Anndi nde Joomiraaɗo haaldannoo e Muusaa to Madiyana too nde o wiyno Muusaa, ƴeew maa mi waɗ Haaruuna no annabi maa. Aan kaalaa, Haaruuna yettina ɗum Fira’aawna, mbele maa o woppu Isra’iila’en njalta Misira. Muusa e Haaruuna mbaɗi ko Alla yamiri ɗum’en koo. Oon sahaa Muusaa ina yahra e duuɓi cappanɗe jeetati, Haaruuna yahratnoo ko e duuɓi capande jeetati e tati nde ɓe kaaldata e Fira’aawna ndee. Joomiraaɗo wiy Muusa e Haaruuna, “So Fira’aawna naamniima on daliilu, aan Muusa, mbi’a Haaruuna yoo nanngu sawru nduu, o weddoo ndu e yeeso Fira’aawna. Maa ndu wontu mboddi.” Muusaa e Haaruuna mbaɗiri no Joomiraaɗo wiyri ɗum’en nih. Nde ɓe njettii ndee Haaruuna weddii sawru nduu e yeeso Fira’aawna e watulaaɓe mum. Ndu wonti mboddi. Tan Fira’aawna noddi wileeɓe mum e ñenngotooɓe mum fof.