Torang Musa ni inukun ra, te torang Yesus Kristus?
1 Terang a valing ovi mnya'a Galatia,
mia byoda!
Iki nlabir nala roak mia i?
Ya'a ufalyawang ma lolin roak Yesus Kristus Ni matmatan na'a aa walwalur verin mia.
2 Mane orat afa isa watan tali mia ne,
Ubu nala Ni Roh ma nleal ralabira ra tevek myorang Musa ni inukun ra,
te mryenar i tamata ra rfamalik Ubu Ni Ivar Lolin a ma myorang Kristus?
3 Mia byoda urun!
Mia beti bira vava'at ngorva'an ovu Ubu Ni Roh,
na'uk afaki notu mi fiang ini inabira ma myorang Ubu ovu bira ngrebat ra watan?
4 Mia mtyuan susa dawan roak,
ba fara susa avyai deka rleka ma lolan watan.
5 Ubu nala Ni Roh a verin mia,
ovu notu vali mujizat ra verin mia.
Ba orat mia ne,
Ia notu munuk afa avyai,
tevek myot-orang Musa ni inukun ra?
Wahal lahir!
Ia notu wean inyai,
tevek mryenar i rfamalik Ivar Lolin a ma myorang lahir Kristus.
Ubu ntorung ma notu kida ovu Abraham, tevek ni inorang nangrebat urun
6 Rfamalik roak Abraham na'a Surat Ralan ne,
“Abraham norang urun Ubu,
ba ni inorang a notu ma Ubu notu ma ni vava'at nmalola ovu Ia.”*
7 Mia musti mkya'a ne,
tamata ovi rira inorang verin Ubu,
na Abraham yanan urun ira.*
8 Tali lalan ana,
Ubu nfalak ma tamata ra rtulis roak na'a Ni Surat Ralan ne,
wean i tamata ovi wol Yahudi rorang Ia,
na Ia veka notu ma rira vava'at ra rmalola ovu Ia.
Ubu nfamalik lan roak Ni Ivar Lolin yai verin Abraham ne,
“Veka uflahar munuk tamata ovi rna'a lanit ivavan ini,
tevek afa ovi veka motu ra.”*
9 Abraham norang Ubu,
ba Ubu naflahar ia.
Wean inyai vali verin tamata ovi rorang munuk Yesus,
ba Ubu veka naflahar ira.
10 Tamata ovi ranovak ne,
rira vava'at ra kena ovu Ubu,
tevek rorang Musa ni inukun ra,
na Ubu veka near nfasoba munuk ira.
Lalan ana,
rtulis roak na'a Surat Ralan ne,
“Ubu veka near nfasoba tamata ovi wol rot-orang lalawatan afa ovi Musa ntulis roak na'a ni inukun ra.”*
11 Ba ita tka'a ma lyawan roak ne,
Ubu wol notu ma tamata ni vava'at nmalola ovu Ia,
tevek norang Musa ni inukun ra.
Surat Ralan nfalak ne,
“Tamata ovi rira vava'at ra rmalola tevek rorang Ubu,
veka rira vava'at kakiwal.”*
12 Tamata iki watan naklo'i ni vava'at a na'a Musa ni inukun ra,
na wol naklo'i roak ni vava'at a verin Ubu ma nlobang ia.
Surat Ralan nfalak ne,
“Tamata iki watan not-orang Musa ni inukun ra,
na ia musti naklo'i ni vava'at a na'a inukun avyai.”*
13 Kristus nmata roak ma al nakvanak ita tali Ubu Ni inukun i near nfasoba ita.
Kristus ntorung ma Ubu near nfasoba Ia,
tevek dida salasilan ra.
Ira rtulis roak na'a Surat Ralan ne,
“Ubu near nfasoba roak tamata ovi rfaklo'i ira ma rmata na'a aa.”*
14 Yesus Kristus ntevut roak ita,
boma tamata ovi wol Yahudi ra rira vali afa lolin ovi Ubu ntorung roak verin Abraham,
tevek afa i Yesus notu verin ita.
Wean inyai,
na Ubu veka nfakena vali Ni tnorung a ma nala Ni Roh a verin ita,
tevek dida inorang a verin Ia.
