗu, inna goɗɗo e baaba njeebiiɗo." Moodibbo wi'i hokkoran o dalilii heɓa o yi'a yaaye gooto inniiko. Danyan ko ɗum waɗani o. Moodibbo hokki cukalel daliili. Ngel hejji ngel waɗi daliili oon.

Futuro warnoo fu, debbo neejo wari weerani ɓe. Tawi moodibbo kaa dawii. Debbo neejo o, yo yaaye gooto inna cukalel ngel. Nawlo inniiko o le, anndaa ɗuum. O hokkaa suudu lettugal ɓaade. So cukalel gollidii golleejim subaka ni yaka nyallo beero, ɗuum won yaaye gooto innam. So gollidii golleejim futuro, ni watta yaha hiirowa ɗo beero.

Ko cukalel ngel yaata to beero o ɗum, welaa nawlo inniyo o; yo gutan, yo ŋemoto, yo yennan. Ɗuum fu haɗataa cukalel yawde. So cukalel yottoke ɗo yaaye gooto innam ni wi'a:

Ni heddoo jooɗoo ɓe njewtida.

So jemma hiirii ni hiraande waddee. Yaaye gooto inniyo o, wi'a o wara ɓe kiirto. Nawlo inniiko o, jaaboo wi'a: "Oo kaa illa innam ƴuwi, hiirtodaaki goɗɗo; kam e ɓoosaaru bammum kawtata." Beero o jaaboo wi'a: " Hannde kaa accu o wara min kawta min kiirtoo saboo mi woowaa hiirtaade min tan." Ni ɓe kawta ɓe kiirtoo.

So fukkunde warii, beero o, wi'a cukalel ngel wara ɓoy pukkoo. Nawlo inniyo o jaaboo wi'a: "Oo koo illa innam ƴuwi fukkodaaki goɗɗo. Beegunuure to fukkotoo." Beero jaaboo o wi'a: "Baasi walaa; hannde kaa min kawtan min pukkoo; so mi dawii jaango, o fukkoyto ɗo o woowunoo fukkaade." Ɓe pukkodoo faa weeta.

Nyannde gom ɓe pini. Cukalel naatondiri e golleejim dagu no e bada nih. Beero o, ndaari o faa wooɗi de ƴami salle nih o wuurdi illa inniikoo ƴuwi. Cukalel jaabii wi'i na jaasi no o yi'ri nih. Heddii o waɗani cukalel ko ɓii-aadama remmbe waawaa waɗaneede fu: na'i hemnde, geeloobi hemnde, be'i hemnde, baali hemnde. Fu yo ɓiɓɓe muɓɓoy koontata. Nde nawlo inniiko yi'unoo ko o waɗanaa fu semti; heddii wi'i: "Semteende moɗam, moɗam mi ƴuufa mi laatoo waande."

Ni debbo men laatii waande. Ɗuum fuɗɗi waande.