Waɗiino e jamaanuuji, cukalel na wi'ee Jiija. Yeru makko e eeteede walaa. Ko o muuyi fu ɗuum o hokkortee. Nyannde gom o naati ladde na o waancoo. O tawi mboddi na nyaama kaareeje. O noddi ndi faa ndi nootii de o ƴami: " Noy de na a nyaama kaareeje. Naa a foondu?" Mboddi jaabii wi'i koo rafa.

Jiija ndaari mboddi faa neeɓi de watti wi'i: "Mboddi, a yurminii kam; war rewam konden, koo fay kedde ndiibiri am heƴii ma. Ni ɓe ndewondiri ɓe kooti wuro Jiija en. Inna Jiija yottii jooti ɓe. Baaba Jiija watti koyɗe, yottii jooti ɓe.

Nde ɓe njottinoo ɓe pootini fu, Jiija naatowi nder suudu wuytini neema hokki mboddi. Mboddi nyaami, nyaamidi. Noddi Jiija, wi'i Jiijaa mi haaray. Jiija wuytini ko woni nder suudu fu hokki mboddi. So mboddi nyaamii nyaamidii ni wi'a, Jiijaa mi haaray.

Wari Jiija anndaa ko watta. O heddii o hucciti yimɓe makko na o yima:

Ni mboddi hokkaa dammucce tati. Na hokkee na moɗa. Ndi moɗunoo dammuce ni ndi watti ndi wi'i Jiijaa mi haaray. Ni Jiija watti hucciti yimɓem. Dammuce tati ngaddaa. Mboddi men moɗi ɗe, de watti wi'i, Jiijaa mi haaray.

Jiija heddii hucciti bammum wi'i kuunga mannga haaray. Baabiyo o waɗi kaddi maral mum fu waddaa. Ko waddaa fu mboddi jaɓa moɗa de wi'a haaray. Wari walaa fu ko ndi hokkee. Ni na ndi haala: Jiijaa mi haaray. Jiija ndaari nano, ndaari nyaamo, walaa fu ko mboddi hokkee. Heddii o hucciti baabiiko. O wi'i:

Ni baaba Jiija ɗakkii. Mboddi nanngi ɗum moɗi de watti wi'i:

Ni inniyo ɗakii, mboddi moɗi ɗum. Ndi watti ndi wi'i: "Jiijaa mi haaray." Jiija anndaa fu ko waɗata. Heddii wi'i:

Laamɗo jipini pemmborɗe tati mbelɗe. Ni mboddi men jaɓi ɗeen du moɗi. Ni reedum feccii; dammucce ɗe mbuytii, Inna Jiija e Baaba Jiija mbuyti.

Illa nyanndem, yimɓe mbi'i suka leeɓaa eetee faa ƴaɓitoo.