Ubu naflahar ma dawan Abraham, tevek Ni tnorung verin ia ovu Ni tnorung yai wol nlia-nmamu
15 Terang a valing averi eka mryenar,
tevek mane ufamalik afa isa verin mia tali dida vava'at lokat amar a.
Wean i tamata irua ra'an vai isa roak ma rotu faneak na'a rira tnorung a,
na tamata liak wol bisma ra'i vatuk te rtafal afa boku na'a tnorung yai.
Ubu Ni tnorung ovu Abraham wean vali inyai.
16 Ubu nala lan Ni tnorung a verin Abraham ovu ubun-nusin isa.
Ia wol nfalak na'a Ni Surat Ralan ne,
“Abraham ubun-nusin ra veka rira tnorung yai,”
na'uk nala tnorung yai verin Abraham ubun-nusin ikisa watan.
Inyai nfaturu Kristus.
17 Afa i ufalak ini ihin a wean ini:
lan ana,
Ubu nala roak Ni tnorung a verin Abraham.
Varat ratut ifa'at rahin vututelu nelak roak,
beti nala inukun ra verin Musa.
Ni inukun avyai rban-muri,
ba wol ra'i vatuk nala Ubu Ni tnorung yai.
18 Ubu wol naflahar tamata ra,
tevek rot-orang Musa ni inukun ra.
Na'uk naflahar ita,
tevek torang Ni tnorung i nala roak verin ita.
Ubu nala Ni rala lolin a verin Abraham,
ma nala Ni tnorung a verin ia ma naflahar ia.
19 Ba notu afakinimi Ubu nala Ni inukun ra verin Musa?
Ia nala inukun ra,
tevek tamata ra rotu lalawatan salasilan ra.
Rfabana inukun avyai,
ti naran i Abraham ubun-nusin i Ubu ntorung roak yai nma.
Ia nsinir Ni sansinir ra tali lanit ratan ma rala inukun ra verin Musa,
beti Musa nala inukun avyai verin tamata ra.
Ba Musa ndiri Ubu ovu tamata fruarira ra.
20 Wean i tamata ra rotu tnorung,
na tamata isa musti ndiri irua fruarira ra.
Na'uk amar i Ubu notu Ni ntorung verin Abraham,
na wol tamata ma ndiri fruarira ra.
Ia ka'i notu watan tnorung yai.
21 Ubu wol nangal Ni tnorung a na'ut i nala Ni inukun ra verin Musa.
Na'uk wean i Musa ni inukun ra rala vava'at kakiwal verin tamata,
na tamata rira vava'at ra kena ewal ovu Ubu,
tevek rot-orang inukun avyai.
Velik aba wol wean inyai!
22 Surat Ralan nfalak ne,
salasilan ra rkeak teri tamata ra munuk.
Ba Ubu nala Ni tnorung verin tamata ovi rorang a'uk Yesus.*
23 Na'ut i wol amorang Yesus Kristus obin,
na Musa ni inukun ra rbelat teri watan ami,
ma wean i amna'a bu'i ralan ma musti amorang inukun avyai,
ti naran i Yesus Kristus nma ma amorang Ia.
24 Ba Musa ni inukun ra wean i rbelat teri roak ita,
ti naran amar i Kristus nma roak,
ma Ubu ntorung ma nala ita wean tamata ovi rira vava'at ra rmalola,
tevek torang Yesus.
25 Fiang ini torang roak Yesus Kristus,
ba Musa ni inukun ra wol rbelat teri roak ita.
26 Terang a valing averi,
Ubu yanan munuk mia,
tevek myorang roak Yesus Kristus.
27 Na'ut i rbaptis mia,
na nfaturu ne,
mia ovu Kristus isa watan mia.
Myeluk Yesus Kristus Ni vava'at a,
wean i myoru bira kadaravit ngorva'an a.
28 Wol fyawan verin Ubu ne,
tamata Yahudi te tamata ovi wol Yahudi ra,
tamata sansinir te wol tamata sansinir,
vata te brana,
tevek bir tinemun isa watan mia na'a bira inorang a verin Yesus Kristus.*
29 Kristus Ni munuk roak mia,
ba Abraham yanan vali mia.
Ubu veka nala Ni kalolin a verin mia,
wean i ntorung roak verin Abraham.