Waɗiino e jamaanuuji, gorko wonnoo de walaa njaaliɗo ɗum. Addaare o wi'etee. Wari o nani koo kaananke woni faa njenndi e banndum; hiitaande fu, weendum ɓiɗɗo debbo hokketee nyaama. So weendu hokkaaka ɓiɗɗo debbo, wela yi'udeejo, hitaandem, ndiyam ƴoogataake. Dokkal ngaal yo fiiloto na warta. Mono fu e asayrem. Ndee ɓaade hokki ɓiɗɗo debbo hikka, ni ndee to hokka mawuuri.

Wari asayre kaananke wuro yottii. Yeru suka debbo mo ɗum fodii hokkude o, e wodde walaa. Walaa fu ɗo innde makko e haala ŋari makko, e haala ndimaaku makko e haala yurmeende makko njahay. Haalaare ɓii-laamu yottoke Addaare.

Walaa ɗo daree. Heddii Addaare yehi laamorde. Nde o yottinoo ndewngu kaananke fu, o jippanii debbo neejo. O ƴami debbo neejo: "Ndee suka debbo ɓii-laamu o sakkoytee weendu ndu?" Debbo neejo jaabii wi'i: "Hannde ɓii-laamu hokkoytee weendu. So waɗii seeɗa a faaman bawɗi makko na piya; ɗi ndewan o, faa o yottowoo cuurel bonngel."

Addaare ƴami ndu le suudu wi'etee cuurel bonngel. Debbo neejo wi'i: "Cuurel bonngel yo suudu nyiɓaa na woni tiinde maayo. Nder toon suka debbo mo kaalataa haalam o, ommboytee hannde jemma. Toon ɓiɓɓe weendu ndu, ngarta tawa o, nyaama o." Ni Addaare ɗaɓɓi debbo neejo sappowoo ɗum cuurel bonngel.

Heddii debbo neejo e Addaare ardondiri faa e cuurel. Ɓe njotinoo ni neyyel yeeƴii. Addaare tewti nokkuure suuɗi. Nanaa suka debbo na waddee. Orol aduna walaa no fotaa. Ɓee yo piyooɓe tube, ɓee to yo njiman maa mbulan. Suka debbo na jilinaa dow. Yottaa nannaa nder cuurel bonngel, ommbonoogo ommbaa de yimɓe cankitondiri.

Addaare anndunoo koo yimɓe fu ndillidii ni yottii hiirni suka debbo jam. Suka debbo jaabii o, ba njooɗiiɗo hakkunde innam e bammum. Kulol walaa e ɓeerndem fe. Ɓe njooɗii na ɓe njewta. Suka debbo ƴamataa ko waddi o, kanko o ƴamataa suka debbo ko waddi ɗum. Ba neeɓan ni paaɓi murii. Weendu iidi. Hoore jinnaaru ƴuwi nder weendu, hootowi faa dow. Jinnaaru omti hunnduko. Cabbi ƴulɓe lalli e ladde.

Addaare ummii darii. O wi'i: "Suka debbo, tinna ta kulaa, ko so Alla jaɓii mi waran jinnaaru ndu de mi jiline faa e janngo bammaa." Tawi o omtii suudu, faa o daroke e dammbugal taa jinnaaru nanna hoore sakko moɗam ɓii-laamu.

Suka debbo illa'rimaa hulay. O jaabii Adaare o wi'i: "Gorko, mbi'uɗaa ta mi hula, anndi ɗume won kulol." Addaare jaabii wi'i illa rimaa anndaa kulol. Kam du yo nanan na haalee. Suka debbo wi'i ndelle o faama, koo illa rimaa anndaa kulol. Ni fonnditii jooɗii. Ni Addaare na haɓda e jinnaaru.

So hoore jinnaaru soppaama ni wonnde fuɗa. Ko'e jeɗɗi Addaare taƴi de sakitii jaaltii jinnaaru. O wi'i suka debbo wara ɓe koota. Ni ɓe ndewondiri ɓe mbiiti nder wuro.

Nde ɓe naatunoo nder wuro fu, ɓe artorii ɓaade neyyel. Tawi yimɓe kaananke kejjirii weendu. Fadde muɓɓoy joogude ndiyam, ɓoy taaɓorii cuurel bonngel dooɗo suka debbo o, ommbanoo to. Ɓe njottinoo ni ɓe tawi suudu na weeɗii. Hoore jinnaaru faa hoore jinnaaru, ko'e jeɗɗi na mbaalii. Ɓe annditii koo manngal ladde waraama faa suka debbo dillidaama. Ɓe ndoggi ɓe kooti ɓe kaalanowi kaananke.

Kaananke haalananoo koo manngal weendu waraama ni waɗi suudu baaba hawrondinaa. O wi'i na o joganii mbaruɗo manngal weendu ndu moƴƴere. Heddii neyyel wari haalani kaananke koo beero wardi e suka debbo cakkanooɗo manngal weendu wurom to. Ɓe ɗiɗo fu ɓe nilanaa. Kaananke hokki beero o, moƴƴere mawnde Alla e kannyum saabii de ɓe kewti weendu maɓɓe; o hokkoraa suka debbo o du, o dewli.