Kristus nfatalik roak ita tali Musa ni inukun ra
1 Terang a valing averi,
Kristus nfatalik roak ita tali Musa ni inukun ra,
ba wol teluk tamata sansinir roak verin inukun avyai.
Bira dardirin a musti nangrebat ovu deka mtyorung ma myeluk ewal tamata sansinir.
2 Ya'a ini Paulus eluk rasul ma era verin mia ma mingnanang ma lolin afa i ufalak ini.
Wean i mtyorung ma rsunat mia,
na afa ovi Kristus notu verin mia wol fyawan akataka lahir.*
3 Ufalak ewal vali verin mia ne,
tamata iki watan ntorung ma rsunat roak ia,
na musti not-orang Musa ni inukun ra munuk.
4 Mia minovak ne,
wean i myot-orang Musa ni inukun ra,
na Ubu ntorung ma nala mia wean tamata ovi rira vava'at ra rmalola.
Myotu wean inyai,
na fyaturu lahir ne,
bira vava'at ovu Kristus nametal roak.
Mia myotu ma Ubu Ni rala lolin a wol nana'a roak mia.
5 Na'uk Ubu Ni Roh nfangrebat raladida ra,
ma tfadoku dida vava'at ra na'a Ia.
Ubu ntorung ma veka notu ma dida vava'at ra rmalola,
ba tnaban afa yai,
tevek torang Kristus.
6 Wean i dida vava'at isa roak ovu Kristus Yesus,
na rsunat te wol rsunat ita,
irua wear isa watan,
tevek wol ihin akataka verin Ubu.
Ni lolin a torang a'uk Yesus Kristus,
ovu tlobang tamata ra,
ma tfaturu dida inorang a.
7 Lan ana,
iva'ubira urun ma myorang Yesus Kristus.
Na'uk iki nangal mia,
ma fiang ini wol myorang roak Ivar mnga'un a?
Mia wean tamata i nafla silalia ma ula ia,
na'uk tamata isa nafla teri ia.
8 Angangal yai wol ntali Ubu i nera roak mia.
9 Wean ragi,
velik ne kedan watan,
na'uk bisma nfamela terigu ma dawan ila'a.
Inyai wean vali tamata i nair afa sala kedan a watan,
na'uk bisma nlabir nala munuk mia.
10 Ning inorang verin Duila'a ne,
mia wol myorang afa sala ovi tamata liak rair ra.
Na'uk tamata i notu ma bira fikiran ra rsifarsangal ira yai,
Ubu veka nukun ia,
tevek Ubu wol nkamlabir ne,
tamata yai ni van dawan te ko'u.
11 Terang a valing averi,
wean i air mia ne,
musti rsunat tamata ra veki,
boma rorang Musa ni inukun ra,
na Yahudi ra wol rangrova ya'a.
Na'uk ya'a wol air wean inyai!
Ira rangrova ma rotu sian ya'a,
tevek air mia ne,
Kristus nmata na'a aa walwalur ma al nakvanak ita.
12 Tamata ovi rlabir waweang mia ma rkiwal mane tamata ra rsunat mia,
na ni lolin a ka'i rfahil watan ira.*
13 Terang a valing averi,
Ubu nera roak mia,
boma bira adat ra ovu inukun ra deka rkeak mia.
Na'uk deka minovak ne,
wol kakeak nkeak roak mia,
ba bisma myotu watan afa ovi ralabira ra rfalak a.
Ni lolin a,
msyilobang mia,
ovu msyiotu lolin mia.
14 Musa ni inukun ra munuk lahir ihirira ra rna'a roak inukun ini,
“Mlobang tamata liak ra wean watan i mlobang tenam a.”*
15 Na'uk wean i mia ka'i msyingarahi-sikual lalawatan mia,
na msyi'ik wabira ma lolin,
tevek wahal,
na veka ka'i msyivisal-vasil mia.*
Torang Ubu Ni Roh a
16 Terang a valing averi,
mane ufalak verin mia wean ini.
Na'a bira vava'at ra,
na myot-orang watan afa ovi Ubu Ni Roh nfalak verin mia,
boma deka myorang bira ininan sian ra.
17 Tevek bira ininan sian avyai nangal ininan i ntali Ubu Ni Roh a.
Ininan i ntali Ubu Ni Roh a nangal vali bira ininan sian ra.
Irua rsifarsangal ira,
ba wol myot-nala afa ovi ralabira ra rfalak a.
18 Na'uk wean i Ubu Ni Roh nfareta mia,
na wol msyoak roak nulu Musa ni inukun ra.
19 Ita tsi'ik lahir ininan sian ovi rtali tamata ra,
na'a rira afa ovi rotu ra.
Afa avyai wear ini:
tamata ovi rsifa tia ma watan ovu tamata ovi wol awarira verin ira,
rfikir ovu rotu afa ovi ngra-ngrodi ra,
raktufan urun ovu rotu watan afa ovi wol inovan ra,
20 tamata ovi rsoak nulu walut ra,
rtaha afa te rotu rira afnitu ra,
isa wol inan lahir isa,
rfangru sian,
wol inar ma rsi'ik tamata liak rira lolin ra,
rsingrova sian,
rfikir a'uk tenarira ra,
rfaroa tenarira ra tali tamata ovi wol rorang ira,
rasdovu a'uk ira ovu tamata ovi rira fikiran ra wean ira.
21 Tamata ovi rlobang tamata liak rira metan ra,
boranavut ira,
rotu snoba ma boranavut ira ma raktufan,
ovu vali afa sian liak ra.
Tali afa avyai munuk,
na ufangnanang ewal mia wean lan a ufalak roak verin mia ne,
tamata ovi rotu afa avyai,
na ira veka wol warira na'a Ubu Ni Fareta a.
22 Na'uk tamata ovi Ubu Ni Roh nleal ralarira ra,
ira rira vava'at a wean ini:
rsilobang ira,
ralarira lolin urun,
ralarira ra malinan watan,
rtahang nal ralarira,
rmarkai,
rira vava'at ra rmalola ovu inar ma rotu lolin a verin tamata ra,
rot-orang lalawatan afa ovi rfalak ra,
23 rfakabava tenarira ra,
ovu vali rka'a ma rtahang nal ralarira na'a afaka watan.
Musa ni inukun ra vali wol rfalak teri tamata ra ma rot-orang afa lolin avyai.
24 Tamata ovi rira vava'at na'a roak Kristus Yesus liman ralan a,
na ira wol rorang roak rira ininan sian ra,
ovu vali sian ovi rtali tenarira ra,
ma wean i rira ininan sian ra rmata roak na'a aa walwalur.
25 Ubu Ni Roh a nala roak vava'at ngorva'an verin ita,
ba ita musti tva'at wean i nfaturu verin ita.
26 Deka tfakaratat tenadida ra,
ovu deka tsiahat ita ma tsitaha,
ovu vali deka tlobang tamata liak rira metan ovu vali afa liak ra.