Waɗiino e jamaanuuji, sukaaɓe worɓe ɗiɗo: oo na wi'ee Sammbo, oo na wi'ee Kaaldo. Ɓe koolondirno hunnde. Jemma e nyalooma fu yo kamɓe njaadannoo. Sammbo le rewataanaa dey kaananke. Ɗuuɓi o fuɗɗiri filaade dey kaananke o heɓay.

Alla resi en reeni en faa nyannde gom dey kaananke wi'i waran hiiro makko. O haalani Kaaldo. Heddii jemma warnoo fu, dey kaananke wari. Ɓe kiirdi faa jenngi. Dey kaananke warowi wi'i hootan.

Arande so dey kaananke yehii hiiro gorko, nde hooti fu tilay haalowa. So haalay, nyaw mbonngu ngu hantataako nanngata ɗum. So haalii, suka gorkom, innam e bammum fu tappete mbaree. Ndelle de suka debbo wayninoo ko hootan, Sammbo e Kaaldo, ummii ndarii, anndaa ko ngatta.

Heddii sukaaɓe worɓe men ƴamondiri ko ngaɗata. Ɓe ndaari ɓe tawi, ko ɓe ngaɗi fu wooɗaa. Ko ɓuurti woodi. Ko ɓuurti le ɓuray nde ɓe mbari dey kaananke. Heddi ɓe mbari o. Ɓe mooɓi o nder suudu Kaaldo, nder jemma oon.

Wari weeti. Naange fuɗi faa wari nyawli, dey kaananke yi'aaka. Tubal tappaa. Nilaaɗe ndilli. Lettugal e gorgal fu dey kaananke yo yeeyete. Fay gooto faamanay o. Rewi faa kiikiiɗe wari, o tefaa, o memaa yiiteede hunngoraa.

Worndi noon faa Kaaldo warowi waɗi ko jom yonki. Sammbo na wulla deƴataa. O wulliri jeɗɗiire. Jeɗɗiire ruuɗii warti fu Sammbo deƴƴay. Yimɓe cawrini o; memi kunngorii. O wi'i mayde Kaaldo nde, metti o.

Heddii suudu baaba hawriti ndaari ko jey waɗude heɓa Sammbo deƴƴinoo. Kaananke leydi wi'i na anndi ko watta. O waɗi jokolɓe hemnde kawrondinaa. Jokolɓe ɓurondirɓe ŋari, ɓuroriri njokollaaku de ɓuroriri wodde tagu. Kaananke wi'i Sammbo suɓoo gooto maɓɓe waɗa jaadom, luttina Kaaldo, de hula Alla deƴƴinoo. Sammbo wi'i kaananke, wanaa jokolɓe won ngaray, dagu Kaaldo won waray. O memaa o hunngaa. O warowi o suɓii gooto.

Heddii Sammbo e jaadom keso na njaada. Wari nyannde gom ndawuuwa kaananke lalli. Sammbo yi'i ndawuuwa nga. O nanngi nga o mooɓi de o itti ndamndiri makko mbaala ngootiri o hirsi. O waɗi teewu ndamndiri ndi, defaa de o baantii jaadiiko wara ɓe nyaama. Nde ɓe nyaamunoo ɓe nyaamdi ni Sammbo wi'i jaadom koo tewu ngu, yo teewu ndawuuwa kaananke. Ni ɓe njehi ɓe pukkowii ɓe ɗaanii.

Jaado Sammbo hejji illa fajiri, yehi wuro kaananke. Tawi kaananke na jooɗii Alla e ronku ɗoyɗi illa ndawuuwa nga lalli. Na ɓalinii. Ɓe njootondiri faa jootiiru timmi. Suka gorko itti fillii. O wi'i: " Sammbo genndoke kam hanki, kaananke. Teewu o waɗi defaa. O baantii kam. Min nyaami faa min kaari. Min kiiri seeɗa de min ummii heɓa min pukkowoo. Ndeen noon, kananke, o haalani kam koo teewu ngu, yo teewu ndawuuwa maa nga. Miilii-mi faa wooɗi. Mi anndaa fu no ɗum wa'ni kam. Ndelle mbi'u-mi mi waran mi haalane heɓa yimɓe tewtoyɓe ndawuuwa nga, ngarta saboo ko hirsaa, jonngaa, hiirtaa de heddaa heɓa fummee hasaaki naatuɓe ladde na tewta njiita ɗum."

Kananke nilani Sammbo. Illa neeɓay, nilaaɓe ngaddowi Sammbo. Kaananke na jooɗii na ɓalinii. Fay fesaa ƴiiƴam warataa. Sammbo ummaninoo jonnde makko heɓa ɓe njootondira fu, kaananke wi'i o haaɗa toon. O haɓɓee faa o ŋeeta. Sammbo ƴamtinii ko saabii de na haɓɓee. Kaananke wi'i: "A dullaa tiiri. Walaa fu ko mi waɗanay ma nde Kaaldo maynoo heɓa wayloo koo nih njoɓirtaa kam. Koo aan Sammbo yarlotoo hirsa ndawuuwa am." Sammbo wi'i ɗuum yo jumoodu. Fay yi'i cofal kaananke nanngan mooɓa, sakko ɗo waylii ndawuuwaa. Kaananke ƴami noy de o waɗi ndawuuwam jonngaa ndelle.

Sammbo haalani kaananke no fu yaari. O wi'i o yi'i ndawuuwa kaananke, o nanngii ɗum o mooɓii heɓa naange nyawla de o hoora ɗum. Teewu ngu o hawti jaadiiko o nyaami ngu, yo teewu ndamndiri makko. Ni kaananke waɗi o haɓɓitaa. Kanko du o haɓɓitowi ndawuuwa kaananke o waɗi.

Ndelle paamee ko jaadiyo hokkortaake. Jaadiraaɓe koolniiɓe du keewaa.