1 Mane ufalyawang wean ini:
Na'a rahan teta isa,
na rahan duan nfadoku roak ma yanan isa veka ni munuk metan ra.
Na'uk wol varverun ia obin,
ba wol ni akataka obin,
wean watan tamata sansinir.
2 Tamata boku rwanar ovu rsurak a rair kasiko'u yai,
ovu vali rsi'ik teri ni metan ra,
ti naran amar i yaman a nfadoku a.
3 Wean vali inyai verin ita.
Na'ut i weadida kasiko'u yai obin,
na torang watan adat ovu inukun ovi rna'a lanit ivavan ini,
ma afa avyai rsinir tia ma watan ita,
wean tamata ra rsinir tia ma watan rira tamata sansinir ra.*
4 Na'uk ti naran amar i Ubu nfadoku a,
na Ia nsinir roak Yanan a ma nma lanit ivavan ini.
Vata isa nrali Ia,
ovu na'a Ni vava'at a not-orang Musa ni inukun ra.
5 Ia nma ma nfatalik ita tali Musa ni inukun ra,
boma Ubu nala vali ita ma teluk yanan ra.
6 Ubu nala roak ita ma teluk yanan ra,
ba nsinir Yanan Ni Roh a ma nleal raladida ra.
Ubu Yanan Ni Roh yai notu ma bis tfalak ne,
“Bapa oo,
Bapa!”*
7 Ba mia wol myeluk tamata sansinir roak,
na'uk Ubu yanan roak mia.
Ba Ubu veka nala vali verin mia afa ovi ntorung roak verin yanan ra.
Paulus ralan raruan na'a tamata ovi rorang Yesus rira sidovung a na'a Galatia
8 Terang a valing averi,
lan ana,
mia wol mkya'a Ubu,
ba mia weabira tamata sansinir verin ubu siklabir ra.
9 Na'uk fiang ini mia mkya'a roak Ubu,
te ni lolin a ufalak ne,
Ubu nka'a roak mia.
Ba afaki notu mi myorang ewal adat ovu inukun ovi rna'a lanit ivavan ini,
velik ne afa avyai wol rira ngrebat ovu wol fyawar lahir?
Inabira ma msyoak ewal verin adat ovu inukun avyai,
ma myeluk tamata sansinir verin afa avyai?
10 Mia iva'ubira ma myorang agama Yahudi ni snoba ra ovu amar dawan ra na'a amar,
vulan,
ovu varat ra.
11 Ya'a ralang raruan na'a afa ovi otu roak verin mia yai,
betane ning farea nleka ma lolan watan.
12 Terang a valing averi,
era verin mia ovu ralang urun ma fara myot-orang afa ovi otu ra,
tevek utalik roak mami adat Yahudi ma uva'at wean mia,
tamata ovi wol Yahudi ra.
Mia vali wol myotu sala verin ya'a.
13 Mia mkya'a roak ne,
lan ana,
ning suhut a notu ma beti uti fasa ma ufamalik Ubu Ni Ivar Lolin verin mia.
14 Velik ne na'ut inyai,
na ning suhut neluk angangal verin mia,
na'uk wol mkyasiri ya'a ma mila'ing ya'a.
Myotu ma lolin watan ya'a,
wean watan i myotu ma lolin vali Ubu Ni sansinir i ntali lanit ratan a,
ovu nlia tali inyai vali,
na wean i myotu verin Kristus Yesus.
15 Ba na'ut inyai,
na inabira lolin urun,
na'uk fiang ini inabira lolin yai nahu ba nti?
Ya'a bis ufalak lahir ne,
na'ut inyai,
na myotu afaka watan ma al mlyobang ya'a,
ma naran i mtyorung ma mkyivul matabira ra ma myala verin ya'a!
16 Fiang ini minovak ne,
bira sian ya'a,
tevek ufalak afa ovi kena ra verin mia?
17 Tamata avyai inar ma myot-orang Musa ni inukun ra,
na'uk afa ovi rotu ra wol lolin.
Ira inar ma tsisala raladida,
boma myorang ira ovu ralabira urun,
ma deka myorang ami.
18 Lolin ma mkyarya ovu ralabira urun,
wean i myotu afa ovi lolin ra.
Fara mkyarya lalawatan ovu ralabira urun.
Deka mane una'a ovu mia beti mkyarya,
na'uk uban-muring ana,
myotu afa liak.
19 Yanak averi,
ulobang mia.
Ralang nwa'uk urun tevek mia,
ba wawa'uk i ufarnuang ini wean lahir wawa'uk i vata ra rfarnuang na'ut i mane rarali ira.
Ya'a veka utuan susa lalawatan,
nata ti naran i bira vava'at a wean Kristus Ni vava'at a.
20 Umaseak urun ma udoku ovu bir tinemun,
boma ala vaivatul boku ma usurak ngalalahang mia ma al ufalak ralang a verin mia.
Ya'a wol uka'a roak ne,
veka otu afaka vali verin mia,
tevek tsifaroa ita.
Paulus nfamalik Hagar ovu Sara ma neluk vaivatul kamkuma
21 Terang a valing averi,
tali bir tinemun,
na boku mane myot-orang Musa ni inukun ra munuk,
na'uk fyan-aran inukun avyai ihirira ra te wahal?
22 Musa ntulis roak na'a inyai ne,
Abraham yanan brana irua.
Isa renan a verin Abraham ni vata sansinir a naran Hagar,
na isa vali renan a verin Abraham awan i naran Sara.
Ia wol neluk vata sansinir.*
23 Kasiko'u i renan verin vata sansinir yai rarali ia wean watan tamata biasa.
Na'uk kasiko'u i renan a verin vata i wol neluk sansinir yai rarali ia,
ma nfakena Ubu Ni tnorung a verin Abraham.*
24 Tomu ini nfalyawang verin ita wean ini.
Vata irua yai wean tnorung irua tali Ubu.
Hagar wean tnorung i Ubu nala na'a vuar Sinai.
Tnorung yai nkiwal tamata ra ma rtorung Ni inukun ra,
ba wean vali inyai,
vata sansinir yanan ra veka rna'a watan sansinir.*
25 Hagar yai wean tamata ovi rsoak nulu inukun ovi rala na'a vuar Sinai i nana'a Arab.
Fiang ini ia wean kota Yerusalem,
ovu tamata ovi rleal inyai wean yanan ra,
tevek ira wearira sansinir ra ma rsoak verin Musa ni inukun ra.
26 Na'uk Sara wean kota Yerusalem i nana'a lanit ratan a.
Ia wean yanan verin tamata ovi wol rsoak nulu Musa ni inukun ra.*
27 Tevek rtulis roak na'a Surat Ralan ne,
“Fara inam lolin watan,
vata i wol yanam a,
ma wol mdoku rahan fasa vali obin.
Fara ralam a lolin urun ma mufwak.
Oa wol fwarnuang obin vata ovi mane rarali ira rira wawa'uk a.
Na'uk vata i awan nti talik ia,
yanan ra veka rivun lia tali vata i awan nana'a.”*
28 Terang a valing averi,
Ubu yanan roak mia,
tevek myorang Ni tnorung i nala verin Abraham yai.
Ba mia weabira vali Ishak i rarali ia,
tevek myorang Ubu Ni tnorung yai.
29 Na'ut inyai,
na kasiko'u i Hagar nrali ia yai wean watan tamata biasa ma nwi-nwa kasiko'u i Sara nrali ia,
tevek ngrebat tali Ubu Ni Roh.
Fiang ini wean vali inyai,
ma tamata ovi rsoak nulu Yahudi rira inukun ra rwi-rwa vali ita,
tamata ovi torang Ubu Ni Roh a.
30 Rtulis roak na'a Surat Ralan ne,
“Mila'ing vatuk vata sansinir yai ovu yanan a,
tevek vata sansinir yai yanan a wol ni wahat na'a vata i wol sansinir yai yanan a ni metan ovi rtali yaman a.”*
31 Ba terang a valing averi,
ita wol renadida verin Hagar,
vata sansinir yai,
na'uk ita renadida verin Sara,
vata i wol neluk sansinir.*